Akkineni Nagarjuna shared first photo of Naga Chaitanya and Sobhita Dhulipala engagement: అక్కినేని నాగ చైతన్య, శోభితా ధూళిపాళ వివాహ బంధంతో ఒక్కటి కానున్నారు. కుటుంబ సభ్యుల మధ్య అక్కినేని వారింట నేడు వాళ్లిద్దరి నిశ్చితార్థం జరిగింది. ఆ ఫోటోలను చైతూ తండ్రి, కింగ్ అక్కినేని నాగార్జున సోషల్ మీడియాలో షేర్ చేశారు. కుమారుడికి నిశ్చితార్థం జరిగిన విషయం వెల్లడించడమే కాదు... శోభితా ధూళిపాళను తమ కుటుంబంలోకి స్వాగతించారు నాగార్జున.
సాంప్రదాయ దుస్తుల్లో నాగ చైతన్య, శోభితా ధూళిపాళ జంట చూడముచ్చటగా ఉందని అభిమానులు, ప్రేక్షకులు, పరిశ్రమ ప్రముఖులు శుభాకాంక్షలు చెబుతున్నారు. ''ఈ రోజు ఉదయం 9.42 గంటలకు మా అబ్బాయి నాగ చైతన్య నిశ్చితార్థం శోభితా ధూళిపాళతో జరిగిన విషయం మీ అందరితో (అభిమానులు, ప్రేక్షకులు) పంచుకోవడం చాలా సంతోషంగా ఉంది. శోభితను సంతోషంగా మా కుటుంబంలోకి ఆహ్వానిస్తున్నాం. కొత్త జంటకు శుభాకాంక్షలు. జీవితం అంతా ప్రేమ, సంతోషంతో ఉండాలని ఆశీర్వదిస్తున్నా'' అని సోషల్ నెట్వర్కింగ్ సైట్ 'ఎక్స్'లో నాగార్జున పేర్కొన్నారు. ఇవాళ ఆగస్టు 8. అంటే... ఎనిమిదో నెలలో ఎనిమిదో రోజు. 2024లో అన్ని సంఖ్యలను కలిపితే ఎనిమిది వస్తుంది. ఈ సంఖ్యలను ఉద్దేశిస్తూ... ''8.8.8 అనంతమైన ప్రేమకు ఇది ప్రారంభం'' అని నాగార్జున వివరించారు.
అక్కినేని నాగ చైతన్యకు 2017లో సమంత రూత్ ప్రభు (Samantha Ruth Prabhu)తో వివాహం జరిగింది. 'ఏం మాయ చేసావె' సమయంలో వారిద్దరి మధ్య చిగురించిన ప్రేమ ఆ తర్వాత పెళ్లికి దారి తీసింది. అయితే... 2021లో ఆ జంట విడాకులు తీసుకోవడం అందరికీ షాక్ ఇచ్చింది. సమంత నుంచి వేరు పడిన తర్వాత 'గూఢచారి', 'మేజర్' సినిమాల్లో నటించిన శోభితా ధూళిపాళకు నాగ చైతన్య దగ్గర అయ్యారని కొన్నాళ్లుగా వార్తలు వినిపిస్తున్నాయి. ఆ ప్రేమ బంధాన్ని నేడు నిశ్చితార్థంతో అధికారికంగా ప్రకటించారు. త్వరలో ఏడు అడుగులు వేయనున్నారు.
శోభిత తెలుగు అమ్మాయే. అయితే.... హిందీ సినిమా 'రమణ్ రాఘవ్ 2.0'తో హీరోయిన్ కెరీర్ స్టార్ట్ చేశారు. బాలీవుడ్ ఇండస్ట్రీలో మంచి పేరు తెచ్చుకున్న తర్వాత తెలుగుకు వచ్చారు. ఇటీవల హాలీవుడ్ సినిమా దేవ్ పటేల్ 'మంకీ మ్యాన్'లో కూడా నటించారు.
Also Read: కేజీఎఫ్2 విడుదలైన 847 రోజులకు... కొత్త సినిమా టాక్సిక్ షూట్ స్టార్ట్ చేసిన రాకింగ్ స్టార్ యశ్!