Tips to Manage Diabetes Naturally : డయాబెటిస్ అనేది దీర్ఘకాలిక ఆరోగ్య సమస్య. దీనిని నియంత్రించడానికి కేవలం మందులు మాత్రమే సరిపోవని.. ఆరోగ్యకరమైన జీవనశైలి కూడా అంతే ముఖ్యమని వైద్యులు చెబుతున్నారు. కొన్ని అలవాట్లు రక్తంలో చక్కెర స్థాయిలను నియంత్రించడంలో సహాయపడతాయి. అయితే అవి వైద్యులు సూచించిన మందులకు ప్రత్యామ్నాయం కాదని నిపుణులు స్పష్టం చేస్తున్నారు. మరి మధుమేహం ఉన్నవారు లైఫ్స్టైల్లో చేయాల్సిన మార్పులు ఏంటో ఇప్పుడు తెలుసుకుందాం.
"డయాబెటిస్ నియంత్రణలో మందులు కీలక పాత్ర పోషిస్తాయి. అయితే వాటితో పాటు ఆరోగ్యకరమైన జీవనశైలిని పాటించినప్పుడే మంచి ఫలితాలు కనిపిస్తాయి. సహజ చిట్కాలను మందులకు ప్రత్యామ్నాయంగా కాకుండా.. వైద్యుల సూచించిన చికిత్సలో భాగంగా మాత్రమే చూడాలి." అని హైదరాబాద్ యశోద హాస్పిటల్స్లో సీనియర్ కన్సల్టెంట్ ఫిజీషియన్గా చేస్తోన్నడాక్టర్ దిలీప్ గూడె సూచించారు.
Also Read : మధుమేహం(Type 2 Diabetes) ఉన్నవారికి డెంగ్యూ వస్తే ప్రమాదమా? ఈ లక్షణాలను అస్సలు నిర్లక్ష్యం చేయకండి
సమతుల్య ఆహారం
డయాబెటిస్ ఉన్నవారు రోజువారీ ఆహారంలో తృణధాన్యాలు, ఆకుకూరలు, కూరగాయలు, పప్పుధాన్యాలు, తక్కువ కొవ్వు ఉన్న ప్రోటీన్ ఆహారాలు, నట్స్, ఆరోగ్యకరమైన కొవ్వులు ఉండేలా చూసుకోవాలని నిపుణులు సూచిస్తున్నారు. చక్కెర ఎక్కువగా ఉండే డ్రింక్స్, స్వీట్లు, మైదాతో చేసిన పదార్థాలు, అధికంగా ప్రాసెస్ చేసిన ఆహారాలను వీలైనంత వరకు తగ్గించాలని సూచిస్తున్నారు.
వ్యాయామం
వారానికి కనీసం 150 నిమిషాల పాటు మోస్తరు స్థాయి శారీరక వ్యాయామం చేయాలని నిపుణులు సూచిస్తున్నారు. రోజుకు 30 నిమిషాల పాటు వేగంగా నడవడం వంటి సాధారణ వ్యాయామం కూడా ఇన్సులిన్ సున్నితత్వాన్ని మెరుగుపరచి రక్తంలో చక్కెర స్థాయిలను నియంత్రించడంలో సహాయపడుతుంది.
బరువు నియంత్రణ
అధిక బరువు ఉన్నవారు శరీర బరువులో 5 నుంచి 10 శాతం తగ్గినా రక్తంలో చక్కెర నియంత్రణ మెరుగుపడే అవకాశం ఉంటుంది. అందుకే సమతుల్య ఆహారం, వ్యాయామంతో బరువును నియంత్రణలో ఉంచుకోవడం అవసరం.
Also Read : మధుమేహం, బీపీ, గుండె సమస్యలున్నవారికి 5 బెస్ట్ వ్యాయామాలు ఇవే.. నిపుణుల సూచనలతో
నాణ్యమైన నిద్ర
ప్రతిరోజూ తగినంత సమయం నిద్రపోవడం చాలా ముఖ్యం. నిద్ర సరిగా లేకపోవడం లేదా ప్రతిరోజూ వేర్వేరు సమయాల్లో నిద్రపోవడం వల్ల ఇన్సులిన్ నిరోధకత పెరిగి రక్తంలో చక్కెర స్థాయిలు ప్రభావితమయ్యే అవకాశం ఉంటుంది.
ఒత్తిడి తగ్గించుకోండి
దీర్ఘకాలిక ఒత్తిడి కూడా రక్తంలో చక్కెర స్థాయిలను పెంచే అవకాశం ఉంది. యోగా, ధ్యానం, లోతైన శ్వాస వ్యాయామాలు లేదా మీకు నచ్చిన రిలాక్సేషన్ పద్ధతులను పాటించడం ద్వారా ఒత్తిడి దూరం చేసుకోవచ్చని డాక్టర్ దిలీప్ సూచించారు.
తగినంత హైడ్రేషన్
రోజంతా తగినంత నీరు తాగడం వల్ల శరీరం సక్రమంగా పనిచేయడంలో సహాయపడుతుంది. అధిక రక్తంలో చక్కెర వల్ల వచ్చే డీహైడ్రేషన్ ప్రమాదాన్ని కూడా తగ్గించుకోవచ్చని చెప్తున్నారు.
Also Read : ప్రీ-డయాబెటిస్ ఉందా? ఈ ఫుడ్స్ మానేసి.. ఇవి తింటే మధుమేహం రాదట, ఫాలో అయిపోండి
రెగ్యూలర్ టెస్ట్
ఇంట్లో గ్లూకోమీటర్తో రక్తంలో చక్కెర స్థాయిలను అవసరమైనప్పుడు టెస్ట్ చేసుకోవాలి. అలాగే వైద్యుల సూచన మేరకు నిర్దిష్ట వ్యవధిలో HbA1c పరీక్ష చేయించుకోవడం ద్వారా గత రెండు నుంచి మూడు నెలల సగటు చక్కెర స్థాయిలను అంచనా వేసుకోవచ్చు.
వీటిని ఫాలో అవ్వడమే కాకుండా.. వైద్యుల సలహా లేకుండా డయాబెటిస్ మందులు తగ్గించడం లేదా పూర్తిగా ఆపేయడం మంచిది కాదు. అలాగే మూలికల మందులు లేదా సప్లిమెంట్లు వైద్యుల సలహా లేకుండా వాడకూడదు. సరైన సమయంలో మందులు తీసుకోవడం, ఆరోగ్యకరమైన ఆహారం, వ్యాయామం, రక్తంలో చక్కెర పరీక్షలు, వైద్యుల పర్యవేక్షణ కచ్చితంగా ఉండేలా చూసుకోవాలి. ఇవన్నీ కలిసి గుండె, కిడ్నీలు, కళ్లూ, నరాలపై వచ్చే దీర్ఘకాలిక సమస్యల ప్రమాదాన్ని ఇవి తగ్గిస్తాయని డాక్టర్ దిలీప్ తెలిపారు.
మధుమేహం గురించిన మరిన్ని ఇంట్రెస్టింగ్ వార్తల కోసం దీనిని క్లిక్ చేయండి.
గమనిక : ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.