Covid New Variant: 'దేవుడా.. ఓ మంచి దేవుడా.. దయచేసి కొత్త వేరియంట్‌ను నా రాష్ట్రానికి రానివ్వకు'

దక్షిణాఫ్రికాలో వెలుగుచూసిన కరోనా కొత్త వేరియంట్‌, థర్డ్ వేవ్‌పై మధ్యప్రదేశ్ ఆరోగ్య మంత్రి ఆసక్తికర వ్యాఖ్యలు చేశారు.

కరోనా థర్డ్ వేవ్ గురించి మధ్యప్రదేశ్ ఆరోగ్య మంత్రి ప్రభురామ్ చౌదరీ ఆసక్తికర వ్యాఖ్యలు చేశారు. రాష్ట్రంలోకి కరోనా థర్డ్ వేవ్ రాకుండా చూడాలని తాను ప్రతి రోజు ఉదయాన్నే లేచి దేవుడిని ప్రార్థిస్తున్నట్లు ప్రభురామ్ అన్నారు. రాష్ట్ర ప్రజలు ఆరోగ్యంగా ఉండాలని పూజలు చేస్తునట్లు రాజ్‌గఢ్ జిల్లా ఆసుపత్రిలో జరిగిన ఓ కార్యక్రమంలో పేర్కొన్నారు. 

రాజ్‌గఢ్‌లోని ఓ ఆసుపత్రిలో కొత్తగా ఏర్పాటు చేసిన సీటీ స్కాన్ మిషిన్‌ను ప్రారంభించేందుకు ఆయన అతిథిగా వచ్చారు. ఆ కార్యక్రమంలో ప్రసంగించిన మంత్రి కరోనా కొత్త వేరియంట్‌పై కూడా మాట్లాడారు. 

మీ అందరికీ తెలిసే ఉంటుంది. దక్షిణాఫ్రికాలో కరోనా కొత్త వేరియంట్ బయటకి వచ్చింది. కరోనా కట్టడికి తాము శక్తి మేర ప్రయత్నిస్తున్నామని ఎంతో మంది ఉద్యోగులు నాతో అంటున్నారు. మధ్యప్రదేశ్‌లో కరోనా కంట్రోల్‌లో ఉంది. కానీ మనం చాలా చోట్ల కొవిడ్ ఆసుపత్రులు కట్టిస్తున్నాం. భోపాల్, బుధిని, మండీదీప్, మండ్లా, బినా ప్రాంతాల్లో మనం కరోనా ఆసుపత్రులు కట్టించాం. మన రాష్ట్రంలో కరోనా థర్డ్ వేవ్ రాకూడదని, ప్రజలెవరికీ కరోనా సోకకూడదని నేను రోజూ ఉదయాన్నే లేచి దేవుడ్ని కోరుకుంటున్నాను. రాత్రింబవళ్లు శ్రమించి కరోనా కట్టడి కోసం ఎంతో కృషి చేశాం. ఆక్సిజన్ లేకపోతే ఆసుపత్రులకు ఎక్కడి నుంచి తీసుకువస్తాం.                                                -   ప్రభురామ్ చౌదరీ, మధ్యప్రదేశ్ ఆరోగ్య మంత్రి

దక్షిణాఫ్రికాలో వెలుగుచూసిన కరోనా కొత్త వేరియంట్‌పై ప్రపంచ దేశాలు ఆందోళన వ్యక్తం చేస్తున్నాయి. ఇప్పటికే భారత్ సహా పలు దేశాలు ప్రజలను అప్రమత్తం చేశాయి. కొవిడ్ నిబంధనలను పక్కాగా అమలు చేయాలని కేంద్రం.. రాష్ట్ర ప్రభుత్వాలకు ఆదేశాలు జారీ చేసింది.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి