Badrinath Dham: బద్రీనాథుడి దర్శనానికి సిద్ధమా? తెరుచుకున్న ఆలయ తలుపులు

Badrinath Dham: వేదమంత్రాల మధ్య, అశేష భక్త జనవాహిని నడుమ బద్రీనాథ్ ఆలయ తలుపులు తెరుచుకున్నాయి.

Badrinath Dham:

బద్రీనాథ్​​ ఆలయం సుదీర్ఘ విరామం తర్వాత తిరిగి తెరుచుకుంది. ఆదివారం ఉదయం 6.15 గంటలకు వేద మంత్రాల మధ్య తలుపులు తెరిచారు. తొలి దర్శనం కోసం పెద్ద సంఖ్యలో భక్తులు హాజరయ్యారు. ఉత్తరాఖండ్​లోని పవిత్ర పుణ్యక్షేత్రాల్లో బద్రీనాథ్ ఒకటి.

డోలీ

కుబేరుడి డోలీ శనివారం రాత్రి బామణి గ్రామానికి చేరుకుంది. ఆదివారం ఉదయం 5 గంటలకు బద్రీనాథుడి ఆలయానికి తీసుకొచ్చారు. బద్రీనాథ్​-కేదార్​నాథ్​ ఆలయ కమిటీ అధ్యక్షుడు అజేంద్ర అజయ్​ సహా ప్రముఖులు ఈ కార్యక్రమానికి హాజరయ్యారు. ఆలయాన్ని 15 క్వింటాళ్ల వివిధ రకాల పూలతో అలంకరించారు.

భారీ బందోబస్తు

ఈ కార్యక్రమం కోసం పోలీసులు భారీ బందోబస్తు ఏర్పాటు చేశారు. చార్‌ధామ్ యాత్రలో ఎలాంటి అవాంఛనీయ ఘటనలు జరగకుండా బలగాలను హైఅలర్ట్‌లో ఉంచారు. చమోలీ జిల్లాలో ముగ్గురు కమిషనర్లు, 9 మంది ఇన్‌స్పెక్టర్లు, 26 మంది సబ్‌ ఇన్స్‌పెక్టర్లను ప్రభుత్వం మోహరించింది. వీరితో పాటు ఎస్‌డీఆర్‌ఎఫ్, అగ్నిమాపక సిబ్బంది కూడా ఉన్నారు. ఈ మేరకు చమోలీ ఎస్‌పీ శ్వేత చౌబే పేర్కొన్నారు.

చార్‌ధామ్ యాత్ర

చార్​ధామ్​ యాత్రలో భాగమైన గంగోత్రి, యమునోత్రి ఆలయాలు ఈనెల 3వ తేదీన, కేదార్​నాథ్​ ఆలయం ఈనెల 6వ తేదీనే తెరుచుకున్నాయి. ఉత్తరాఖండ్‌లోని బద్రీనాథ్‌, కేదార్‌నాథ్‌, యమునోత్రి, గంగోత్రిలను కలిపి చార్‌ధామ్‌లుగా పిలుస్తారు. ఈ ఆలయాలు సంవత్సరంలో ఆరు నెలలు మంచుతో మూసుకుపోయి ఉంటాయి. వేసవి నుంచి ఆరు నెలలు మాత్రమే భక్తులు సందర్శించుకునేందుకు వీలుంటుంది.