హైదరాబాద్ సైదాబాద్ సింగరేణి కాలనీలో దారుణ ఘటన చోటుచేసుకుంది. ఓ చిన్నారిపై ఉన్మాది దారుణానికి ఒడిగట్టాడు. బాలికను ఎత్తుకెళ్లి అత్యాచారం చేసి దారుణంగా హత్య చేశాడు. ఐదేళ్ల చిన్నారి గురువారం సాయంత్రం నుంచి కనిపించకపోవడంతో కుటుంబసభ్యులు కాలనీ మొత్తం వెతికారు. చివరికి పక్కింట్లో చిన్నారి మృతదేహం కనిపించింది. ఈ ఘటనపై స్థానికులు ఆగ్రహం వ్యక్తంచేస్తున్నారు. నిందితుడిని కఠినంగా శిక్షించాలని ఆందోళనకు దిగారు. ఈ క్రమంలో గురవారం అర్ధరాత్రి పోలీసులు, స్థానికుల మధ్య ఘర్షణ జరిగింది. పోలీసులపై స్థానికులు రాళ్లురువ్వారు. ఈ ఘటన హైదరాబాద్ లో కలకలం రేపుతోంది.
ఆడుకునేందుకు వెళ్లి
నల్గొండ జిల్లా చందంపేట మండలానికి చెందిన ఓ కుటుంబంతో సహా హైదరాబాద్ వచ్చి ఆటో నడుపుతూ జీవనం సాగిస్తున్నారు. వారికి ముగ్గురు పిల్లలు. వారి పెద్దమ్మాయి(5) రోజులాగానే ఆడుకునేందుకు బయటకు వెళ్లింది. సాయంత్రం అయినా ఇంటికి రాకపోవడంతో ఆందోళన చెందిన తల్లిదండ్రులు చుట్టుపక్కల వెతికారు. స్థానిక మసీద్, చర్చిలో మైకుల ద్వారా ప్రచారం చేయించారు. అయినప్పటికీ ఆచూకీ దొరక్కపోవడంతో పోలీసులకు ఫిర్యాదు చేశారు. పోలీసులు సింగరేణి కాలనీలో గాలించారు. సీసీ కెమెరా దృశ్యాలు పరిశీలించినా ఫలితం లేకపోయింది.
పరుపులో విగతజీవిగా...
బాధితులు ఇంటి పక్కనే ఉంటున్న రాజు అనే యువకుడు చెడు వ్యసనాలకు అలవాటై చిల్లర దొంగతనాలు పాల్పడేవాడు. రోజు మద్యం సేవించి భార్య, పిల్లల్ని వేధించేవాడు. దీంతో కొద్ది రోజుల క్రితం అతడి భార్య ఇంటి నుంచి వెళ్లిపోయింది. తర్వాత తల్లి కూడా వెళ్లిపోయింది. కొద్దిరోజులుగా ఒంటరిగా ఉంటున్న రాజు కూలీ పని చేసుకుంటూ వచ్చిన డబ్బుతో మద్యం తాగుతూ జల్సాలు చేస్తూ తిరుగుతుండేవాడు. పక్కింట్లో ఉంటున్న రాజు చిన్నారిపై అఘాయిత్యానికి పాల్పడి, హత్య చేశాడు. బాలిక మృతదేహాన్ని పరుపులో మూట కట్టి ఇంటికి తాళం వేసి అక్కడినుంచి పారిపోయాడు. ఇదంతా తెలుసుకున్న స్థానికులు పాప కోసం వెతికారు. చిన్నారి నాయనమ్మకి పక్కింట్లో ఉండే రాజుపై అనుమానం వచ్చింది. స్థానికులు ఇంటి తాళం పగలగొట్టాలని ప్రయత్నించారు. అనుమానం బలపడటంతో 10 గంటల ప్రాంతంలో తాళం పగలగొట్టి చూడగా పరుపులో చిన్నారి శవమై కనిపించింది.
నిందితుడిని అప్పగించాలని ఆందోళన
దీంతో స్థానికుల్లో ఆగ్రహావేశాలు కట్టలు తెంచుకున్నాయి. నిందితుడిని పట్టుకొని తమకు అప్పగించేంత వరకు మృతదేహాన్ని తీసుకెళ్లేందుకు వీల్లేదని పట్టుబట్టారు. దిశ ఎన్‌కౌంటర్ మాదిరిగానే ఈ నిందితుని కూడా ఎన్ కౌంటర్ చేయాలని ఆందోళనకు దిగారు. ఈ క్రమంలో పోలీసులకు వ్యతిరేకంగా నినాదాలు చేశారు. పోలీసు ఉన్నతాధికారులు రంగంలోకి దిగి బాధిత కుటుంబానికి న్యాయం చేస్తామని, నిందితుడిని కఠినంగా శిక్షిస్తామని హామీ ఇచ్చారు. నిందితుడిని తమకు అప్పగించాలని స్థానికులు పట్టుబట్టారు. చివరకు పరిస్థితి ఉద్రిక్తంగా మారడంతో ఉన్నతాధికారులు 300 మంది పోలీసులను రంగంలోకి దించారు. చివరికి పోలీసులు బలవంతంగా మృతదేహాన్ని తరలించే ప్రయత్నం చేశారు. దీంతో స్థానికులు పోలీసులపై రాళ్లు రువ్వారు. ఈ క్రమంలో ఇరువర్గాల మధ్య ఘర్షణ జరిగింది. ఈ తోపులాటలో కొంత మంది పోలీసులు, స్థానికులకు గాయాలయ్యాయి.