TSRTC Good News: ప్రయాణీకులకు టీఎస్ఆర్టీసీ (TSRTC) గుడ్ న్యూస్ చెప్పింది. పవిత్ర కార్తీక మాసం పురస్కరించుకొని తెలుగు రాష్ట్రాల్లోని ప్రసిద్ధ పుణ్యక్షేత్రాలకు (Famous Siva Temples) ప్రత్యేక బస్సులు (Special Services) నడపనున్నట్లు అధికారులు తెలిపారు. భక్తులు ఈ అవకాశం వినియోగించుకోవాలని సూచించారు.
ఏపీలో ఈ క్షేత్రాలకు
ఏపీలోని అమరావతి, భీమవరం, పాలకొల్లు, ద్రాక్షారామం, పాలకొల్లు, సామర్లకోట పంచారామ క్షేత్రాలకు ప్రత్యేక సర్వీసులు ఏర్పాటు చేసినట్లు వివరించారు. ఈ బస్సులు ప్రతి ఆదివారం, కార్తీక పౌర్ణమి ముందు రోజు సాయంత్రం 5 గంటలకు హైదరాబాద్‌ నుంచి బయలుదేరి మంగళవారం మధ్యాహ్నం 12 గంటలకు తిరిగి నగరానికి చేరుకుంటాయని తెలిపారు. టిక్కెట్‌ ఛార్జీలు రాజధాని రూ.4 వేలు, సూపర్‌ లగ్జరీ రూ.3200. దర్శనం, వసతి కోసం రూ.550 అదనంగా చెల్లించాల్సి ఉంటుందన్నారు.
తెలంగాణలో ఈ క్షేత్రాలకు
తెలంగాణలో వేములవాడ, కాళేశ్వరం, రామప్పగుడి, వెయ్యి స్తంభాల గుడి, పాలకుర్తి తదితర దక్కన్ పంచశైవ క్షేత్రాలకు బస్సులు నడుపుతున్నట్లు అధికారులు తెలిపారు. ఈ సర్వీసులు ప్రతి ఆదివారం, కార్తిక పౌర్ణమి ముందురోజు మధ్యాహ్నం 2 గంటలకు హైదరాబాద్‌ నుంచి బయలుదేరి దర్శనం అనంతరం సోమవారం రాత్రికి నగరానికి చేరుకుంటాయన్నారు. టిక్కెట్‌ ఛార్జీలు రాజధాని రూ.2400, సూపర్‌లగ్జరీ రూ.1900, ఎక్స్‌ప్రెస్‌ రూ.1500గా నిర్ణయించామన్నారు.
కాగా, ప్రయాణికుల సౌకర్యార్థం టీఎస్ఆర్టీసీ అనేక సేవలు అందుబాటులోకి తీసుకొస్తోంది. ఇటీవలే జనరల్ బస్సు పాసులను అందుబాటులోకి తీసుకురాగా, దసరా, రాఖీపౌర్ణమి సందర్భంగా మహిళలకు లక్కీ డ్రా నిర్వహించింది. ఈ క్రమంలో ప్రయాణికులు ఎక్కువగా ఆర్టీసీ వైపే మొగ్గు చూపుతున్నారు.
ప్రత్యేక రైళ్లు సైతం
మరోవైపు దీపావళి పండుగ సందర్భంగా ద.మ రైల్వే ప్రత్యేక రైళ్లు ఏర్పాటు చేసింది. 12, 14, 19, 21 తేదీల్లో.. సికింద్రాబాద్ – రాక్సోల్, నిజామాబాద్- నాందేడ్ మీదుగా జనసాధారణ ప్రత్యేక రైళ్లు అందుబాటులో ఉంటాయని అధికారులు వెల్లడించారు. సికింద్రాబాద్ నుంచి రాక్సోల్ (రైలు నెం. 07007)కు ఈ నెల 12, 19 తేదీల్లో ఉదయం 10:30కు బయలుదేరుతుంది. తిరుగు ప్రయాణంలో రక్సాల్ నుంచి సికింద్రాబాద్ (07008) కు 14, 21 తేదీల్లో వస్తాయి. ఈ రైళ్లలో 22 అన్‌ రిజర్వ్‌డ్ సెకండ్ క్లాస్ కోచ్‌లు ఉన్నాయని చెప్పారు. దాదాపు 2,400 మంది కూర్చుని ప్రయాణించే వెసులుబాటు కలిగి ఉంటుందని తెలిపారు. సికింద్రాబాద్ నుంచి కామారెడ్డి, నిజామాబాద్, బాసర, ముద్ఖేడ్ , నాందేడ్, పూర్ణ తదితర తక్కువ దూరం ప్రయాణించే వారికి చాలా ఉపయోగకరంగా ఉంటాయని వెల్లడించారు.
ఈ స్టేషన్లలో స్టాపులు
ఈ రైళ్లకు బొల్లారం, మేడ్చల్, అక్కన్నపేట్, కామారెడ్డి, నిజామాబాద్, బాసర, ముద్ఖేడ్, నాందేడ్, పూర్ణ, బాస్మత్, హింగోలి దక్కన్, వాషిం, అకోలా, ఖాండ్వా , ఇటార్సీ, పిపారియా, జబల్పూర్, కాట్ని, సత్నా, మాణీకపూర్, ప్రయాగ్‌రాజ్‌, ఛోకీ పండిట్, డీడీ ఉపాధ్యాయ, బౌక్సర్, అరా, పాటలీపుత్ర, హాజీపూర్, ముజఫర్‌పూర్‌, సీతామర్హి జంక్షన్ స్టేషన్లలో రెండు వైపులా ప్రయాణాల్లో స్టాప్ ఉందని అధికారులు తెలిపారు.
అయితే, సికింద్రాబాద్ వంటి పెద్ద స్టేషన్లలో రద్దీని దృష్టిలో పెట్టుకుని యూటీఎస్ మొబైల్ యాప్ ద్వారా టికెట్లు తీసుకోవాలని ద.మ.రైల్వే సీపీఆర్వో సీహెచ్ రాకేశ్ సూచించారు.