PM Modi: బ్రేకింగ్.. 10 గంటలకు జాతినుద్దేశించి ప్రధాని మోదీ ప్రసంగం.. పీఎంవో ప్రకటన, సర్వత్రా ఆసక్తి

గురువారంతో భారత్‌లో కరోనా వ్యాక్సిన్ డోసులు 100 కోట్ల మార్కును చేరుకున్న సంగతి తెలిసిందే. ఆ తర్వాతి రోజే ప్రధాని మోదీ జాతినుద్దేశించి ప్రసంగించడం ప్రాధాన్యం సంతరించుకుంది.

ప్రధాన మంత్రి నరేంద్ర మోదీ ఈ రోజు (అక్టోబరు) ఉదయం 10 గంటలకు జాతినుద్దేశించి ప్రసంగించనున్నారు. ఈ మేరకు ప్రధాన మంత్రి కార్యాలయం (పీఎంవో) శుక్రవారం ఉదయం 7 గంటలకు ఓ ట్వీట్ చేసి ప్రకటించింది. గురువారంతో భారత్‌లో కరోనా వ్యాక్సిన్ డోసులు 100 కోట్ల మార్కును చేరుకున్న సంగతి తెలిసిందే. ఆ తర్వాతి రోజే ప్రధాని మోదీ జాతినుద్దేశించి ప్రసంగించడం ప్రాధాన్యం సంతరించుకుంది. వ్యాక్సిన్ డోసుల గురించి ప్రసంగిస్తారా? లేక ఇంకేదైనా కీలక ప్రకటన చేస్తారా? అన్నది ఆసక్తికరంగా మారింది. నిన్న వ్యాక్సిన్ డోసులు 100 కోట్ల మార్కును దాటిన సందర్భంగా దిల్లీలోని రామ్ మనోహర్ లోహియా ఆస్పత్రిని మోదీ సందర్శించిన సంగతి తెలిసిందే. అక్కడి డాక్టర్లతో, ఇతర వైద్యఆరోగ్య సిబ్బందితో కాసేపు ముచ్చటించారు.

ప్రధాని మోదీ శుక్రవారం తన ట్విటర్ ప్రొఫైల్ పిక్చర్‌ను మార్చారు. దేశంలో కరోనా వ్యాక్సిన్ డోసులు 100 కోట్ల మార్కును దాటిన వేళ ఈ సందర్భంగా మోదీ తన ట్విటర్ ఫోటోను మార్చారు. ఆ ఫోటోలో కరోనా వ్యాక్సిన్ డోసులు దేశంలో 100 కోట్లు దాటాయనే అర్థం వచ్చేలా ‘కంగ్రాట్యులేషన్స్ ఇండియా’ అని ఉంది.

‘‘భారత్ సరికొత్త చరిత్ర లిఖించింది. 130 కోట్ల మంది భారతీయుల ఆత్మవిశ్వాసానికి, ఐకమత్యానికి ఇది ప్రతీక. భారత శాస్త్రవేత్తల కృషికి ఇది ప్రతిఫలం. 100 కోట్ల టీకా డోసుల పంపిణీ చేసినందుకు దేశానికి శుభాకాంక్షలు. ఈ ఘనత సాధించినందుకు వైద్యులు, నర్సులకు నా కృతజ్ఞతలు.’’ అని ప్రధాని మోదీ నిన్న (అక్టోబరు 22) ట్వీట్ చేసిన సంగతి తెలిసిందే.

కరోనా వ్యాక్సిన్లను పంపిణీ చేసి 100 కోట్ల మార్కును దాటడంలో చైనా తర్వాత భారత్ నిలవడం ప్రత్యేకంగా నిలిచింది. అంతేకాక, కరోనా విలయం ఏర్పడిన నాటి నుంచి ప్రధాని మోదీ జాతినుద్దేశించి మాట్లాడిన పదో ప్రసంగం ఇది అవుతుంది. కరోనా వ్యాక్సినేషన్ దేశంలో ఇవ్వడం ప్రారంభించిన 9 నెలల్లోనే 100 కోట్ల డోసులు ఇచ్చిన మార్కును భారత్ అధిగమించింది.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి