వయసుకు, గుండె జబ్బులకు ఇప్పుడు సంబంధం లేదు. ఇరవై ఏళ్ల కుర్రాళ్లకు కూడా గుండె జబ్బులు వస్తున్నాయి. అందుకే ప్రతి ఒక్కరు గుండె ఆరోగ్యం గురించి ప్రత్యేక శ్రద్ధ తీసుకోవాలి. గుండె ఆరోగ్యం కోసం ప్రతిరోజూ కింద చెప్పిన అయిదు ఆహారాల్లో కనీసం ఒకటైన తినేందుకు ప్రయత్నించండి. అన్నీ తినగలిగితే మరీ మంచిది.
నారింజ
నారింజ పండ్లు ఎంతో ఆరోగ్యకరమైనవి ముఖ్యంగా గుండెకు చాలా మంచివి. వీటిలో పొటాషియం, ఎలక్ట్రోలైట్లు అధికంగా ఉంటాయి. ఇవి గుండె ఆరోగ్యాన్ని కాపాడతాయి. ఇందులో విటమిన్ సి కూడా పుష్కలంగా లభిస్తుంది. సిట్రస్ పండ్లు గుండెకు మంచివి.
అవకాడో
ఈ పండ్లు మన దేశంలో పండవు. కానీ అన్ని సూపర్ మార్కెట్లలో విరివిగా దొరుకుతాయి. వీటిలో విటమిన్ ఇ పుష్కలంగా లభిస్తుంది. ఈ పండును రోజూ తినడం వల్ల గుండెకు చాలా మంచిది. ఈ పండు తినడం వల్ల శరీరంలో మంచి కొలెస్ట్రాల్ పెరిగి, చెడు కొలెస్ట్రాల్ తగ్గుతుంది. దీని వల్ల గుండె పోటు వచ్చే అవకాశం చాలా వరకు తగ్గుతుంది.
ఓట్స్
ఆరోగ్యకరమైన అల్పాహారాల్లో ఓట్స్ ముందుంటుంది. ఓట్స్ రోజూ తినడం వల్ల రక్తంలో కొలెస్ట్రాల్ నియంత్రణలో ఉంటుంది. ఓట్స్ లో ఫైబర్, యాంటీ ఆక్సిడెంట్లు పుష్కలంగా ఉంటాయి. అలాగే ఒమెగా 3 ఫ్యాటీ ఆమ్లాలు ఉంటాయి. అందుకే రోజూ ఓట్స్ తినమని సూచిస్తున్నారు వైద్యులు.
వాల్‌నట్స్
ఇవి కొంచెం ఖరీదైనవే. కానీ గుండె ఆరోగ్యం కోసం తినక తప్పదు. రోజుకు కనీసం రెండు తిన్నా చాలు. వీటిలోను ఒమెగా ఫ్యాటీ ఆమ్లాలు ఉంటాయి. గుండె సంబంధిత సమస్యలు రాకుండా అడ్డుకుంటాయి. ఇవి మెదడుకు కూడా ఎంతో మేలు చేస్తాయి. మానసిక సమస్యలు దూరం అవుతాయి.
వేరుశెనగ పలుకులు
పల్లీలుగా పిలుచుకునే వీటిని రోజుకు గుప్పెడు తింటే చాలు ఎంతో మంచిది. వీటిలో ప్రొటీన్లు పుష్కలంగా ఉంవటాయి. వీటిలో అనేక అత్యవసర ఖనిజాలు కూడా ఉంటాయి. అవన్నీ గుండె ఆరోగ్యాన్ని కాపాడతాయి. రోజులో ఏదో ఒక సమయంలో గుప్పెడు పల్లీలను తొక్కతో పాటూ తినాలి.
Also read: కార్డియాక్ అరెస్ట్ రావడానికి, కోవిడ్ వ్యాక్సిన్‌కు సంబంధం ఉందా? వైద్య నిపుణులు ఏం చెబుతున్నారు?
గమనిక: పలు అధ్యయనాలు, పరిశోధనలు, హెల్త్ జర్నల్స్ నుంచి సేకరించిన సమాచారాన్ని మీ అవగాహన కోసం ఇక్కడ యథావిధిగా అందించాం. ఈ సమాచారం వైద్యానికి లేదా చికిత్సకు ప్రత్యామ్నాయం కాదు. ఆరోగ్యానికి సంబంధించి.. ఎలాంటి సందేహాలున్నా మీరు తప్పకుండా డాక్టర్‌ను సంప్రదించాలి. ఈ ఆర్టికల్‌లో పేర్కొన్న అంశాలకు ‘ఏబీపీ దేశం’, ‘ఏబీపీ నెట్‌వర్క్’ ఎటువంటి బాధ్యత వహించవని గమనించగలరు.