Rohit Sharma Birthday:
టీమ్‌ఇండియా కెప్టెన్‌ రోహిత్ (Rohit Sharma) శర్మ నేడు 36వ వసంతంలోకి అడుగుపెట్టాడు. క్రికెటర్లు, అభిమానులు అతడికి అభినందనలు తెలియజేస్తున్నారు. అతడితో అనుబంధం, ఆత్మీయత గురించి పంచుకుంటున్నారు. యువరాజ్‌ సింగ్‌, యుజ్వేంద్ర చాహల్‌ అయితే స్పెషల్‌గా విషెస్‌ చెప్పారు.
ఇంటర్నేషనల్‌ క్రికెట్లో రోహిత్ శర్మకు ప్రత్యేక స్థానం ఉంది. వన్డేల్లో మూడు డబల్‌ సెంచరీలు చేసిన ఏకైక హీరో! ఇక ఇండియన్‌ ప్రీమియర్‌ లీగులో తిరుగులేని కెప్టెన్‌. ముంబయి ఇండియన్స్‌ను ఏకంగా ఐదు సార్లు ఛాంపియన్‌గా నిలిపాడు. తన కెరీర్లో మొత్తం ఆరు సార్లు ట్రోఫీ ముద్దాడాడు.
దేశంలో ఎక్కువ మంది అభిమానులు ఉన్న క్రికెటర్లలో హిట్‌మ్యాన్‌ ఒకడు. ముంబయిలోనే కాకుండా హైదరాబాద్‌లోనూ అతడికి భారీ అభిమాన గణం ఉంది. అందుకే 36వ పుట్టిన రోజులు సందర్భంగా నగరంలో భారీ కటౌట్‌ ఏర్పాటు చేశారు. డబుల్‌ సెంచరీ కొట్టి బ్యాటుతో అభివాదం చేస్తున్నట్టు కనిపించే 60 ఫీట్ల కటౌట్‌ను రూపొందించారు. ఇప్పుడీ వీడియో వైరల్‌గా మారింది.
రోహిత్ శర్మలోని సునిశిత హాస్య ధోరణిని యువరాజ్‌ సింగ్‌ బయట పెట్టాడు. టీమ్‌ఇండియాకు ఎంపికైన కొత్తలో ఎంతో సరదాగా ఉండేవాడని, అమాయకంగా కనిపించేవాడని అన్నాడు. ఇందుకు సంబంధించి ఓ సంఘటనను గుర్తు చేసుకున్నాడు. 'ఫ్లో.. రైడా' అనే వ్యక్తిని 'ఫ్లోరిడా' అంటూ కామెడీ చేశాడని గుర్తు చేసుకున్నాడు. అతడి ఫన్నీ సన్నివేశాలతో కూడిన వీడియోకు 'ఊ.. అంటావా మామా! ఊ..ఊ అంటావా మామ' ఆడియోను జత చేశాడు.
'ఈ ప్రపంచంలో నాకు అత్యంత ప్రియమైన సోదరుడికి హ్యాపీ బర్త్‌డే. నా మార్గదర్శి, బెస్ట్‌ ఫ్రెండ్‌, ఇతరుల కన్నా నన్ను ఎక్కువ నవ్వించే వ్యక్తికి పుట్టిన రోజు శుభాకాంక్షలు. హ్యాపీ బర్త్‌డే రోహితా.. శర్మా..! సీసీ: రితికా సజ్దే బాబీ' అంటూ యుజ్వేంద్ర చాహల్‌ ట్వీట్‌ చేశాడు. అందుకు 'ఇప్పటికే నా భర్తను దోచుకున్నావు. ఇప్పుడిక నా కెప్టెన్‌ను కూడా దోచేస్తావా' అని రితికా బదులిచ్చింది. ముంబయి ఇండియన్స్ సైతం రోహిత్‌కు ప్రత్యేకంగా శుభాకాంక్షలు తెలియజేసింది.