గత 9 సీజన్‌‌లుగా కబడ్డీ అభిమానులు అలరిస్తోన్న ప్రో కబడ్డీ లీగ్ సీజన్ 10 నేడు ప్రారంభం కానుంది. తొమ్మిదేళ్లుగా అశేష అభిమానులను అలరించిన ఈ లీగ్‌ నేటి నుంచి మరో సీజన్‌కు సిద్ధమైంది. 2014లో ప్రో కబడ్డీ లీగ్ ప్రారంభమైనప్పటి నుంచి ఈ క్రీడకు ప్రాముఖ్యత పెరిగింది. భారీ ప్రజాదరణ లభించింది. దేశంలోని క్రీడాభిమానులను సుపరిచితం అయిన కబడ్డీ.. ప్రో కబడ్డీ లీగ్‌తో దేశ, విదేశాల్లో కోట్లాది మంది అభిమానులను ఆకర్షించింది. ఈ క్రమంలో తొమ్మిది వసంతాలు పూర్తి చేసుకున్న ఈ మెగా లీగ్ పదో ఎడిషన్‌లోకి అడుగు పెడుతోంది. తొలి మ్యాచ్‌లో అహ్మదాబాద్‌లో తెలుగు టైటాన్స్‌-గుజరాత్‌ జెయింట్స్‌తో టోర్నీ మొదలు కానుంది. శుక్రవారం అహ్మదాబాద్‌లోని అక్షర్ రివర్ క్రూజ్‌లో ప్రో కబడ్డీ లీగ్ పదో సీజన్‌ లాంఛనంగా ప్రారంభమైంది. మాషల్ స్పోర్ట్స్, ప్రో కబడ్డీ లీగ్ కమిషనర్ అనుపమ్ గోస్వామి ఈ ప్రత్యేక సీజన్‌ను తొమ్మిదో ఎడిషన్ విజేత జట్టు జైపూర్ పింక్ పాంథర్స్ కెప్టెన్ సునీల్ కుమార్, పదో సీజన్ తొలి మ్యాచ్‌లో పోటీ పడే కెప్టెన్లు పవన్ సెహ్రావత్ (తెలుగు టైటాన్స్), ఫజెల్ అత్రాచలి (గుజరాత్ జెయింట్స్)తో కలిసి ప్రారంభించారు.

 

2014లో ప్రారంభమైన ప్రొ కబడ్డీ లీగ్‌ ఇప్పటిదాకా తొమ్మిది సీజన్లు పూర్తి చేసుకుంది. 2014, 2022 సీజన్‌లో జైపుర్‌ పింక్‌ పాంథర్స్‌, 2015లో యు ముంబా, 2016, 2017లో పట్నా పైరేట్స్‌,  2018లో బెంగళూరు బుల్స్‌, 2019లో బెంగాల్‌ వారియర్స్‌, 2021లో దబాంగ్‌ దిల్లీ  విజేతలుగా నిలిచాయి. ఈసారి  బరిలో మొత్తం 12 జట్లు ఉన్నాయి. తెలుగు టైటాన్స్‌, తమిళ్‌ తలైవాస్‌, పుణెరి పల్టాన్‌, పట్నా పైరేట్స్‌, జైపుర్‌ పింక్‌ పాంథర్స్‌, హరియాణా స్టీలర్స్‌, గుజరాత్‌ జెయింట్స్‌, దబాంగ్‌ దిల్లీ, బెంగళూరు బుల్స్‌, బెంగాల్‌ వారియర్స్‌, యూపీ యోధ, యు ముంబా కప్పు వేటలో ఉన్నాయి. నేటి నుంచి మొదలయ్యే ఈ టోర్నీలో లీగ్‌ దశలో మొత్తం 132 మ్యాచ్‌లు జరుగుతాయి. ఈ మ్యాచ్‌లు 2024 ఫిబ్రవరి 21న ముగుస్తాయి. ప్లేఆఫ్స్‌, ఫైనల్‌ తేదీలు తర్వాత ప్రకటిస్తారు. హైదరాబాద్‌ వేదికగా గచ్చిబౌలి స్టేడియంలో జనవరి 19 నుంచి 24 వరకు 11 మ్యాచ్‌లు జరుగుతాయి. వీటిలో తెలుగు టైటాన్స్‌ నాలుగు మ్యాచ్‌లు ఆడుతుంది. 

 

ప్రో కబడ్డీ లీగ్ సీజన్ 10 కోసం కొత్త జట్టును తెలుగు టైటాన్స్ ప్రకటించింది. ప్లేఆఫ్ రౌండ్‌లోకి ప్రవేశించిన టాప్ సిక్స్‌తో ఇతర 11 జట్ల మాదిరిగానే తెలుగు టైటాన్స్ 22 లీగ్ దశ మ్యాచ్‌లు ఆడుతుంది. తెలుగు టైటాన్స్ సీజన్ 10కి పవన్ కుమార్ సెహ్రావత్‌ను కెప్టెన్‌గా.... పర్వేష్ భైన్‌స్వాల్‌ను వైస్ కెప్టెన్‌గా ప్రకటించింది. పదో సీజన్ తొలి మ్యాచ్‌కు సిద్ధంగా ఉన్నామని ప్రో కబడ్డీ లీగ్ లో అత్యంత ఖరీదైన ఆటగాడు, తెలుగు టైటాన్స్‌ కెప్టెన్‌ పవన్ సెహ్రావత్ తెలిపాడు. గత సీజన్‌ కు దూరంగా ఉండటం నిరాశ కలిగించిందని.. ఈ సీజన్ కోసం చాలా బాగా శిక్షణ పొందామని తెలిపాడు. గుజరాత్ జెయింట్స్‌తో మొదటి మ్యాచ్‌కు మేం పూర్తిగా సిద్ధంగా ఉన్నామని ప్రకటించాడు. ప్రో కబడ్డీ లీగ్ పదో సీజన్‌ 10 స్టార్ స్పోర్ట్స్ నెట్‌వర్క్‌లో ప్రత్యక్ష ప్రసారం అవుతుంది. డిస్నీ+ హాట్‌స్టార్‌లో ఉచితంగా ప్రసారం అవుతుందని నిర్వాహకులు తెలిపారు.

 

తెలుగు టైటాన్స్ జట్టు: 

పర్వేష్ భైన్‌స్వాల్, మోహిత్, నితిన్, అంకిత్, సి మిలాద్ జబ్బారి (విదేశీ), గౌరవ్ దహియా, అజిత్ పాండురంగ్ పవార్, మోహిత్, సందీప్ ధుల్,  రజనీష్, సంజీవి ఎస్, బి హమీద్ మీర్జాయ్ నాడర్ (విదేశీ), శంకర్ భీమ్‌రాజ్ గడై, ఓంకార్ ఆర్ మోర్, పవన్ కుమార్ సెహ్రావత్, ఓంకార్ నారాయణ్ పాటిల్, ప్రఫుల్ సుదమ్ జవారే, రాబిన్ చౌదరి.

 

ప్రధాన కోచ్: శ్రీనివాస్ రెడ్డి