Crime News: ముంబైకి సమీపంలో జరిగిన ఈ దుర్ఘటన కంటతడి పెట్టిస్తుంది. రెండో పెళ్లి చేసుకున్న తల్లి తన బిడ్డను అనాథశరణాలయంలో ఉంచింది. తనకు అక్కడ ఇష్టంలేదని చెప్పిన బాలుడు ఆత్మహత్య చేసుకున్నాడు. ఆ అబ్బాయి వయసు కేవలం 8ఏళ్లు.
ముంబై సమీపంలోని ఉత్తాన్ ఏరియాలో జరిగిందీ ఘటన. మూడు నెలల క్రితం భయాందర్‌లోని అనాథాశ్రమానికి ఓ బాలుడిని తీసుకొచ్చింది తల్లి. కేరింగ్ హ్యాండ్స్ సేవా కుటీర్‌లో బాలుడిని చేర్పించింది. తనకు అక్కడ ఇష్టం లేదని బాలుడు చెబుతున్నా వినిపించుకోకుండా అక్కడ వదిలేసి వెళ్లిపోయింది.
అనాథాశ్రమంలో బాలుడిని వదిలేసిన ఆ తల్లి రెండో వివాహం చేసుకుంది. అందుకే ఆ బాలుడిని అక్కడ చేర్పించింది. అయినా అప్పుడప్పుడూ వస్తూ బాలుడిని కలుస్తూ ఉండేది. కావాల్సినవి కొని తెచ్చి ఇచ్చేది. తల్లి వచ్చిన ప్రతిసారి కూడా తనకు ఆశ్రమంలో ఇష్టం లేదని మొత్తుకునే వాడు. ఏడ్చేవాడు. అయినా తల్లి వాడి బాధను పట్టించుకోలేదు.
గత నెలలో కూడా బాలుడిని చూడటానికి తల్లి వచ్చింది. మళ్లీ బాలుడు ఏడ్చాడు. నీతో కలిసి ఉండాలని ఉందంటూ మొరపెట్టుకున్నాడు. ఆ తల్లి ఎప్పటి మాదిరిగానే ఆ బుడ్డోడి బాధను పెట్టించుకోలేదు. జాగ్రత్తలు చెప్పి ఆశ్రమంలోనే చిన్నోడిని వదిలేసి వెళ్లిపోయింది.
ఆశ్రమంలో తనను ఒంటరిగా వదిలేసి తల్లి వెళ్లిపోవడంతో ఆ బాలుడు తీవ్ర మనోవేధనకు గురయ్యాడు. తను అంటే తల్లికి ఇష్టం లేదని అనుకొని తీవ్రమైన నిర్ణయం తీసుకున్నాడు. అనాథాశ్రమంలో ఉన్న బావిలోనే దూకి ఆత్మహత్య చేసుకున్నాడు.
సోమవారం రాత్రి అందరూ పడుకున్నారు. బాలుడికి మాత్రం నిద్ర పట్టలేదు. పదే పదే తల్లి గుర్తుకు వచ్చింది. ఉబికి వస్తున్న కన్నీళ్లను దాచుకొని తన ప్రయాణాన్ని ముగించాలని అనుకున్నాడు. అంతే ఆశ్రమంలో ఉన్న బావిలో దూకి చనిపోయాడు.
ఉదయం లేచి చూస్తే బాలుడు కనిపించలేదు. మొత్తం వెతికారు. ఎక్కాడ కనిపించలేదు. ఇంతలో బావిలో శవం కనిపించింది. చూస్తే అది బాలుడి మృతదేహంగా తేలింది. దీంతో పోలీసులకు సమాచారం ఇచ్చారు. కేసు నమోదు చేసుకున్న పోలీసులు విచారణ చేపట్టారు.