Vellampalli Warns Pawan Kalyan: మేం వ్యక్తిగత విమర్శలు మొదలుపెడితే పవన్ కళ్యాణ్ తట్టుకోలేడు : మంత్రి వెల్లంపల్లి

Janasena Chief Pawan Kalyan: పవన్ కళ్యాణ్ గబ్బర్ సింగ్ కాదు, రబ్బర్ సింగ్ అని, నీ బెదిరింపులు సినిమాల్లో చూసుకోవాలని.. పవన్ బెదిరింపులకు ఎవరూ భయపడేది లేదన్నారు మంత్రి వెల్లంపల్లి శ్రీనివాస్.

Vellampalli Srinivas Warns Janasena Chief Pawan Kalyan: విజయవాడ: జనసేన అధినేత పవన్ కళ్యాణ్ పార్టీ ఎవరికోసం పెట్టాడో ఇప్పటికైనా క్లారిటీ ఇచ్చాడని, తాను చంద్రబాబు కోసం పని చేయడానికోసమే ఉన్నానని జనసేన వ్యవస్థాపక దినోత్సవంలో స్పష్టత ఇచ్చాడని మంత్రి వెల్లంపల్లి శ్రీనివాస్ అన్నారు. పవన్ కళ్యాణ్ గబ్బర్ సింగ్ కాదు, రబ్బర్ సింగ్ అని.. నీ బెదిరింపులు ఏమైనా ఉంటే సినిమాల్లో చూసుకోవాలని.. పవన్ బెదిరింపులకు ఎవరూ భయపడేది లేదన్నారు. పవన్ రాజకీయాల్లో ఊసరవెల్లి లాంటివాడు. ఏపీ సీఎం వైఎస్ జగన్ మోహన్ రెడ్డి జోలికొచ్చినా, మా వైఎస్సార్ సీపీ నాయకుల జోలికొచ్చినా ఖబడ్దార్ అని వెల్లంపల్లి హెచ్చరించారు.

అందువల్లే పవన్ ఘోర పరాజయం..
జనసేన పార్టీ పెట్టి 8 ఏళ్లు అయిందని, కానీ నేటికీ ఆ పార్టీ ఎందుకు పెట్టారో పవన్ కళ్యాణ్ ఏపీ ప్రజలకు తెలియజేశారు. కానీ పవన్ ఉద్దేశం ఏంటో తెలుసు కనుకే ప్రజలు జనసేన అధ్యక్షుడ్ని రెండు స్థానాల్లోనూ ఓడించారని గుర్తుచేశారు. బీజేపీ రూట్ మ్యాప్ కోసం సిద్ధంగా ఉన్నాడని చెప్పడం తన పార్టీ కోసం పని చేయడం కాదని వెల్లంపల్లి శ్రీనివాస్ అన్నారు. వైఎస్సార్‌సీపీ వ్యతిరేక ఓట్లు చీలి పోకూడదని పదే పదే పవన్ ప్రస్తావించడం.. చంద్రబాబును సీఎం చేయాలని జనసేనాని ఉద్దేశమని పేర్కొన్నారు. గతంలో ఏర్పడిన కూటమిలా ఏర్పడి వైఎస్సార్‌సీపీని అధికారానికి దూరం చేయడానికి మాత్రమే పవన్ పనిచేస్తున్నారని, రాష్ట్ర ప్రజలకు ఏం చేయాలో అతడికి స్పష్టత లేదని విమర్శించారు. 

ఆవిర్భావ సభ కాదు.. అమ్ముడుపోయే సభ..
పవన్ కళ్యాణ్ అమరావతిలో నిర్వహించినది జనసేన ఆవిర్భావ సభ కాదని, బీజేపీకి, టీడీపీకి తాను అమ్ముడుపోయే సభ అని వెల్లంపల్లి ఎద్దేవా చేశారు. ఐపీఎల్ తరహాలో ప్యాకేజీలు తీసుకోవడం, మళ్లీ ప్యాకేజీలను పంచుకోవడానికే పవన్ జనసేన సభ నిర్వహించారని ఆరోపించారు. వైఎస్ జగన్, వైఎస్సార్‌సీపీని లక్ష్యంగా చేసుకుని విమర్శలు చేస్తున్నారు తప్ప, ప్రజలు అన్ని ఎన్నికల్లోనూ తమ పార్టీనే ఎందుకు గెలిపిస్తున్నారో తెలుసుకోవాలని సూచించారు. మధ్యాహ్నం మీటింగ్, సాయంత్రం ఫామ్ హౌస్‌కు పరిమితమయ్యే పవన్ కళ్యాణ్‌కు రాజకీయాలు ఎందుకు అని ప్రశ్నించారు.

వ్యక్తిగత విమర్శలు చేస్తే తట్టుకోలేవ్..
అమరావతి రైతులు పెట్టిన పెరగన్నం తిన్న పవన్ కళ్యాణ్, ఫ్లైట్ ఎక్కి ప్యాకేజీలు తీసుకుని రూట్ మార్చాడు. వేరే పార్టీలకు అమ్ముడుపోయిన వ్యక్తివి నువ్వు సీఎం జగన్‌ను విమర్శించడమా, మా నేతలపై వ్యాఖ్యలు చేయడమా అంటూ జనసేనానిపై మంత్రి వెల్లంపల్లి మండిపడ్డారు. మేం కనుక వ్యక్తిగత విమర్శలు మొదలుపెడితే పవన్ 10 నిమిషాలు కూడా తట్టుకోలేడు. రెమ్యునరేషన్ తీసుకుని హాయిగా సినిమాలు చేసుకోవడం ఆయనకే మంచిదన్నారు. రాష్ట్రంలో దేవాలయాలు కూల్చినప్పుడు పవన్ గాడిదలు కాసాడా... పందులు కాసాడా? అంటూ వెల్లంపల్లి ఫైర్ అయ్యారు. పవన్ కళ్యాణ్ ఓ కమెడియన్ అని, నాగబాబు, పవన్ కళ్యాణ్‌లకు ఏపీ సీఎం జగన్ గురించి మాట్లాడే నైతిక హక్కు లేదన్నారు.