ఇటీవల దొరికిన రాయదుర్గం డ్రగ్స్ కేసులో పోలీసు హస్తం ఉన్నట్లుగా తెలంగాణ యాంటీ నార్కోటిక్ బ్యూరో అధికారులు గుర్తించిన సంగతి తెలిసిందే. సైబరాబాద్ సైబర్ క్రైమ్ విభాగం(సీసీఎస్)లో రాజేందర్ ఎస్సైగా పనిచేస్తున్నారు. నిందితుల వద్ద పట్టుబడిన డ్రగ్స్‌లో సుమారు 1,750 గ్రాముల వరకు దాచిపెట్టి అమ్మేందుకు ఆయన ప్రయత్నించినట్లుగా అధికారులు గుర్తించారు. తాజాగా ఆ ఎస్సై రాజేందర్పై సస్పెన్షన్ వేటు పడింది. ఎస్సైను సస్పెండ్ చేస్తూ సైబరాబాద్ సీపీ స్టీఫెన్ రవీంద్ర బుధవారం (సెప్టెంబరు 6) ఆదేశాలు జారీ చేశారు. ప్రస్తుతం ఎస్సై రాజేందర్ ను రాయదుర్గం పోలీసులు కస్టడీలోకి తీసుకున్నారు. కూకట్‌పల్లి కోర్టు రాజేందర్‌ను రెండు రోజుల పాటు పోలీస్ కస్టడీకి ఇచ్చేందుకు అనుమతి ఇచ్చింది.
దీంతో ఎస్సై రాజేందర్‌ను కస్టడీలోకి తీసుకున్న రాయదుర్గం పోలీసులు.. అతడిని రెండు రోజుల పాటు విచారణ చేయనున్నారు. అలాగే రాజేందర్‌కు డ్రగ్స్ ముఠాలతో సంబంధాలపై పోలీసులు ఆరా తీస్తున్నారు.
గతంలోనూ అవినీతి ఆరోపణలు
అయితే, రాజేందర్పై గతంలోనూ అవినీతి ఆరోపణలు ఉన్నాయి. ఆయన కొన్నేళ్ల క్రితం రాయదుర్గం ఎస్ఐగా పనిచేసినప్పుడు ఏసీబీకి రెడ్ హ్యాండెడ్‌గా దొరికిపోయారు. అప్పట్లో రాజేందర్‌ను సస్పెండ్ చేస్తూ ఉత్తర్వులు ఇచ్చారు. అయితే, ఆ ఉత్తర్వులపై కోర్టు నుంచి రాజేందర్ స్టే తెచ్చుకున్నారు. ఆ తర్వాత సైబరాబాద్ సీసీఎస్ విభాగంలో ఎస్సైగా విధులు నిర్వహిస్తున్నారు. ఈ క్రమంలోనే పట్టుబడిన డ్రగ్స్ ను విక్రయిస్తూ మరోసారి నిందితుడిగా పట్టుబడ్డాడు. సైబరాబాద్ కమిషనరేట్‌లో పని చేస్తున్న రాజేందర్ ఫిబ్రవరి నెలలో సైబర్ నేరంలో భాగంగా ముంబయి వెళ్లారు.
అక్కడ సైబర్ మోసానికి పాల్పడిన నైజీరియన్‌ను అరెస్టు చేశారు. ఈ క్రమంలో నైజీరియన్ వద్ద ఉన్న 1,750 గ్రాముల మాదక ద్రవ్యాలను ఎస్సై రాజేందర్ గుట్టుచప్పుడు కాకుండా తన వెంట తెచ్చుకుని ఇంట్లో దాచాడు. ఆ తర్వాత ఆ మాదకద్రవ్యాలను విక్రయించేందుకు రాజేందర్ ప్రయత్నించాడు. రాష్ట్ర నార్కోటిక్ విభాగం పోలీసులకు సమాచారం అందడంతో నార్కోటిక్ విభాగం పోలీసులు రాయదుర్గం పీఎస్ పరిధిలో ఉండే రాజేందర్ ఇంట్లో దాడి చేశారు. ఆయన ఇంట్లో దొరికిన మాదకద్రవ్యాల సరకు విలువ రూ.80 లక్షల విలువ వరకూ ఉంటుందని పోలీసులు తెలిపారు.