Allari Naresh About Father EVV Satyanarayana: ఒకప్పుడు కామెడీ దర్శకుడిగా, కమర్షియల్ డైరెక్టర్‌గా ఎనలేని స్టార్‌డమ్‌ను సంపాదించుకున్నారు ఈవీవీ సత్యనారాయణ. ఆయన వారసుడిగా ఎంట్రీ ఇచ్చి హీరోగా గుర్తింపు తెచ్చుకున్నాడు అల్లరి నరేశ్. తండ్రి కామెడీ సినిమాలు తెరకెక్కించడంతో ఫేమస్ అయితే... అల్లరి నరేశ్ కామెడీ సినిమాల్లో నటిస్తూ ఫేమస్ అయ్యాడు. ఇప్పటికే తను ఒక మూవీలో నటిస్తున్నాడు అంటే ప్రేక్షకులంతా తన నుండి కామెడీనే ఆశిస్తారు. అందుకే త్వరలో ‘ఆ ఒక్కటి అడక్కు’ అనే చిత్రంతో రానున్నాడు అల్లరి నరేశ్. ఈ మూవీ ప్రమోషన్స్‌లో భాగంగా ఒక ఇంటర్వ్యూలో పాల్గొన్న నరేశ్... తన తండ్రి గురించి గుర్తుచేసుకుంటూ ఎమోషనల్ అయ్యాడు.
చాలా మారింది..
‘‘నాన్న చనిపోయిన తర్వాత నేను చాలా డౌన్ అయిపోయాను. బయటికి వెళ్లడం, కలవడం మానేశాను. ఇదివరకు ప్రతీచోట ఉండేవాడిని. ఏదైనా పార్టీ ఉంటే వెళ్లిపోయేవాడిని. ఇప్పుడేమో ఫ్రెండ్స్ వచ్చి 'నాలుగు సంవత్సరాల నుండి పిలుస్తున్నా రావడం లేదు, తర్వాత నుండి పిలవము' అని తిడుతున్నారు. అప్పుడు నాన్న చనిపోతారని అనుకోలేదు. నాన్న ఉన్నంత వరకు తెలియలేదు... ఆ తర్వాత బాధ్యతలు అన్నీ నాపై, రాజేశ్ పైనే పడ్డాయి. కొన్నిరోజులు కష్టంగా గడిచింది. ఒకటిన్నర సంవత్సరం వరకు నేను సైలెంట్ అయిపోయాను. ఆ తర్వాత మళ్లీ సినిమాలు చేయడం ప్రారంభించాను. ఇదివరకు సెట్‌లో హడావిడి, గోల చేసి అందరితో మాట్లాడేవాడిని. ఇప్పుడు ఎక్కువగా గమనించడం, వినడం మొదలుపెట్టాను’’ అంటూ తనలో వచ్చిన మార్పుల గురించి బయటపెట్టాడు అల్లరి నరేశ్.
నాన్నతో క్లోజ్..
తన తండ్రితో క్లోజ్‌గా ఉండే సందర్భాలను గుర్తుచేసుకున్నారు అల్లరి నరేశ్. ‘‘నేను ఎక్కడికి వెళ్లినా నాన్నతో చెప్పేవాడిని. కానీ ఒక్కొక్కసారి ఫ్రెండ్స్‌తో పబ్స్‌కు వెళ్తున్నామని చెప్పలేం కదా. నాన్నతో హ్యాపీగా ఉండేవాడిని. నేను ఏదైనా షేర్ చేసుకునే మనిషి ఆయనే. నేను ఒక అమ్మాయిని ప్రేమించాను, తను నన్ను రిజెక్ట్ చేసింది, ఒక అమ్మాయి నాకు లవ్ లెటర్ ఇచ్చింది, బ్రేకప్స్‌తో సహా అన్నీ ఆయనతో చెప్పుకునేవాడిని. నువ్వు నా ముందు యాక్టింగ్ చేయడం లాంటివి వద్దు, ఫ్రెండ్లీగా ఉందాం అనేవారు. తప్పు చేసినా చెప్పేయండి అని స్వేచ్ఛ ఇచ్చారు. యాక్టింగ్ చేస్తా అన్నప్పుడు కూడా ఎందుకు, వద్దు అని ఏం అనలేదు’’ అని చెప్పుకొచ్చాడు.
మల్టీ స్టారర్ చేస్తాం..
తన తండ్రిపై ఇష్టంతోనే కూతురికి ఈవిక అని పేరు పెట్టుకున్నానని చెప్పాడు అల్లరి నరేశ్. తండ్రితో ఎంత క్లోజ్‌గా ఉంటాడో, తన తల్లితో కూడా అంతే క్లోజ్‌గా ఉంటానని అన్నాడు. తన తల్లి సినిమా చూసిన తర్వాత నచ్చకపోతే మొహం మీదే చెప్పేస్తుందని, పెద్ద క్రిటిక్ అని చెప్తూ నవ్వాడు. తన అన్న ఆర్యన్ రాజేశ్ అయితే సినిమాల్లో అనుకున్నంత సక్సెస్ సాధించలేక కొన్నాళ్ల పాటు ఇండస్ట్రీకి దూరంగా కూడా ఉన్నాడు. వారిద్దరూ కలిసి నటించే ఐడియా ఉందని తాజాగా పాల్గొన్న ఇంటర్వ్యూలో అల్లరి నరేశ్ స్టేట్‌మెంట్ ఇచ్చాడు. అన్నాదమ్ముళ్ల కథతో ఆర్యన్ రాజేశ్‌తో కలిసి మల్టీ స్టారర్ చేయాలని అనుకుంటున్నానని మనసులోని మాటను బయటపెట్టాడు.