Paytm Shares: రూ.2150కి అమ్మి రూ.640కి షేర్లు కొన్న పేటీఎం ఎండీ!!

Paytm Shares: పేటీఎం ఎండీ విజయ శేఖర శర్మ తన కంపెనీ షేర్లను తిరిగి కొనుగోలు చేశారు. ఓపెన్‌ మార్కెట్లో రూ.11 కోట్ల విలువైన 1.7 లక్షల కోట్ల షేర్లను తీసుకున్నారు.

Paytm Shares:  పేటీఎం ఎండీ విజయ శేఖర శర్మ తన కంపెనీ షేర్లను తిరిగి కొనుగోలు చేశారు. ఓపెన్‌ మార్కెట్లో రూ.11 కోట్ల విలువైన 1.7 లక్షల కోట్ల షేర్లను తీసుకున్నారు. మే 30, 31న ఆయన షేర్లు కొనుగోలు చేశారని సెబీ పత్రాల ద్వారా తెలిసింది. మే 30న రూ.6.31 కోట్లతో 100,552 షేర్లు, మే 31న రూ.4.68 కోట్లతో 71,469 షేర్లను ఆయన కొన్నారు.

గతేడాది నవంబర్లో పేటీఎం ఐపీవోకు (Paytm) వచ్చింది. నిబంధనల ప్రకారం ఇష్యూకు వచ్చిన ఆరు నెలల వరకు కంపెనీ యాజమాన్యం తమ షేర్లను కొనుగోలు చేయకూడదు. ఈ గడువు ముగియడంతో విజయ శేఖర శర్మ షేర్లను కొన్నారు. మరో ఆరు నెలల్లో పేటీఎం ఎబిటా బ్రేక్‌ఈవెన్‌ అవుతుందని మార్చిలో ఆయన షేర్‌హోల్డర్లతో చెప్పారు. అభివృద్ధి ప్రణాళికల విషయంలో ఏ మాత్రం రాజీ పడబోమని స్పష్టం చేశారు. పేటీఎం షేర్లను కొనుగోలు చేయొచ్చని ఈ మధ్యే గోల్డ్‌మన్‌ సాచెస్‌ సైతం రికమెండ్‌ చేయడం గమనార్హం.

భారత్‌లోని అతిపెద్ద ఐపీవోల్లో ఒకటిగా పేటీఎం నిలిచింది. రూ.2,150ను ఇష్యూ ధరతో మార్కెట్లో నమోదైంది. ఈ ఫిన్‌టెక్‌ కంపెనీ వాల్యుయేషన్స్‌ ఎక్కువగా భావించడంతో ఆ తర్వాత షేర్ల ధర పతనమైంది. కొన్ని రోజుల క్రితం రూ.511 వద్ద ఆల్‌టైం కనిష్ఠాన్ని నమోదు చేసింది. శుక్రవారం రూ.613 వద్ద ఓపెనై రూ.32 లాభంతో రూ.646 వద్ద ముగిసింది. పేటీఎం షేరు మే 30న రూ.630, మే 31న రూ.652 వద్ద ముగిసింది. రూ.640ని సగటు ధరగా తీసుకున్నా పేటీఎం సీఈవోకు ఒక్కో షేరుపై రూ.1510 లాభం వచ్చినట్టే! మొత్తంగా రూ.11 కోట్లు లాభం.

పేటీఎం 2022 Q2 ఫలితాలు

2021, సెప్టెంబర్‌తో ముగిసిన త్రైమాసికంలో రూ.481 కోట్ల కన్సాలిడేటెడ్‌ లాస్‌ను నమోదు చేసింది. జూన్‌తో ముగిసిన త్రైమాసికం నష్టం రూ.376 కోట్లతో పోలిస్తే ఇది మరింత ఎక్కువ కావడం గమనార్హం. ఇక గతేడాది ఇదే త్రైమాసికంతో పేటీఎం రూ.435 కోట్ల నష్టం నమోదు చేసింది.

వార్షిక కార్యనిర్వాహక రాబడి 64 శాతం పెరిగి రూ.1086 కోట్లుగా ఉంది. గతేడాది ఇదే సమయానికి ఇది రూ.663 కోట్లు కావడం గమనార్హం. యూపీఐ యేతర చెల్లింపుల్లో ఆదాయం 52 శాతం పెరగ్గా ఇతర సేవలు, ఆర్థిక సేవల్లో మూడు రెట్లు పెరిగింది. పేటీఎం స్టాక్‌ మార్కెట్లో నమోదైన తర్వాత ఫలితాలు విడుదల చేయడం ఇదే మొదటి సారి.

వార్షిక ప్రాదిపదికన చెల్లింపులు, ఆర్థిక సేవల ఆదాయం 69 శాతం పెరిగి రూ.842 కోట్లు నమోదైంది. కామర్స్‌, క్లౌడ్‌ సేవలు ఆదాయం 47 శాతం పెరిగి రూ.243 కోట్లుగా ఉంది. ఈ క్వార్టర్లో ఆర్థిక సేవల, ఇతర రాబడి 250 శాతం పెరిగి రూ.88.70 కోట్లుగా ఉంది. తమ గ్రాస్‌ మర్చండైజ్‌ విలువ (GMV) వార్షిక ప్రాతిపదికన 107 శాతం పెరిగి రూ.1,95,600 కోట్లుగా ఉంది. అక్టోబర్‌లో జీఎంవీ రూ.83,200 కోట్లుగా ఉండేది. ఇక నెలవారీ జీఎంవీ సగటున రూ.11,369 కోట్లుగా ఉంటోందని కంపెనీ తెలిపింది.