గుండ్లపోచంపల్లి మైసమ్మ గూడలోని మల్లారెడ్డి యూనివర్సిటీ ప్రాంగణంలో మల్లారెడ్డి ఉమెన్స్ ఇంజనీరింగ్ కాలేజీ ఆడిటోరియంలో జరిగిన అంతర్జాతీయ మహిళా దినోత్సవ సంబరాల్లో మంత్రి మల్లా రెడ్డి, ఎమ్మెల్సీ కల్వకుంట్ల కవిత పాల్గొన్నారు. మంత్రి మల్లారెడ్డి మాట్లాడుతూ.. తన సక్సెస్ అంతా మహిళలతోనే ముడిపడి ఉందని అన్నారు. తన భార్య కల్పన, తన కోడళ్ల వల్ల తానే అన్ని వ్యాపారాలు చేయగలుగుతున్నానని అన్నారు. ఈ సందర్భంగా మల్లారెడ్డి మరోసారి సరదా వ్యాఖ్యలు చేశారు. ఈ మధ్య తాను తుమ్మితే తుపాను వస్తోందని అన్నారు. సోషల్ మీడియాలో తానే నెంబర్ వన్‌గా ఉంటున్నానని గుర్తు చేసుకున్నారు.
ఈ సందర్భంగా తాను గతంలో చెప్పి, సోషల్ మీడియాలో బాగా పాపులర్ అయిన డైలాగ్‌లు చెప్పారు. ‘‘పాలమ్మినా.. పూలు అమ్మినా.. కాలేజీలు పెట్టిన, మెడికల్ కాలేజీలు పెట్టిన’’ అని చెప్తూ అక్కడి యువతులను ఉత్సాహపర్చారు.
ఫోన్ల మాదిరిగా అప్ డేట్ అవుతుండాలి - కవిత
టెక్నాలజీ నవీకరణ చెందుతున్నట్లు మహిళలు కూడా ఎప్పటికప్పుడు నవీకరణ చెందాలని ఎమ్మెల్సీ కల్వకుంట్ల కవిత అన్నారు. మహిళలు నిరాశ చెందకుండా ప్రతి రంగంలోనూ రాణించేందుకు ప్రయత్నించాలని విద్యార్థినులకు కవిత సూచించారు. రాజకీయాల్లోనూ మహిళలు ఆసక్తి చూపాలని ఎమ్మెల్సీ కల్వకుంట్ల కవిత సభాముఖంగా తెలిపారు. ఈ సందర్భంగా విద్యార్థినులు భారతదేశంలో ఆదర్శంగా, స్ఫూర్తిగా నిలిచిన మహిళల పాత్రలను వేషధారణలో ప్రదర్శించారు.
‘‘మహిళల దినోత్సవ వేడుకలకు మగ పిల్లలను కూడా పిలిస్తే వారికి కూడా అమ్మాయిలను ఎలా గౌరవించాలో తెలుస్తుంది. అమ్మాయిలు అంటే స్మార్ట్ కాదు, స్మార్ట్ ఫోన్ లెక్క ఉండాలి. చదువుతో పాటు ఆరోగ్యం ఉండాలి. సాఫ్ట్ వేర్ అప్ డేట్ లాగా మనం ప్రతి రోజు అప్ డేట్ కావాలి. బి స్మార్ట్ బి లైక్ ఏ స్మార్ట్ ఫోన్. మన ముందు తరం వారు స్వతంత్ర భారత్ కోసం పోరాడారు. మా తరం తెలంగాణ కోసం పోరాడాం. ఇప్పుడు మహిళలకు 33 శాతం రిజర్వేషన్‌ కోసం కొట్లాడాలి. మహిళలు సమైక్యంగా, సమన్వయంతో ఉంటే తమ హక్కుల సాధన సాధ్యమవుతుంది’’ అని కల్వకుంట్ల కవిత పిలుపు నిచ్చారు.