20 ఏళ్లు దాటని వయస్సులో సెలవులకు అమ్మానాన్నను చూద్దామని కాలేజీ నుంచి విశాఖ వచ్చిన రవి వర్మ కథ సినిమాటిక్‌గా మారిపోయింది. ఊళ్ళోకి వెళ్లి వద్దామని బైక్‌పై వెళుతున్న రవి వర్మ బండి స్కిడ్ అయ్యి రోడ్డుపై పడిపోయాడు. ఆ సమయంలో వెన్నెముకకు బలమైన దెబ్బ తగింది. అంతే రెండు కాళ్ళు చచ్చుబడిపోయాయి. చాలా ఏళ్ల పాటు మంచానికే పరిమితమైన రవి వర్మ తనకు తానే ధైర్యం చెప్పుకున్నాడు . జీవితం అక్కడితో అయిపోలేదు అని నిరూపించాలనుకున్నాడు.
తన అభిరుచి అయిన ట్రావెలింగ్‌ను మళ్లీ మొదలుపెట్టాడు. దేశం మొత్తం ఓ రౌండ్ వెయ్యలనుకున్నాడు. దానికంటే ముందు తనలాంటి వాళ్లకు స్ఫూర్తిని ఇవ్వడానికి RAMP( రెగ్యులర్ యాక్సిస్ ఫర్ మొబిలిటీ పీపుల్) సంస్థను స్థాపించాడు. శరీరం దెబ్బ తిన్నంత మాత్రాన ఆత్మ స్థైర్యం కూడా దెబ్బ తినాల్సిన అవసరం లేదని నిరూపించదలిచాడు.
దాని కోసం విశాఖ నుంచి బయల్దేరి దేశం మొత్తం కారులో చుట్టి రావాలని అనుకున్నాడు. దానికి తల్లిదండ్రులు నరసింహ రాజు, రాజేశ్వరి, సోదరి పూజిత సపోర్ట్ ఇవ్వడంతో ఈ ఏడాది ఏప్రిల్ 28న విశాఖలోని RK బీచ్ నుంచి బయల్దేరి వెళ్ళాడు. ఈ యాత్ర కోసం ప్రత్యేకంగా మార్పులు చేసిన కారును ఏర్పాటు చేసుకుని.. ఒక సహాయకుణ్ణి వెంట బెట్టుకుని స్వయంగా డ్రైవ్ చేసుకుంటూ దేశం మొత్తం చుట్టి వచ్చాడు.
ఇండియాలోని 27 వేల కిలోమీటర్ల దూరం అన్ని రాష్ట్రాలు, కేంద్ర పాలిత ప్రాంతాలు తిరిగి వచ్చాడు. అన్ని ప్రాంతాలలోనూ తన లాంటి వారిని కలుసుకుంటూ వారికి ధైర్యం చెబుతూ వారి నుంచి తాను స్ఫూర్తి పొందుతూ నాలుగు నెలల పాటు దేశ యాత్రలోనే గడిపాడు. ఇటీవలే తిరిగి వచ్చిన రవి వర్మకు విశాఖ ప్రజలు బ్రాహ్మరథం పట్టడంతోపాటు సన్మానాలు..సత్కారాలు చేశారు. ఈ స్పూర్తితో రానున్న రోజుల్లో కారులోనే ఇతర దేశాల సైతం చుట్టి వస్తానని అంటున్నాడు రవి వర్మ
రెండేళ్ళు నరకం చూసాం: రవి వర్మ తండ్రి రాజు
రవి వర్మకు యాక్సిడెంట్ అయిన తర్వాత రెండేళ్లపాటు నరకం చూశామని తన తండ్రి రాజు తెలిపారు. విశాఖలోని సీతమ్మధారలో ఉండే తాము కలవని డాక్టర్...చెయ్యని ప్రయత్నం లేదని అన్నారు. అయితే తాము కుంగిపోయినా రవి వర్మ మాత్రం తనకు తానే ధైర్యం చెప్పుకోవడమే కాక..తమకు సైతం ధైర్యం చెప్పేవాడని చెప్పారు. ఇప్పుడు ఎంతో మందికి స్ఫూర్తిని ఇస్తున్న తమ కొడుకును చూస్తుంటే ఎంతో గర్వగా ఉంటుందని అంటున్నారు ఆయన.
సీయం జగన్ అభినందన
రెండు కాళ్ళు లేని పరిస్థితుల్లో దేశం మొత్తం ఏకంగా 27 వేల కిలోమీటర్ల దూరం డ్రైవింగ్ చేసుకుంటూ తిరిగివచ్చిన రవి వర్మ ను ఏపీ సీఎం జగన్ సైతం అభినందించారు.