Fake CBI Officer Case : కొవ్విరెడ్డి శ్రీనినాస్ అనే నకిలీ ఐపీఎస్ అధికారిని ఢిల్లీ పోలీసులు అరెస్ట్ చేసిన వ్యవహారంలో కీలక విషయాలు వెలుగులోకి వస్తున్నాయి. ఈ కొవ్విరెడ్డి శ్రీనివాస్ తాను సీబీఐ అధికారినంటూ తెలుగు రాష్ట్రాల్లోనే కాదు ఇతర రాష్ట్రాల్లో చాలా దందాలకు పాల్పడినట్లుగా ఆరోపణలు వస్తున్నాయి. తాజాగా గ్రానైట్ అక్రమాల కేసులో తెలంగాణ మంత్రి గంగుల కమలాకర్‌తో పాటు ఆయన బంధువు, ఎంపీ అయిన మరో గ్రానైట్ వ్యాపారి వద్దిరాజు రవిచంద్ర పైనా ఈడీ అధికారులు కేసులు నమోదు చేశారు. ఈ కేసులను తాను మేనేజ్ చేస్తానని.. బయటపడేస్తానని కొవ్విరెడ్డి శ్రీనివాస్ మంత్రి గంగుల కమలాకర్, వద్దిరాజు రవిచంద్రను సంప్రదించినట్లుగా తెలుస్తోంది. దీంతో వారు కూడా నకిలీ సీబీఐ ఆఫీస్‌ను నమ్మి.. డీల్ సెట్ చేసుకున్నట్లుగా భావిస్తున్నారు.
ముందస్తుగా వద్దిరాజు రవిచంద్ర కొవ్విరెడ్డి శ్రీనివాస్‌కు రూ. పాతిక లక్షల విలువైన బంగార ఆభరణాల్ని ఇచ్చారని చెబుతున్నారు. తర్వాత ఢిల్లీలోని తెలంగాణ భవన్‌లో రూ. కోటి ఇతరుల నుంచి స్వీకరిస్తూండగా సీబీఐ అధికారులు దాడులు చేసి పట్టుకున్నట్లుగా తెలుస్తోంది. ఈ క్రమంలో కొవ్విరెడ్డి శ్రీనివాస్ దగ్గర ఫోన్, ల్యాప్ ట్యాప్ లను విశ్లేషిస్తే అనేక కీలక అంశాలు వెలుగులోకి వచ్చినట్లుగా తెలుస్తోంది. గంగుల కమలాకర్, వద్దిరాజు రవిచంద్రలకు సంబందించి స్పష్టమైన సమాచారం ఉండటంతో వారిద్దరికి వెంటనే నోటీసులు జారీ చేశారు. ఢిల్లీ పిలిపించి మరీ ప్రశ్నించారు.
సీబీఐ అధికారి పేరుతో పలువుర్ని మోసం చేసినట్లుగా ఆధారాలు లభించడంతో హైదరాబాద్‌కు చెందిన నలుగురు వ్యాపారవేత్తలకు సీబీఐ నోటీసులు పంపింది. యూసఫ్‌గూడకు చెందిన మేలపాటి చెంచు నాయుడుకి, వ్యాపారవేత్త వెంకటేశ్వరరావుకి, సనత్‌నగర్‌కు చెందిన రవికి, మరొకరికి నోటీసులు పంపినట్లు తెలుస్తోంది. ఈ నలుగురూ శుక్రవారమే తమ ఎదుట హాజరు కావాలని సీబీఐ స్పష్టం చేసింది. సీబీఐ బ్రాంచ్‌ ఢిల్లీలో వెంకటేశ్వరరావు కుమారుడికి ఉద్యోగం ఇప్పిస్తానని శ్రీనివాస్ హామీ ఇచ్చినట్లు తెలుస్తోంది. అలాగే.. ఢిల్లీలో పగటి పూట లారీలు తిరిగేందుకు అనుమతులు ఇప్పిస్తానని రవి నుంచి డబ్బులు వసూలు చేసినట్లు సమాచారం. ఇక సీబీఐ కేసుకు సంబంధించి సెటిల్మెంట్ చేస్తానని చెంచు నాయుడిని నమ్మించినట్లు తెలుస్తోంది.
వీరంతా శ్రీనివాస్‌కు పెద్ద మొత్తంలో డబ్బులు ఇచ్చినట్లు తెలుస్తోంది. అలాగే.. బంగారు అభరణాలను సైతం ఇచ్చినట్లు తేలింది.
వైజాగ్ లో వాల్తేర్ ప్రాంతంలో అపార్ట్మెంట్లో నివాసముంటున్న శ్రీనివాస్.. అక్కడ వ్యాపార వేత్త పేరుతో మోసాలకు పాల్పడినట్లు సీబీఐ కనిపెట్టింది. దేశ రాజధానిలో మకాం వేసి.. గత ఐదేళ్లుగా సీబీఐ అధికారినంటూ దందాలు, సెటిల్‌మెంట్‌ల పేరుతో అనేకమంది దగ్గర డబ్బులు దండుకున్నట్లుగా తెలుస్తోంది. శ్రీనివాస్ బాధితులు ఇంకా చాలా మంది ఉన్నారని వారంతా.. విచారణలో బయటకు వచ్చే అవకాశం ఉందంటున్నారు. అయితే తాము చేసింది అక్రమం కనుక ఎక్కువ మంది చెప్పుకోలేరని అంచనా వేస్తున్నారు. కానీ సీబీఐ దగ్గర ఉన్న ఆధారాలతో పెద్ద మొత్తంలో డబ్బులు ఇచ్చిన వాళ్లు వణికిపోతున్నారు.