Beetroot and Kidney Health : బీట్రూట్ ఆరోగ్యానికి మంచిది. ఇందులో ఐరన్, ఫోలేట్, యాంటీ ఆక్సిడెంట్లు, నైట్రేట్స్ వంటి పోషకాలు ఉంటాయి. ఇవి రక్తప్రసరణ మెరుగుపడటానికి, శరీరానికి ఎనర్జీ అందించడానికి సహాయం చేస్తాయి. కానీ ఇది హెల్తీ ఫుడ్ కాబట్టి ఎంతైనా తినొచ్చు అనుకోవడం తప్పు అని చెప్తున్నారు ఆరోగ్య నిపుణులు. ముఖ్యంగా కిడ్నీ సమస్యలు ఉన్నవారు బీట్రూట్ విషయంలో కొన్ని జాగ్రత్తలు తీసుకోవాలని సూచిస్తున్నారు.
బీట్రూట్లోని కొన్ని పదార్థాలు కిడ్నీలపై అదనపు ఒత్తిడి పెంచే అవకాశం ఉందని వైద్యులు అంటున్నారు. ఇంతకీ కిడ్నీ సమస్యలు ఉన్నవారు బీట్రూట్ తినొచ్చా? బీట్రూట్ తింటే కలిగే లాభాలు, నష్టాలు ఏంటి? ఎలా తీసుకుంటే ఆరోగ్యానికి మంచిదో ఇప్పుడు తెలుసుకుందాం.
బీట్రూట్ వల్ల కలిగే లాభాలు
బీట్రూట్లో ఉండే నైట్రేట్స్.. రక్తనాళాలు రిలాక్స్ అవ్వడంలో సహాయపడతాయి. దీంతో రక్తప్రసరణ మెరుగుపడే అవకాశం ఉంటుంది. అలాగే వీటిని తినడం వల్ల శరీరానికి తక్షణ ఎనర్జీ అందుతుందని పలు అధ్యయనాలు సూచిస్తున్నాయి. అందుకే చాలామంది జ్యూస్ రూపంలో వీటిని తీసుకుంటుంటారు. వీటిలోని యాంటీ ఆక్సిడెంట్లు శరీరంలో ఆక్సిడేటివ్ స్ట్రెస్ తగ్గించడంలో సహాయపడతాయి. బీట్రూట్లో ఫైబర్ ఉండటం వల్ల మలబద్ధకం తగ్గిస్తుంది.
కిడ్నీ సమస్యలుంటే జాగ్రత్త.. ఎందుకంటే
ఇన్ని ఆరోగ్య ప్రయోజనాలు ఉన్నా.. కిడ్నీ సమస్యలు ఉన్నవారు వీటి విషయంలో జాగ్రత్త తీసుకోవాలని నిపుణలు చెప్తున్నారు. ఎందుకంటే బీట్రూట్లో ఆక్సలేట్స్ ఎక్కువగా ఉంటాయి. ఇవి కొందరిలో కిడ్నీ స్టోన్స్ ప్రమాదాన్ని పెంచే అవకాశం ఉంటుంది. కాబట్టి ఇప్పటికే స్టోన్స్ హిస్టరీ ఉన్నవారు జాగ్రత్తగా ఉండాలి. అలాగే జ్యూస్ రూపంలో బీట్రూట్ తీసుకుంటే ఆక్సలేట్స్, షుగర్ పరిమాణం ఎక్కువగా శరీరానికి అందే అవకాశం ఉంటుంది. కాబట్టి జ్యూస్గా తీసుకోకపోవడమే బెటర్. లేకుంటే తక్కువ మోతాదులో తీసుకోవడం మంచిది.
కిడ్నీలు సరిగా పనిచేయకపోతే శరీరంలో పొటాషియం లెవెల్స్ పెరగొచ్చు. బీట్రూట్లో కూడా పొటాషియం ఉంటుంది. కాబట్టి తీవ్రమైన కిడ్నీ వ్యాధులు ఉన్నవారు పరిమితంగా తీసుకోవాలని సూచిస్తున్నారు. అయితే కిడ్నీ సమస్య ఉంది కాబట్టి బీట్రూట్ పూర్తిగా మానేయాలని రూల్ కూడా లేదని.. కిడ్నీ సమస్య, రకం, దశ, రిపోర్ట్స్ ఆధారంగా డాక్టర్లు సూచించిన డైట్ ఫాలో అవ్వాలని చెప్తున్నారు.
మూత్రం రంగు మారుతుందా?
బీట్రూట్ తిన్న తర్వాత కొందరిలో మూత్రం లేదా మలం ఎరుపు రంగులో కనిపించొచ్చు. ఇది హానికరం కాదు. కానీ నిరంతరం ఇలా ఉంటే వైద్యులను సంప్రదించడం మంచిది.
వైద్యుల సలహా
కిడ్నీ వ్యాధి, డయాలసిస్, కిడ్నీ స్టోన్స్ లేదా ఇతర ఆరోగ్య సమస్యలు ఉన్నవారు బీట్రూట్ను రెగ్యులర్గా తీసుకునే ముందు వైద్యుల లేదా డైటీషియన్ సలహా తీసుకోవాలి. ఆరోగ్యానికి మంచిది అని ఎలాంటి సూచనలు లేకుండా ఎక్కువ మోతాదులో తీసుకోవడం ఆరోగ్యానికి మంచిది కాదు.
కిడ్నీల ఆరోగ్యానికి సంబంధిన విషయాల కోసం ఇక్కడ క్లిక్ చేయండి.
గమనిక : ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.