‘‘మూడోళ్లకోసారి వేతనాలను పెంచాలని నిబంధనలు ఉన్నా కనీసం నాలుగున్నరేళ్లు దాటినా వేతనాలు పెంచలేదు. దశాబ్దాలుగా నమ్ముకున్న సినీ ఇండస్ట్రీని వదల్లేక.. ఆర్థిక ఇబ్బందులతో అధిక వడ్డీలకు తెచ్చిన అప్పులు కట్టలేక తీవ్ర ఇబ్బందులు ఎదుర్కొంటున్నాం’’ అంటూ ఆగ్రహంతో ఉద్యమబాట పట్టారు తెలుగు సినీ కార్మికులు. రోజూ షూటింగ్ సెట్ లో ఉండాల్సిన వారంతా జూబ్లిహిల్స్ లో తెలుగు ఫిల్మ్ ఫెడరేషన్ కార్యాలయాన్ని వందలాదిగా ముట్టడించారు. తెలుగు సినిమాలోని 24విభాగాలకు చెందిన కార్మికులు గొంతెత్తి నినదించారు. ఏకంగా తెలుగు, తమిళ సినిమా షూటింగ్ లు పూర్తిగా నిలిచిపోయిన పరిస్దితి వచ్చిందంటే, సమస్య ఏ స్దాయికి వెళ్లిందో అర్థం చేసుకోవచ్చు.
ఒక్క హైదరాబాద్ చుట్టుపక్కల షూటింగ్ జరుపుకుంటున్న 20కి పైగా చిన్న పెద్ద సినిమాల షూటింగ్స్ సైతం ఆగిపోయాయి. ఏకంగా 40 వేల మంది కార్మికులు విధులు బహిష్కరించి నిరసనబాట పట్టారు. వీరి ఆవేదన ఒక్కటే మేము ప్రతీ ఏడాదీ వేతనాలు పెంచమని అడగడంలేదు. కనీసం మూడేళ్లకొకసారైన 30 శాతం పెంచుతామని మీరే అన్నారు. అలా మూడేళ్లు ఆశతో ఎదురు చూస్తూనే ఉన్నాం. ఏకంగా నాలుగున్నరేళ్లు దాటిపోయినా ఇప్పటికీ వేతనాలు పెంచలేదంటూ ఆవేదన వ్యక్తం చేస్తున్నారు. కోవిడ్ ప్రభావంతో పెంచలేక పోయామని సాకు చూపించాలనుకున్నా.. కోవిడ్ తరువాత వందల కోట్ల రూపాయల భారీ బడ్జెట్ సినిమాలు విడుదలైయ్యాయి. హీరోలు సైతం కోట్లాది రూపాయల రెమ్యూనరేషన్‌ తీసుకుంటున్నారు.
మిగతా నటీనటులకు సైతం మంచి పారితోషకాలు ఇస్తున్నారు. అలా అని మేము గొంతెమ్మ కోర్కెలు కోరడంలేదు. కనీసం వేతనాలు 30 శాతం పెంచమని మాత్రమే డిమాండ్ చేస్తున్నామంటూ కార్మికులు కోరుతున్నారు. సెట్ లో షూటింగ్ మొదలైన రోజు నుండి తెల్లవారు జామున 5 గంటలకు విధులకు హజరైన సినీ కార్మికులంతా వివిధ విభాగాల్లో అర్దరాత్రి వరకూ పనిచేసిన రోజులున్నాయని, కనీసం పిల్లలను పలకరించే సమయం కూడా లేనంతగా తమ జీవితం సినీ ఇండస్ట్రీకి అంకితం చేసుకుంటున్నామని గుర్తు చేసుకుంటున్నారు. భార్యా భర్తలు ఇదే వృత్తిలో ఉన్నవారైతే ఇంక వాళ్ల కష్టాలు చెప్పక్కర్లేదని, ఎవరు ఎప్పుడు వెళ్లి, ఎప్పుడు వస్తారో తెలియక కనీసం ఒకరినొకరు చూసుకునే పరిస్దితి కూడా ఉండదని ‘ABP దేశం’తో తమ ఆవేదన పంచుకున్నారు సిని ఇండస్ట్రీలో పనిచేస్తున్న కార్మికులు.
ఇంతలా వెట్టి చాకిిిరి చేస్తున్నా వడ్డీలు, అప్పులు తీర్చేందుకే జీవితం సరిపోతోందని కన్నీటి పర్యంతమవుతున్నారు. రోజంతా చర్చలు, నిరసనల తరువాత వీరంతా ఓ ప్రధాన డిమాండ్ ను తెరపైకి తెచ్చారు. ఏ నిర్మాతలైతే తమకు వేతనాల పెంపుపై సానుకూలంగా స్పందిస్తారో వారి సినిమా షూటింగ్స్ తప్ప మిగతా వాటిని బహిష్కరిస్తామంటున్నారు. లైట్ బాయ్స్, మేకప్ అసిస్టెంట్స్,హెయిర్ స్టైలిస్ట్, వంట వండి, వడ్డించి గిన్నెలు కడిగేవారు. ఇలా ప్రతి చిన్న పని జరగాలంటే 24 విభాగాలకు చెందిన వీరు ఉంటేనే అది వందకోట్ల బడ్జెట్ సినిమా ముందుకు సాగుతుంది.