శ్రీ శుభకృత్ నామ సంవత్సరాన్ని పూర్తిచేసుకుని శోభకృత్ నామసంవత్సరంలోకి అడుగుపెట్టాం. ఈ సంవత్సరంలో ఐదు రాశులవారికి శని ఉంటుంది. కొందరికి అష్టమ శని, మరికొందరికి అర్ధాష్టమ శని, ఇంకొందరికి ఏలినాటి శని.
కొన్ని రాశులవారికి గురుబలం బావుండడం వల్ల శనిప్రభావం తక్కువగా ఉన్నప్పటికీ కొన్ని ఇబ్బందులు ఎదుర్కోకతప్పదు. ఈ ఏడాది శని వల్ల ఇబ్బంది పడే రాశులేంటంటే....
శ్రీ శోభకృత్ నామసంవత్సరంలో కర్కాటక రాశివారికి అష్టమ శని ఉంది. గురుడు శుభస్థానంలో సంచరిస్తున్నందున ఆర్థికంగా బావున్నప్పటికీ మానసికంగా కుంగుబాటు తప్పదు. ప్రతిభకు తగిన ప్రోత్సాహం లభించదు. మీకన్నా చిన్నవారివలన అపవాదులు ఎదుర్గోవాల్సి ఉంటుంది.తలపెట్టిన పనులు పూర్తిచేయడానికి చాలా కష్టపడాల్సి ఉంటుంది.
శ్రీ శోభకృత్ నామ సంవత్సరంలో వృశ్చిక రాశివారికి అర్ధాష్టమ శని ఉంది. అయితే గురుడు అనుకూల స్థానంలో ఉన్నందున అంత తీవ్రమైన ఇబ్బందులు ఉండవు. ప్రతి విషయంలో అడ్డంకులు, ఒడిదొడుకులు ఎదురైనప్పటికీ రానురాను పరిస్థితిలో మంచి మార్పు వస్తుంది. ఆరోగ్యం విషయంలో మాత్రం అప్రమత్తంగా ఉండాలి.
శ్రీ శోభకృత్ నామసంవత్సరంలో మకర రాశివారికి ఏలినాటి శని ఉన్నప్పటికీ అంత తీవ్రమైన ప్రభావం ఉండదు. గురుబలం బాగానే ఉండడం వల్ల ఎక్కడికక్కడ ఇబ్బందులు ఎదురైనప్పటికీ వాటిని ఎదుర్కోగలుగుతారు..తొందరగానే ఉపశమనం పొందుతారు. వ్యాపారులు, ఉద్యోగులు కష్టపడితే మాత్రమే ఫలితం పొందుతారు.
శ్రీ శోభకృత్ నామ సంవత్సరంలో కుంభ రాశివారికి ఏలినాటి శని ప్రభావం ఎక్కువగా ఉంటుంది. ప్రతి చిన్న విషయంలోనూ జాగ్రత్తగా ఉండాల్సిందే. అనుకున్నపనులు పూర్తికాక ఇబ్బందులు ఎదుర్కోకతప్పదు. ఏలినాటి శని ప్రభావం వల్ల ఇంటా-బయటా అవమానాలు తప్పవు, అనుకున్న పనులు అనుకున్న సమయానికి పూర్తిచేయలేరు.
మీన రాశివారికి ఈ ఏడాది ఎలినాటి శని ప్రారంభం అవడం వల్ల జీవితం ప్రశ్నార్థకంగా మారుతుంది..ఏదీ కలసిరాక మానసికంగా కుమిలిపోతారు, అలసిపోతారు.గతంలో మీనుంచి సహాయం అందుకున్నవారే ఇప్పుడు మిమ్మల్ని వ్యతిరేకిస్తారు, ఊహించని కేసులలో చిక్కుకునే ప్రమాదం ఉంది అప్రమత్తంగా ఉండాలి.
నోట్: ఆయా రాశుల్లో ఫలితాలన్నీ ఒక్కరికే వర్తిస్తాయని భావించరాదు. మీ జాతకం, గ్రహస్థితి ఆధారంగా కూడా మారుతాయి. వ్యక్తిగత వివరాల కోసం జ్యోతిష్య పండితులను సంప్రదించగలరు.