సినిమా హీరోలు, హీరోయిన్ల మీద ప్రేక్షకులు తమ అభిమానాన్ని పలు రకాలుగా చూపిస్తూ ఉంటారు. అందులో పచ్చబొట్టు వేయించుకోవడం ఒకటి. ఫేవరెట్ హీరో లేదా హీరోయిన్ పేరు టాటూలు వేయించుకున్న ఫ్యాన్స్ కొంత మంది ఉన్నారు. ఆ జాబితాలో బుల్లితెర కమెడియన్ కిరాక్ ఆర్పీ కూడా చేరారు. ఆయన అభిమాన హీరో నాగబాబు.
'స్టార్ మా' ఛానల్‌లో ఈ ఆదివారం (జూలై 3న) మధ్యాహ్నం 12 గంటలకు 'పార్టీ చేద్దాం పుష్ప' ప్రోగ్రామ్ టెలికాస్ట్ కానుంది. రీసెంట్‌గా ప్రోమో విడుదల చేశారు. ఆ ప్రోమో చివర్లో నాగబాబు పేరును గుండెల మీద 'కిరాక్' ఆర్పీ పచ్చబొట్టు వేయించుకున్న సంగతిని 'సుడిగాలి' సుధీర్ చెప్పారు.
''ఆర్పీ ఎవరినైనా ప్రేమిస్తే ఎంత పిచ్చిగా ప్రేమిస్తాడు అనేది చెప్పడానికి ఇదొక ఉదాహరణ. (నాగబాబుతో...) మీరు కూడా ఊహించలేరు. మీ పేరు వాడి గుండెలపై పచ్చబొట్టు వేయించుకున్నాడు'' అని సుధీర్ వెల్లడించారు. ''నాకు ఎప్పుడూ చెప్పలేదు'' అంటూ నాగబాబు ఆశ్చర్యానికి లోనయ్యారు. ఆయనతో పాటు అక్కడ ఉన్న ఆర్టిస్టులు కూడా!
'కిరాక్' ఆర్పీ నాకు ఎంతో స్పెషల్ అని ప్రోమో విడుదలైన సందర్భంగా నాగబాబు సోషల్ మీడియాలో పేర్కొన్నారు. ఎమోషనల్ అయ్యానని చెప్పారు. ''ఒక్కటే మాట చెబుతున్నా... ఎవరైనా గుర్తు పెట్టుకోండి! మనమంతా నాగబాబు గారి నవ్వు లోంచి పుట్టిన వాళ్ళమే'' అని కార్యక్రమంలోని తోటి ఆర్టిస్టులను ఉద్దేశించి 'కిరాక్' ఆర్పీ అన్నారు.
Also Read : బ్రేకింగ్ న్యూస్ - హీరోయిన్ మీనా భర్త మృతి
బుల్లితెరలో కమెడియన్‌గా 'కిరాక్' ఆర్పీకి 'జబర్దస్త్' కార్యక్రమం గుర్తింపు తెచ్చింది. ఆ సమయంలో నాగబాబు జడ్జ్‌గా వ్యవహరించేవారు. ఆ షో నుంచి నాగబాబు బయటకు వచ్చిన తర్వాత 'కిరాక్ ' ఆర్పీ కూడా వచ్చేశారు. నాగబాబు వెంట నడిచారు. ఇప్పుడు 'స్టార్ మా'కు వచ్చారు. ఇటీవల 'కిరాక్' ఆర్పీ నిశ్చితార్థం జరిగింది. తనకు కాబోయే భార్యను కార్యక్రమానికి తీసుకొచ్చిన 'కిరాక్' ఆర్పీ... తమ ప్రేమ కథను స్కిట్ అండ్ సాంగ్ పెర్ఫార్మన్స్ రూపంలో చూపించారు.
Also Read : ప్రభాస్ ఫస్ట్ సినిమా కృష్ణంరాజు ప్రొడ్యూస్ చేయాల్సింది - బయటకు ఎందుకు వెళ్లిందంటే?