అసలే విపరీతమైన వర్షాలు.. వాతావరణ మార్పుల కారణంగా అనేక అనారోగ్యాల సమస్యల బారిన పడుతూ ప్రజలు ఆగమైపోతున్నారు. ఇది చాలదన్నట్లు కరోనా. దేశంలో తాజాగా కరోనా కేసులు పెరుగుతున్నాయనే ఆందోళన ఓ వైపు ఉండగానే మరో భయం దేశ ప్రజలను వెంటాడుతోంది. కొత్తగా జికా వైరస్ కేసు వెలుగు చూసింది. ఈ వార్త విన్న ప్రతీ ఒక్కరూ తీవ్ర ఆందోళనకు గురవుతున్నారు. మహారాష్ట్రలోని పాల్ ఘర్ జిల్లాకు చెందిన ఓ ఏడేళ్ల బాలికకు జికా వైరస్ పాజిటివ్ గా తేలినట్లు ఆ రాష్ట్ర ఆరోగ్య శాఖ అధికారులు తెలిపారు. జిల్లాలోని తలసరి గ్రామంలో ఉన్న గిరిజన రెసిడెన్షియల్ పాఠశాలలో ఆమె చదువుకుంటోందని తెలిపారు.
రాష్ట్రంలో మొట్ట మొదటి సారిగా జికా వైరస్ కేసు గతేడాది పుణెలో నమోదైందని.. రెండో కేస్‌ ఇదేనని వైద్య అధికారులు వెల్లడించారు. రాష్ట్ర ప్రజలంతా చాలా జాగ్రత్తగా ఉండాలని సూచించారు. భారీ వర్షాలు కురుస్తున్నందున.. ఆ తర్వాత దోమలు, ఫంగస్ వంటిసి పెరిగి అనేక రకాల అనారోగ్య సమస్యలు వచ్చే అవకాశం ఉందని తెలిపారు. వీటన్నిటిని తప్పించుకోవాలంటే ప్రజలు చాలా జాగ్రత్తగా ఉండాలని సూచించారు.
జికా వైరస్ అంటే ఏంటి?
జికా వైరస్ ఏడెస్ అనే దోమ నుంచి మనుషులకు ఈ వ్యాధి సోకుతుంది. ప్రాణాంతకం కాకపోయినప్పటికీ... ఇప్పటి వరకు దీనకి మందు కనిపెట్టలేకపోయారు శాస్త్రవేత్తలు. ఈ వైరస్ సోకడం వల్ల కొందరిలో జ్వరం, దద్దుర్లు, తలనొప్పి, ఒళ్లు నొప్పులు వంటి లక్షణాలు కనిపిస్తాయి. పిల్లలకు ఈ జికా వైరస్ సోకినట్లు అయితే వారి ఎదుగుదలపై ప్రభావం పడుతుందని శాస్త్రవేత్తలు చెబుతున్నారు. గర్భిణులకు ఈ వైరస్ సోకితే పుట్టబోయే శిశువు మెదడు సరిగా అభివృద్ధి చెందకుండా ఉండే అవకాశం ఉంటుంది. 1947 ప్రాంతంలో ఈ వైరస్ అడువల్లో ఉండే కోతుల్లో కనిపించింది. ఆ తర్వాత అంటే 1952లో మనుషుల్లోనూ గుర్తించారు. 2017లో తమిళనాడు, అహ్మదబాద్ లలో ఈ కేసులు నమోదైనట్లు తేలింది.
ఈ వైరస్ అంత ప్రమాదకరమా..?
గత మూడేళ్లుగా కరోనాతో ప్రజలు తీవ్ర ఇబ్బందులు ఎదుర్కున్నారు. ఇప్పుడిప్పుడే కరోనా తీవ్రత తగ్గిందని సంబుర పడుతున్నారు. ఈ క్రమంలోనే పాఠషాలలు, కళాశాలల తెరిచి.. అన్ని కార్యకలాపాలను సాగిస్తున్నారు. కానీ కరోనా వైరస్ చాపకింద నీరులా విస్తరిస్తోంది. ఇది చాలదన్నట్లు తాజాగా మహారాష్ట్రలో జికి వైరస్ కేసు వెలుగు చూడడం ప్రజలను తీవ్ర ఆందోళనకు గురి చేస్తోంది.
అయితే దోమ వల్ల జికా వైరస్ సోకుతున్నందును.. ఇంటి పరిసరాలను శుభ్రంగా ఉంచుకోవాలని వైద్య నిపుణులు సూచిస్తున్నారు. ఇంట్లో, ఇంటి బయట దోమలు నిల్వకుండా తరచుగా పరిసరాలను శుభ్రం చేసుకోవాలని వివరిస్తున్నారు. ఏదైనా జ్వరం, దద్దుర్లు వంటివి వస్తే వెంటనే వైద్యులను సంప్రదించాలని సూచిస్తున్నారు. ఏం కాదులే అని ఇంట్లోనే ఉంటే అనేక రకాల సమస్యలు ఎదుర్కోవాల్సి వస్తుందని హెచ్చరిస్తున్నారు. దోమలను దరి చేరనీయకుండా మీరు తీసుకునే జాగ్రత్తలే మీకు జికా వైరస్ సోకకుండా చేస్తుందని చెబుతున్నారు. ఏది ఏమైనప్పటికీ ప్రజలు చాలా జాగ్రత్తగా ఉండాల్సిందే. అసలే వర్షాకాలం ఆపై వ్యాధులు, కొత్త కొత్త వైరస్ లు.. జాగ్రత్త సుమీ!