Tesla Going To Open First Showroom In BKC Mumbai: అమెరికన్ ఎలక్ట్రిక్ వాహనాల తయారీ కంపెనీ, ఎలాన్‌ మస్క్‌ (Elon Musk) సారథ్యంలోని టెస్లా భారతదేశంలోకి ప్రవేశించడం దాదాపు ఖాయమైంది. ముంబైలోని 'బాంద్రా కుర్లా కాంప్లెక్స్‌' (BKC)లో ఆ కంపెనీ మొదటి షోరూమ్‌ ప్రారంభం కానుంది. ఈ షోరూమ్‌ స్పేస్‌కు సంబంధించిన లీగల్‌ అగ్రిమెంట్‌ దాదాపుగా ఖరారైనట్లు తెలుస్తోంది. షోరూమ్‌ ఏర్పాటు కోసం టెస్లా కంపెనీ కొంత వాణిజ్య స్థలాన్ని లీజుకు తీసుకుంది. 


కొత్త షోరూమ్ వివరాలు ఇవీ...
బాంద్రా కుర్లా కాంప్లెక్స్‌లోని ఒక కమర్షియల్‌ టవర్ (భారీ భవనం) గ్రౌండ్ ఫ్లోర్‌లో 4,000 చదరపు అడుగుల విస్తీర్ణంలో టెస్లా మొదటి షోరూమ్‌ (Tesla's First Showroom In India) ప్రారంభం కాబోతోందని ప్రాపర్టీ మార్కెట్ వర్గాలు చెప్పుకుంటున్నాయి. లీజు విషయానికి వస్తే, ప్రతి నెలా చదరపు అడుగుకు దాదాపు రూ. 900 చొప్పున అద్దె చెల్లించేలా అగ్రిమెంట్‌ దాదాపుగా ఫైనల్‌ అయినట్లు వెల్లడించాయి. అంటే, నెలకు అక్షలారా రూ. 36 లక్షలు అద్దె చెల్లించనుంది. ప్రస్తుతానికి 5 సంవత్సరాల కోసం లీజు ఒప్పందం కుదుర్చుకున్నారని, భవిష్యత్‌లో దీనిని పొడిగించవచ్చని మార్కెట్‌ వర్గాల భోగట్టా. టెస్లా రెండో షోరూమ్‌ కూడా రెడీ అవుతోంది, దీనిని దిల్లీలోని (Tesla's second showroom in Delhi) ఏరోసిటీ కాంప్లెక్స్‌లో ప్రారంభించనుంది. భారత ప్రధాని నరేంద్ర మోదీ (Prime Minister Narendra Modi) అమెరికా పర్యటన సమయంలో, వాషింగ్టన్‌లో, టెస్లా CEO ఎలాన్ మస్క్ ప్రధాని నరేంద్ర మోడీతో సమావేశం జరిగిన కొన్ని రోజులకే ముంబై & దిల్లీ ఒప్పందాలు దాదాపు ఖరారయ్యాయి.            


భారతదేశం విధించిన సుంకాలపై అమెరికా ఆందోళన
ఇక్కడ రెండు విషయాలను మనం అర్ధం చేసుకోవాలి. ఒకటి - టెస్లా కార్లు భారతదేశంలోకి అతి త్వరలో ఎప్పుడైనా ప్రవేశించవచ్చు. రెండోది - అమెరికా అధ్యక్షుడు డొనాల్డ్‌ ట్రంప్‌ (Donald Trump)తో నరేంద్ర మోదీ సమావేశం తర్వాత ప్రకటించిన భారత్‌-అమెరికా ద్వైపాక్షిక వాణిజ్య ఒప్పందం, ఇరు దేశాల స్నేహంపై మరింత స్పష్టతను అందిస్తోంది. ఇతర దేశాల నుంచి దిగుమతి చేసుకునే వాహనాలపై భారత ప్రభుత్వం 110 శాతం సుంకం విధిస్తుంది. దీనిపై డొనాల్డ్‌ ట్రంప్‌ ఆందోళన వ్యక్తం చేశారు. ఈ నేపథ్యంలో, భారతదేశం ఇప్పుడు $40,000 కంటే ఎక్కువ ధర ఉన్న హై-ఎండ్ కార్లపై ప్రాథమిక కస్టమ్స్ సుంకాన్ని 110 శాతం నుంచి 70 శాతానికి తగ్గించింది. అధిక దిగుమతి సుంకాల కారణంగా ఇంతకాలం భారతీయ మార్కెట్‌కు దూరంగా ఉన్న టెస్లా కార్లు, ఇప్పుడు భారత్‌లోకి దూసుకురాబోతున్నాయి.        


టెస్లా ఉద్యోగ ప్రకటన
షోరూమ్‌ల ఏర్పాటు నేపథ్యంలో, కొన్ని రోజుల క్రితం, టెస్లా కంపెనీ భారత్‌లో ఉద్యోగాల భర్తీ కోసం ప్రకటనలు ఇచ్చింది. కస్టమర్-ఫేసింగ్‌ & బ్యాక్-ఎండ్ ఉద్యోగాలు సహా 13 రకాల ఉద్యోగాలకు అప్లికేషన్లను ఆహ్వానించింది. వీటిలో కొన్ని ఉద్యోగ ఖాళీలు ముంబైలో, మరికొన్ని దిల్లీలో ఉన్నాయి. 


మరో ఆసక్తికర కథనం: యూపీఐ లైట్ లావాదేవీలు, నిల్వ పరిమితి పెంపు - కొత్తగా ఓ సూపర్‌ ఫీచర్‌