ప్రస్తుతం గూగుల్ ప్రపంచ వ్యాప్తంగా జనాలకి కనీస అవసరంగా మారిపోయిన సంగతి తెలిసిందే. అసలు సెర్చ్ ఇంజన్‌ అనగానే గుర్తొచ్చే మొదటి పేరు గూగుల్ అనేంతలా ఆ సంస్థ ఎదిగింది. సెర్చ్ చేయడానికి ‘గూగుల్ చేయండి’ అనడం చాలా సందర్భాల్లో మనకి వినిపిస్తుంటుంది. అంతటి ప్రపంచ దిగ్గజ సంస్థ పుట్టి నేటికి 25 ఏళ్లు అయింది. ఈ సందర్భంగా గూగుల్ సీఈఓ సుందర్ పిచాయ్ తమ ఉద్యోగులను ఉద్దేశించి ఓ బ్లాగ్ రాశారు. దాంట్లో తన పర్సనల్ ఎక్స్‌పీరియన్స్‌లతో పాటుగా గూగుల్‌కు సంబంధించిన పలు ఇంట్రస్టింగ్ విషయాలను షేర్ చేసుకున్నారు.
‘‘చాలా ఏళ్ల క్రితం నేను అమెరికాలో చదువుతున్నప్పుడు భారత్‌లో ఉంటున్న మా నాన్నకు తొలి ఈ - మెయిల్ అడ్రస్ వచ్చింది. నా తండ్రితో కమ్యూనికేట్ చేయడానికి వేగవంతమైన, చవకైన మార్గం లభించినందుకు నేను చాలా సంతోషించాను. అందుకే నాన్నకి ఈ మెసేజ్ పంపాను. అప్పుడు నేను చాలా వెయిట్ చేశాను. ఆయన నుంచి సమాధానం రావడానికి నాకు 2 రోజులు పట్టింది. డియర్ పిచాయ్, ఈ-మెయిల్ అందుకున్నాడు అని రాశారు. ఈ-మెయిల్ రావడం ఆలస్యం కావడంతో, పిచాయ్ తన తండ్రికి కూడా ఫోన్ చేశారు. అతని తండ్రి తన కార్యాలయంలోని ఎవరైనా తన కంప్యూటర్‌లో ఈ-మెయిల్‌ను చూడాల్సి ఉంటుందని చెప్పారు. ఆ తర్వాత ప్రింట్ తీసి వారికి డెలివరీ చేయాల్సి ఉంటుంది.
నేటి కాలంలో టెక్నాలజీ ఎంతో అభివృద్ధి చెందింది. ఒకసారి నేను నా కొడుకుతో ఉన్నాను. ఏదో చూసి మొబైల్ లో ఫోటో తీశాడు. ఆపై స్నేహితులకు షేర్ చేసుకున్నారు. తర్వాత ఒకరికొకరు మెసేజ్‌లు పంపుకున్నారు. జేబులోంచి ఫోన్ తీసినంత వేగంగా అదంతా జరిగింది. కొన్నేళ్ల క్రితం నేను నా తండ్రికి మెసేజ్ పంపిన తీరుతో పోలిస్తే, ఈ రోజు నా కొడుకు తన తండ్రితో సంభాషించే విధానం, తరాల మధ్య ఎంత మార్పు జరుగుతుందో చూపిస్తుంది.
నల్లా రిపేర్ నుంచి గూగుల్ ఇంటర్వ్యూ వరకు..
కుప్పలు తెప్పలుగా ఉన్న సమాచారాన్ని ప్రపంచవ్యాప్తంగా అందరికీ ఒక క్రమ పద్ధతిలో అందించాలన్న లారీ పేజ్‌, సెర్గీ బ్రిన్‌ ఆలోచనతోనే గూగుల్ మిషన్ ప్రారంభమైంది. అలా గూగుల్ సెర్చ్ పేరుతో తీసుకొచ్చిన ప్రొడక్ట్‌ ప్రపంచవ్యాప్తంగా కోట్లాది మందికి పరిష్కారాలను వెతికి పెట్టింది. సరైన సమాధానాలు వెతికి పెట్టే గూగుల్ సామర్థ్యాన్ని చూసిన నేను ఆశ్చర్యపోయేవాడిని. ‘లీక్ అవుతున్న నల్లాకు రిపేర్ చేయడం ఎలా?’ దగ్గరి నుంచి తాను ఉద్యోగం కోసం వెతుకుతున్న సమయంలో ‘గూగుల్ ఇంటర్వ్యూని ఫేస్ చేయడం ఎలా?’ వరకు అనేక ప్రశ్నలకు గూగుల్ నాకు సమాధానం ఇచ్చింది. కాలక్రమంలో నేను ప్రశ్నలు అడిగిన తీరుతో పాటు గూగుల్ నుంచి సమాధానం ఇచ్చే విధానంలోనూ చాలా మార్పులు వచ్చాయి’’ అని సుందర్ పిచాయ్ ఓ బ్లాగ్ లో వివరించారు.
విశ్వాసం చూరగొనడం అతిపెద్ద సవాలు
గూగుల్ నుంచి ఎన్నో సర్వీస్ లు తేవడం ఒక ఎత్తు అయితే, యూజర్ల నమ్మకాన్ని పొందడం అతిపెద్ద సవాలు అని సుందర్ పిచాయ్ అన్నారు. అందుకే గూగుల్ మొదటి నుంచి సాంకేతికతను బాధ్యతాయుతంగా ఉపయోగించడాన్ని ప్రోత్సహించిదని పేర్కొన్నారు. ప్రతి ఒక్కరి సమాచారం, ప్రైవసీకి భద్రత కల్పించడాన్ని ప్రాధాన్యంగా ఎంచుకున్నామని అన్నారు. అలాగే, ఏఐ రూపంలో వస్తున్న మరో సాంకేతిక విప్లవానికి మనం తొలి దశలో ఉన్నామని సుందర్ పిచాయ్ చెప్పారు. దీన్ని అందరూ యూజర్లకి మరింత సహాయకారిగా మార్చడం, దానిని బాధ్యతాయుతంగా అమలు చేయడమే రాబోయే 10 సంవత్సరాలు తమ లక్ష్యం అని పిచాయ్ స్పష్టం చేశారు.