Weight Loss Tips : చాలామంది బరువు తగ్గాలని అనుకుంటారు. దానికోసం జిమ్ మెంబర్షిప్ తీసుకుని.. డైట్ చార్ట్ ఫాలో అవుతారు. సప్లిమెంట్లు కూడా తీసుకుంటారు. కానీ వాటిని ఎక్కువరోజులు ఫాలో అవ్వలేక రెండు, మూడు వారాలు గడవకముందే అన్నీ వదిలేస్తారు. ఎందుకంటే బరువు తగ్గాలనే కోరికతో ఒకేసారి చాలా మార్పులు తీసుకురావాలని ట్రై చేస్తారు. దీనివల్ల మానసికంగా అలసిపోయి.. ఫైనల్గా నా వల్ల కాదు అని ఆగిపోతారు.
కానీ నిరజ్ ఝా అనే 52 ఏళ్ల వ్యక్తి.. ఒక్క చిన్న అలవాటుతో రెండేళ్లలో 65 కిలోలు బరువు తగ్గించుకున్నాడు. అతను చెప్పిన సీక్రెట్ చాలా సింపుల్గా ఉన్నా.. రోజూ అది ఫాలో అవ్వడం వల్లే అతను తన బరువు తగ్గినట్లు తెలిపారు. ఇంతకీ అతను రెండు సంవత్సరాలు ఫాలో అయినా ఏకైక అలవాటు ఏంటి? నిపుణులు ఏమి చెప్తున్నారో చూసేద్దాం.
144 కిలోల బరువు
నిరజ్ ఒక పెద్ద కంపెనీ వ్యవస్థాపకుడు. పని ఒత్తిడిలో ఆరోగ్యాన్ని పూర్తిగా మర్చిపోవడంతో.. క్రమంగా బరువు పెరిగాడు. చివరకు 144 కిలోలకు చేరుకున్నాడు. దీంతో నిద్ర సరిగా పట్టేది కాదని.. శ్వాస తీసుకోవడం కూడా కష్టంగా అనిపించేదని తెలిపాడు. దీంతో అద్దంలో చూసుకోవడం మానేశాడట. బయటకు వెళ్తే.. ఎవరైనా ఏమైనా అంటారని.. తనకు తాను సిగ్గుగా అనిపించి వెళ్లడం మానేశాడట.
2023లో అతనికి తీవ్రమైన శ్వాసకోశ ఇన్ఫెక్షన్ వచ్చి ICUలో చేరాల్సి వచ్చింది. అక్కడ డాక్టర్లు BiPAP మిషన్ సహాయంతో శ్వాసను అందించారు. ఆ రాత్రి మొదటిసారి సరిగ్గా నిద్రపోయాడు. ఆ నిద్ర అతనికి కళ్లు తెరిపించిందని తెలిపారు నీరజ్. ఇన్ని సంవత్సరాలు నేను అలసిపోయాను అనుకున్నాను. కానీ నిజానికి నేను శ్వాస సరిగ్గా తీసుకోలేకపోయాను అని అనుకున్నాడట. ఆ క్షణంలో నిరజ్ ఓ నిర్ణయం తీసుకున్నాడు. అదే తను మారాలి అని.
ఒకే ఒక్క అలవాటు..
జిమ్ లేదు. పర్సనల్ ట్రైనర్ లేదు. సప్లిమెంట్లు లేవు. శస్త్రచికిత్స లేదు. అలా మొదటి రోజు నీరజ్ కేవలం 8 నిమిషాలు నడిచాడు. అదే అతను చేయగలిగిన వ్యాయామం అనుకున్నాడు. దీంతో ఆ ఒక్క పనిని కరెక్ట్గా చేయాలి అనుకున్నాడు. దీంతో ప్రతిరోజూ నడిచేవాడు. ఏ రోజు మానలేదు. నడవాలి అనిపించినా.. అనిపించకపోయినా.. అలసిపోయినా.. పని ఒత్తిడి ఉన్నా.. రోజూ 8 నిమిషాలు నడిచాడట. ఇలా రోజులు గడిచేకొద్దీ ఆ 8 నిమిషాలు 10 అయ్యాయి.. 15గా మారాయి. చివరకు గంటకు చేరుకున్నాయి. తర్వాత వారానికి మూడుసార్లు 20-25 నిమిషాల స్ట్రెంత్ ట్రెయినింగ్ స్టార్ట్ చేశాడట నీరజ్.
ఎలా పని చేస్తుందంటే..
ఒక్క అలవాటు ఎలా పనిచేస్తుందంటే.. మన మెదడు పెద్ద మార్పులను చూసి భయపడుతుంది. కానీ ఒక్క మార్పు పెద్దగా ఎఫెక్ట్ చేయదు. నెలలో 10 కిలోలు తగ్గాలి అనే లక్ష్యం మనల్ని మొదటి రోజే అలసిపోయేలా చేస్తుంది. కానీ ఈ రోజు 8 నిమిషాలు నడవాలి అంటే ఇది చిన్న పనే చేయగలం అనిపిస్తుంది.
కాబట్టి ఈ పనిని రోజూ చేయడం వల్ల మీకు మోటీవేషన్ పెరుగుతుంది. ఆత్మవిశ్వాసంతో ముందుకు వెళ్తారు. మరిన్ని మంచి అలవాట్లు దానితో పాటు యాడ్ అవుతూ ఉంటాయి. మెల్లిగా డైట్ కూడా మారుతుంది. జంక్ ఫుడ్ తగ్గుతుంది. నిద్ర మెరుగవుతుంది. శరీరం తనంతట తాను మారడం మొదలుపెడుతుంది. కాబట్టి చిన్న అలవాట్లను ఎప్పుడూ తక్కువ అంచనా వేయకండి.
గమనిక : ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.