16 సంవత్సరాల్లోపు వారికి సోషల్ మీడియా బ్యాన్ - ఆస్ట్రేలియా డేరింగ్ డెసిషన్! 16 సంవత్సరాల లోపు పిల్లలకు సోషల్ మీడియాను నిషేధించాలనే బిల్లును ఆస్ట్రేలియా పార్లమెంటు ఆమోదించింది. ఈ బిల్లును ఆస్ట్రేలియా పార్లమెంట్‌లో అధిక మద్దతుతో ఆమోదించడం విశేషం. ఈ బిల్లుకు అనుకూలంగా ఏకంగా 102 ఓట్లు రాగా, వ్యతిరేకంగా కేవలం 13 ఓట్లు మాత్రమే వచ్చాయి. ఈ చట్టాన్ని ప్రపంచంలోనే సోషల్ మీడియాకు సంబంధించి కఠినమైన నిబంధనలలో ఒకటిగా పరిగణిస్తున్నారు. సైబర్ బుల్లీయింగ్ ఫిర్యాదులు పెరుగుతున్న కారణంగా ప్రభుత్వం ఈ నిర్ణయం తీసుకుంది కానీ సోషల్ మీడియాను నిషేధించడం సమస్యలకు పరిష్కారం కాదని యువత అంటోంది. దీని కారణంగా స్నేహితులు, కుటుంబ సభ్యులతో కనెక్ట్ అయ్యే మార్గాలు అంతం అవుతాయని యువత అభిప్రాయపడుతోంది. యూగోవ్ సర్వే ప్రకారం సోషల్ మీడియా నిషేధానికి 77 శాతం మంది ఆస్ట్రేలియన్ ప్రజల నుంచి మద్దతు లభించింది. ఆస్ట్రేలియాలో మీడియా నుంచి కూడా దీనికి సపోర్ట్ వచ్చింది.