Deepika Padukone: దీపికా 1000 కోట్ల హ్యాట్రిక్ - పెద్ద సినిమాలకు గోల్డెన్ లెగ్‌గా మారిన సొట్టబుగ్గల సుందరి!

Deepika Padukone ఇటీవల కాలంలో బాలీవుడ్ స్టార్ హీరోయిన్ దీపికా పదుకునే బ్యాక్ టూ బ్యాక్ విజయాలు సాధించింది. ఈ క్రమంలో ఆమె ఓ అరుదైన ఘనత సాధించింది.

Deepika Padukone: బాలీవుడ్ బ్యూటీ దీపికా పదుకొనే గురించి ప్రత్యేకంగా పరిచయం చెయ్యాల్సిన పనిలేదు. ఇండస్ట్రీలో అనతి కాలంలోనే స్టార్ హీరోల సినిమాల్లో అవకాశాలు అందుకొని, అతి తక్కువ కాలంలోనే స్టార్ హీరోయిన్ గా మారిపోయింది. హీరో రణవీర్ సింగ్ తో వివాహ బంధంలో అడుగు పెట్టిన దీపికా.. పెళ్ళి తర్వాత కూడా సినీ కెరీర్ ను కొనసాగించింది. అయితే ఇప్పుడు ఈ ముద్దుగుమ్మ ఇండియన్ ఫిలిం ఇండస్ట్రీలో ఓ అరుదైన ఘనత సాధించింది.

'కల్కి 2898 AD' సినిమాతో దీపికా పదుకునే టాలీవుడ్ లో ఎంట్రీ ఇచ్చిన సంగతి తెలిసిందే. రెబల్ స్టార్ ప్రభాస్, డైరెక్టర్ నాగ్ అశ్విన్ కాంబోలో తెరకెక్కిన ఈ సైన్స్ ఫిక్షన్ మూవీలో SUM-80 అలియాస్ సుమతి పాత్రలో ఆమె నటించింది. ప్రాజెక్ట్ K గర్భిణీ ల్యాబ్ సబ్జెక్ట్ గా, కల్కిని కడుపున మోసిన యువతిగా మంచి నటన కనబరిచింది. ఇక ఈ చిత్రం బాక్సాఫీస్ వద్ద సెన్సేషనల్ బ్లాక్ బస్టర్ గా నిలిచింది. ప్రపంచ వ్యాప్తంగా 15 రోజుల్లోనే ₹1000 కోట్ల క్లబ్ లో చేరింది. 

గతేడాది దీపికా పదుకునే 'పఠాన్' సినిమాలో బాలీవుడ్ బాద్ షా షారుఖ్ ఖాన్ కు జోడీగా నటించిన సంగతి తెలిసిందే. సిద్దార్థ్ ఆనంద్ దర్శకత్వం వహించిన ఈ స్పై యాక్షన్ థ్రిల్లర్.. ₹1,050 కోట్లు రాబట్టింది. అలానే అట్లీ డైరెక్షన్ లో కింగ్ ఖాన్ షారుఖ్ హీరోగా నటించిన 'జవాన్' మూవీలోనూ భాగమైంది. ఇందులో ఫ్లాష్ బ్యాక్ ఎపిసోడ్ లో షారుక్ భార్యగా కనిపించింది. ఇది బాక్సాఫీస్ దగ్గర ₹1,148 కోట్లు వసూళ్ళు సాధించింది. ఇలా దీపిక ఏడాది కాలంలో మూడు 1000 కోట్ల గ్రాస్ సినిమాలతో హ్యాట్రిక్ విజయాలు అందుకుంది. 

మూడు 1000 కోట్ల సినిమాల్లో దీపికా...
'బాహుబలి 2', 'దంగల్', RRR, 'కేజీఎఫ్ 2', 'పఠాన్', 'జవాన్' లాంటి భారతీయ చిత్రాలు 1000 కోట్ల క్లబ్ లో ఉన్నాయి. ఇప్పుడు 'కల్కి 2898 ఏడీ' మూవీ కూడా ఈ లిస్టులో చేరడంతో.. దీపిక ఖాతాలో మూడు వెయ్యి కోట్ల సినిమాలు వచ్చి చేరినట్లైంది. ఇండియన్ ఫిల్మ్ ఇండస్ట్రీలో ఇప్పటి వరకూ ఏ హీరోయిన్ కు కూడా ఇలాంటి అరుదైన అవకాశం దక్కలేదు. హీరోలలో మాత్రం ప్రభాస్, షారుఖ్ ఖాన్ చెరో రెండేసిసార్లు వెయ్యి కోట్లకి పైగా వసూళ్లు అందుకున్నారు. దీన్ని బట్టి దీపికాది గోల్డెన్ లెగ్ అనే అనుకోవాలి.

2006లో 'ఐశ్వర్య' అనే కన్నడ చిత్రంతో తెరంగేట్రం చేసిన దీపికా పదుకునే.. 'ఓం శాంతి ఓం' సినిమాతో బాలీవుడ్ లో హీరోయిన్ గా అడుగుపెట్టింది. ఎంట్రీతోనే బ్లాక్ బస్టర్ విజయాన్ని సాధించి, బీ టౌన్ జనాల దృష్టిని ఆకర్షించింది.. క్రేజీ ఆఫర్లు అందుకుంది. అక్కడి నుంచి ఆమె వెనక్కి తిరిగి చూసుకోవాల్సిన అవసరం రాలేదు. దాదాపు 18 ఏళ్ల తర్వాత కల్కి '2898 AD' సినిమాతో మళ్ళీ సౌత్ లోకి ఎంట్రీ ఇచ్చింది. 'కల్కి 2' లోనూ భాగం కానుంది. త్వరలోనే ఓ బిడ్డకు జన్మనివ్వబోతున్న దీపికా.. సినిమాల నుంచి కాస్త బ్రేక్ తీసుకుంది. ఆమె కీలక పాత్రలో నటించిన 'సింగం ఎగైన్' సినిమా రిలీజ్ కు రెడీ అవుతోంది.