Foods to Eat For Breastfeeding Diet : బిడ్డకు తల్లిపాలు ఇస్తున్న సమయంలో తల్లి తీసుకునే ఆహారం చాలా ముఖ్యమని చెప్తున్నారు వైద్యులు. ఈ సమయంలో శరీరానికి అదనపు శక్తి, ప్రోటీన్, విటమిన్లు, ఖనిజాలు అవసరమవుతాయి. అయితే ఇద్దరికీ సరిపడా తినాలి అనే మాట పట్టుకుని ఎక్కువగా తినాల్సిన అవసరం లేదని చెప్తున్నారు. తల్లి ఆరోగ్యానికి, పాలిచ్చే ప్రక్రియకు అవసరమైన పోషకాలు అందేలా సమతుల్య ఆహారం తీసుకోవడం ముఖ్యమంటూ ఫుడ్ విషయంలో పలు సూచనలు ఇస్తున్నారు.
తల్లిపాలు ఇచ్చే సమయంలో బిడ్డకు కూడా సరిపోవాలని పోషకాలు ఎలా తీసుకుంటారో.. అలాగే కొన్ని ఫుడ్స్ మీ డైట్ నుంచి దూరం చేయాలి. అలా అని డైట్ నుంచి కొన్ని పూర్తిగా తొలగించడం కూడా సరైన పద్ధతి కాదని చెప్తున్నారు. ఇంతకీ బిడ్డకి పాలు ఇచ్చే తల్లి ఎలాంటి ఫుడ్ తీసుకోవాలో.. ఏ ఫుడ్స్ దూరంగా ఉంచడం మంచిదో ఇప్పుడు తెలసుకుందాం.
Also Read : బిడ్డకు తల్లిపాలు ఎందుకు ముఖ్యం? పుట్టిన గంటలోపే ఎందుకు ఇవ్వాలి? లాభాలు, పోషకాలు ఇవే
పాలు ఇచ్చే తల్లులు డైట్లో చేర్చుకోవాల్సిన ఫుడ్స్
తల్లిపాలు ఇస్తోన్న సమయంలో పప్పులు, కందులు, శనగలు, రాజ్మా, గుడ్లు, చేపలు, చికెన్, పెరుగు, పాలు వంటి ప్రోటీన్ ఫుడ్స్ సమతుల్య ఆహారంలో చేర్చుకోవాలి. వీటి ద్వారా వచ్చే ప్రోటీన్ శరీర కణజాలాల మరమ్మతు, కండరాల ఆరోగ్యానికి తోడ్పడుతుంది. అలాగే పాలకూర, మెంతికూర వంటి ఆకుకూరలతో పాటు క్యారెట్, బీట్రూట్, సొరకాయ, బీరకాయ, క్యాప్సికం వంటి వివిధ రకాల కూరగాయలను ఆహారంలో చేర్చుకోవాలి. ఇవి విటమిన్లు, ఖనిజాలు, ఫైబర్ అందిస్తాయి.
ఆపిల్, అరటి, నారింజ, బొప్పాయి, జామ, దానిమ్మ వంటి పండ్లను రోజువారీ ఆహారంలో చేర్చుకోవచ్చు. పండ్ల ద్వారా ఫైబర్, విటమిన్లు, ఖనిజాలు తల్లికి.. అమ్మ నుంచి పిల్లలకు పాలు ద్వారా లభిస్తాయి. బ్రౌన్ రైస్, ఓట్స్, రాగి, జొన్నలు, సజ్జలు, గోధుమ వంటివి శక్తిని అందించడంతో పాటు ఫైబర్ను కూడా అందిస్తాయి. నట్స్, విత్తనాలు, అవకాడో, చేపలు వంటి ఆహారాల్లో ఉండే హెల్తీ ఫ్యాట్స్ కూడా మేలు చేస్తాయి. తగినంత నీరు, సూప్లు, మజ్జిగ వంటి డ్రింక్స్ కూడా తీసుకోవచ్చు.
Also Read : వర్షాకాలంలో పిల్లల ఇమ్యూనిటీని పెంచే ఆహారాలు ఇవే.. ఆరోగ్యంగా ఉండాలంటే తప్పకుండా కిడ్స్ డైట్లో చేర్చండి
ఏ ఆహారాలను తగ్గిస్తే మంచిదంటే..
కేకులు, స్వీట్లు, కుకీలు, చాక్లెట్లు, చక్కెర ఎక్కువగా ఉండే డ్రింక్స్ ఎక్కువగా తీసుకోకుండా పరిమితం చేయడం మంచిది. ఇవి ఎక్కువ క్యాలరీలు అందించినా వాటిలో అవసరమైన పోషకాలు తక్కువగా ఉంటాయి. చిప్స్, ఫ్రెంచ్ ఫ్రైస్, ప్యాకెట్ స్నాక్స్, ఫాస్ట్ ఫుడ్ వంటి వాటిలో ఉప్పు, చక్కెర, అనారోగ్యకరమైన కొవ్వులు ఎక్కువగా ఉండే అవకాశం ఉంది. కాఫీ, టీ, ఎనర్జీ డ్రింక్స్, కొన్ని శీతల పానీయాల్లో కెఫీన్ ఉంటుంది. అధికంగా బిడ్డకు చిరాకుగా ఉండి.. నిద్రకు ఇబ్బంది కలిగే అవకాశం ఉంది.
డైట్ నుంచి పూర్తిగా మానేయాల్సిన ఫుడ్స్..
తల్లిపాలు ఇస్తున్న సమయంలో కొన్ని ఆహారాలు బిడ్డకు గ్యాస్ లేదా అలర్జీ కలిగిస్తాయని భావించి చాలామంది తల్లులు పాలు, పెరుగు, పప్పులు, కూరగాయలు వంటి అనేక ఆహారాలను స్వయంగా మానేస్తారు. అలా చేయడం వల్ల తల్లికి అవసరమైన పోషకాలు తగ్గే అవకాశం ఉంది. కాబట్టి తల్లి ఏ ఆహారాన్ని అయినా తగిన మోతాదులో తీసుకోవచ్చు. బేబికి దద్దుర్లు, వాంతులు, విరేచనాలు, రక్తంతో కూడిన మలం, తీవ్రమైన చిరాకు వంటి లక్షణాలు కనిపిస్తే మాత్రం పిల్లల వైద్యుడిని సంప్రదించాలి.
Also Read : పిల్లల్లో ఆస్తమాకు కారణాలు, లక్షణాలు ఇవే.. ఇన్హేలర్ ఉపయోగిస్తే మంచిదా? కాదా? వైద్యుల సూచనలివే
అతిగా తినడం మాత్రం వద్దు..
తల్లిపాలు ఇవ్వడానికి అదనపు శక్తి అవసరమైనప్పటికీ.. దాని అర్థం అవసరానికి మించి తినాలని కాదని సూచిస్తున్నారు నిపుణులు. ఎక్కువ క్యాలరీలు తీసుకోవడం వల్ల ప్రసవం తర్వాత బరువు తగ్గడం కష్టమవుతుందని అంటున్నారు. బదులుగా రోజులో మూడు మీల్స్ చేస్తూ.. పోషకాలతో కూడిన హెల్తీ స్నాక్స్ తీసుకోవడం మంచిదని చెప్తున్నారు.
పిల్లల ఆరోగ్యం, హెల్త్ టిప్స్ గురించిన ఇంట్రెస్టింగ్ వార్తల కోసం దీనిని క్లిక్ చేయండి.
గమనిక : ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.