Land Vs Apartment: భూమి కొనాలా లేక అపార్ట్‌మెంట్‌లో ఫ్లాట్‌ కొనాలా? - మీ పెట్టుబడిని ఏది పెంచుతుంది?

Investing In Real Estate: మన దేశంలో, అతి తక్కువ కాలంలో ఎక్కువ సంపాదించగల వ్యూహాల్లో రియల్ ఎస్టేట్ పెట్టుబడి ఒకటి. అయితే, భూమి కొనాలా లేక అపార్ట్‌మెంట్‌ ఫ్లాట్‌ కొనాలా అన్నది చాలా మంది ఎదుర్కొనే మొదటి పశ్న. దేశవ్యాప్తంగా ఇటీవలి డేటా & ట్రెండ్స్‌ను బట్టి, భూమి - అపార్ట్‌మెంట్‌ ఫ్లాట్‌ వల్ల కలిగే ప్రయోజనాలు, ఇబ్బందులను చూద్దాం.

భూమిపై పెట్టుబడి పెడితే...

ఇటీవలి అధ్యయనాల ప్రకారం, భూమిని కొనుగోలు చేయడం వల్ల, అపార్ట్‌మెంట్‌ ఫ్లాట్‌ కంటే ఎక్కువ రాబడి లభిస్తుంది. భూమిని అద్దెకు ఇవ్వగా వచ్చిన రాబడి, అపార్ట్‌మెంట్‌ ఫ్లాట్‌ వల్ల వచ్చే రాబడి కంటే దాదాపు పది రెట్లు ఎక్కువగా ఉండవచ్చు. నగర కేంద్రాలకు దగ్గరలో ఉండి, అన్ని మౌలిక సదుపాయాల అభివృద్ధి జరిగిన ప్రాంతాలకు ఇది వర్తిస్తుంది.

డేటా ప్రకారం, 2015 నుంచి, దేశంలోని ఎనిమిది ప్రధాన నగరాల్లో నివాస ప్లాట్ల విలువ ఏటా సగటున 7 శాతం పెరిగింది, అదే సమయంలో అపార్ట్‌మెంట్ ధరలు ఏటా 2 శాతం పెరిగాయి. దీనికి ప్రధాన కారణం, పెద్ద నగరాల్లో పరిమిత సంఖ్యలో ఖాళీ భూములు అందుబాటులో ఉండడమే. 

భూమిపై పెట్టుబడి ప్రయోజనాలు

భూముల రేట్లు & పెట్టుబడి విలువ ఏటికేడు గణనీయంగా పెరుగుతున్నాయి. ముఖ్యంగా పెద్ద నగరాలకు దగ్గరగా ఉన్న ప్రాంతాల విషయంలో ఇది స్పష్టంగా కనిపిస్తోంది. ఉదాహరణకు, హైదరాబాద్‌ చుట్టుపక్కల పదేళ్ల క్రితం ఉన్న రేట్లకు, ఇప్పుడు రేట్లకు తేడాను అర్ధం చేసుకోవచ్చు.

వినియోగంలో సౌలభ్యం: లీజుకు ఇవ్వవచ్చు, వెకేషన్‌ హోమ్స్‌ కట్టొచ్చు, లేదా ఇంకేదైనా నిర్మాణం చేపట్టవచ్చు. లేదా, దీర్ఘకాలిక రాబడి కోసం భూమిని అలాగే ఉంచేయవచ్చు. ఇలా, అనేక ఆదాయ వనరులను సృష్టించవచ్చు.

తక్కువ నిర్వహణ ఖర్చులు: భూమి అనేది ఇబ్బంది లేని పెట్టుబడి. అపార్ట్‌మెంట్‌ల మాదిరిగా కాకుండా దీనికి కచ్చితమైన నిర్వహణ అవసరం లేదు.

అపార్ట్‌మెంట్‌ ఫ్లాట్‌పై పెట్టుబడి పెడితే...

