నటన, డ్యాన్స్ విషయాల్లో తనకంటూ ప్రత్యేక గుర్తింపును తెచ్చుకున్న నటుడు యంగ్ టైగర్ ఎన్టీఆర్. డెడికేషన్, కష్టపడేతత్వంతో టాలీవుడ్‌లో అగ్రస్థానంలో నిలిచారు. సినిమాలో తన క్యారెక్టర్ ఏదైనప్పటికీ నూటికి నూరుపాళ్లు న్యాయం చేస్తారు. ఇంత టాలెంట్ ఉంది కాబట్టే ఇప్పటి వరకు ఏ భారతీయ నటుడికి దక్కని రేర్‌ ఫీట్‌ని తన ఖాతాలో వేసుకున్నారు. ఇంతకీ అదేంటంటే.. ఆస్కార్ టాప్ 10 బెస్ట్ యాక్టర్ ప్రెడిక్షన్స్‌లో తారక్ స్థానం సంపాదించారు. లాస్ఏంజిల్స్‌లో జరగబోయే గోల్డెన్ గ్లోబ్స్ కార్యక్రమంలో తారక్ గోల్డెన్ స్టాట్యూట్‌ని దక్కించునే అవకాశం కూడా లేకపోలేదని అమెరికాకు చెందిన ప్రముఖ మ్యాగజైన్ Variety పేర్కొంది. జనవరి 10న 80వ గోల్డెన్ గ్లోబ్స్ అవార్డ్స్ కార్యక్రమంలో ఈ అవార్డులను ప్రకటించనున్నారు.
దర్శకధీరుడు ఎస్.ఎస్ రాజమౌళి తెరకెక్కించిన RRR సినిమాలో తారక్ భీమ్‌ పాత్రలో, మెగా పవర్ స్టార్ రామ్ చరణ్ సీతారామ రాజు పాత్రల్లో నటించారు. ఇండియాలోనే కాకుండా అమెరికా, జపాన్, రష్యాలోనూ ఈ సినిమాకు మంచి ప్రశంసలు లభించాయి. ఈ సినిమాకు గానూ ఇటీవల జక్కన్న న్యూయార్క్ ఫిలిం క్రిటిక్స్ అవార్డుల్లో బెస్ట్ డైరెక్టర్ అవార్డును దక్కించుకున్న సంగతి తెలిసిందే. ‘ఆర్ఆర్ఆర్’ సినిమాను ఆస్కార్ వరిస్తుందని ప్రేక్షకులు ఆశించారు. కానీ కుదరలేదు.
ఆస్కార్ రాకపోయినా ఈ సినిమా కోసం పనిచేసిన వారికి అంతర్జాతీయ గుర్తింపు లభిస్తుండటంతో ప్రస్తుతం తారక్ తన కుటుంబంతో అమెరికాలో విహారయాత్రను ఎంజాయ్ చేస్తున్నాడు. గోల్డెన్ గ్లోబ్స్ అవార్డుల కార్యక్రమానికి ఆర్.ఆర్.ఆర్ టీంతో కలిసి హాజరుకానున్నట్లు తెలిసింది. మరోవైపు రామ్ చరణ్ కూడా తన భార్య ఉపాసనతో కలిసి లాస్‌ ఏంజెల్స్‌కు బయలుదేరిపోయారు. వీరిద్దరి ఎయిర్‌పోర్ట్ ఫొటోలు, వీడియోను సోషల్‌మీడియాలో వైరల్ అవుతున్నాయి. ఈ కార్యక్రమంలో బాలీవుడ్ నటి ఆలియా భట్, నటుడు అజయ్ దేవగణ్‌ పాల్గొంటారో లేదో తెలియాల్సి ఉంది. ఇటీవల పండంటి ఆడపిల్లకు జన్మనిచ్చిన ఆలియా భట్ సినిమాల నుంచి కొంత విరామం తీసుకుంది. 'ఆర్.ఆర్.ఆర్' సినిమాలో ఆలియా సీత పాత్రలో రామ్‌చరణ్‌కు జోడీగా నటించింది. అజయ్ దేవగణ్‌ చరణ్‌కు తండ్రి పాత్రలో కనిపించారు.
ఈ ఆస్కార్స్ బెస్ట్ యాక్షన్ ప్రెడిక్షన్స్ లిస్ట్‌లో హ్యూగ్ జాక్‌మ్యాన్, విల్‌ స్మిత్‌ వంటి హాలీవుడ్‌ స్టార్స్‌ కూడా ఉన్నారు. వారికి సమానంగా ఆ లిస్ట్‌లో పేరును సంపాదించుకున్న ఏకైక భారతీయ నటుడు తారక్ కావడం నిజంగా గర్వకారణమే. ప్రస్తుతం తారక్ కొరటాల శివ తెరకెక్కిస్తున్న సినిమాలో నటిస్తున్నారు. ఇది ఎన్టీఆర్ కెరీర్‌లో 30వ సినిమా. ఇప్పటికే వీరిద్దరి కాంబినేషన్‌లో వచ్చిన జనతా గ్యారేజ్‌ బాక్సాఫీస్ వద్ద మంచి విజయం సాధించింది. దీంతో పాటు ‘కేజీఎఫ్‌’ డైరెక్టర్ ప్రశాంత్‌ నీల్‌తో కలిసి ఓ ప్రాజెక్ట్‌లో నటించబోతున్నారు. ఈ సినిమాకు సంబంధించిన ప్రీ ప్రొడక్షన్‌ పనులు శరవేగంగా జరుగుతున్నాయి. ఇప్పటికే రిలీజ్‌ అయిన బ్లాక్‌ అండ్ వైట్ పిక్‌ సినిమాపై భారీ అంచనాలను పెంచేసింది.