అపార్ట్‌మెంట్‌ ఫ్లాట్‌ వల్ల కూడా ప్రయోజనాలు ఉన్నాయి. 

అద్దె ఆదాయం: అపార్ట్‌మెంట్‌ల నుంచి స్థిరమైన అద్దె ఆదాయం వస్తుంది, పెట్టుబడిదారులకు నమ్మకమైన క్యాష్‌ ఫ్లోను అందిస్తుంది.

సౌకర్యాలు, భద్రత: పార్కింగ్, జిమ్‌లు, పవర్ బ్యాకప్, భద్రత సేవలు వంటివి అందిస్తున్నందున ఆధునిక అపార్ట్‌మెంట్‌లు ఆకర్షణీయంగా కనిపిస్తున్నాయి.

ఫైనాన్సింగ్ సౌలభ్యం: అపార్ట్‌మెంట్‌ ఫ్లాట్‌ కొనడానికి సులభంగా రుణాలు పొందవచ్చు.

ఫ్లాట్‌పై పెట్టుబడిలో ఇబ్బందులు

కొన్ని ప్రయోజనాలు ఉన్నప్పటికీ, అపార్ట్‌మెంట్‌లలో పెట్టుబడి వల్ల కొన్ని ఇబ్బదులు కూడా ఉన్నాయి.

తక్కువ వృద్ధి: దేశంలోని 8 ప్రధాన నగరాల డేటాను బట్టి, 2015 నుంచి, అపార్ట్‌మెంట్ ధరలు చాలా తక్కువగా పెరిగాయి. ప్రతి సంవత్సరం సగటున 2 శాతం వృద్ధి చెందాయి.

తరుగుదల & నిర్వహణ: అపార్ట్‌మెంట్‌లకు కాలక్రమేణా నిర్వహణ అవసరం. కొన్నేళ్ల తర్వాత, అపార్ట్‌మెంట్‌ ఫ్లాట్‌ విలువ క్రమంగా తగ్గడం ప్రారంభమవుతుంది.

మార్కెట్: కొన్ని ప్రాంతాల్లో అపార్ట్‌మెంట్‌లు అధికంగా ఉండటం వల్ల అద్దె రాబడి తగ్గుతుంది. ఒక్కోసారి ఫ్లాట్‌ను ఖాళీగానూ ఉంచాల్సి రావచ్చు.

పెట్టుబడిదారులకు కీలక సూచనలు

అపార్ట్‌మెంట్‌ ఫ్లాట్‌ లేదా భూమిపై పెట్టుబడి పెట్టేందుకు మీరు ఆలోచిస్తుంటే, ఈ కింది అంశాలను పరిగణనలోకి తీసుకోండి:

స్థానం: చక్కటి మౌలిక సదుపాయాలతో నగర కేంద్రాలకు సమీపంలో ఉంటే భూమి & అపార్ట్‌మెంట్‌ ఫ్లాట్‌ రెండింటి విలువలోనూ వృద్ధి కనిపిస్తుంది.

పెట్టుబడి కారణం: తక్షణ అద్దె ఆదాయం కోసం చూస్తున్న వ్యక్తులకు అపార్ట్‌మెంట్‌ ఫ్లాట్‌ మంచి ఆప్షన్‌ అవుతుంది. ఎక్కువ పెరుగుదల కోసం దీర్ఘకాలం ఎదురు చూడగల పెట్టుబడిదారులు భూమిని కొనడం సముచితం.

పెట్టుబడి కోసం తెలివైన మార్గాన్ని ఎంపిక చేసుకోవడానికి, పెట్టుబడిదారులు తమ ఆర్థిక లక్ష్యాలు, భరించగల రిస్క్‌, మార్కెట్ పరిస్థితులను అంచనా వేయాలి.

మరో ఆసక్తికర కథనం: మీ ఫోన్‌ పోతే వెంటనే ఈ పని చేయండి - ఇక దానిని ఓపెన్‌ చేయడం ఎవరి వల్లా కాదు!