Australia beat Pakistan with ease: మహిళల టీ 20 ప్రపంచకప్(Womens T20 World Cup 2024) లో డిఫెండింగ్ ఛాంపియన్ ఆస్ట్రేలియా(Australia జోరు కొనసాగుతోంది. ఛాంపియన్ ఆటతీరుతో అలరిస్తున్న కంగారు జట్టు... వరుసగా మూడో విజయాన్ని నమోదు చేసింది. పాకిస్థాన్(Pakistan) పై ఘన విజయం సాధించి సత్తా చాటింది. ఈ గెలుపుతో ఆస్ట్రేలియా దాదాపు సెమీస్ కు చేరువైంది. ఏకపక్షంగా జరిగిన ఈ మ్యాచులో తొలుత బంతితో పాక్ పని పట్టిన ఆస్ట్రేలియా.. తర్వాత బ్యాటుతోనూ రాణించి సునాయస విజయాన్ని సాధించింది. ఈ విజయం తర్వాత గ్రూప్ ఏలో కంగారు జట్టు అగ్రస్థానంలో కొనసాగుతోంది. టీమిండియా(India) రెండో స్థానంలో ఉంది.
పాక్ పోరాటం లేకుండానే..
పాకిస్థాన్ తో జరిగిన మ్యాచులో టాస్ గెలిచిన ఆస్ట్రేలియా బౌలింగ్ తీసుకుంది. ఆరంభం నుంచే కంగారు బౌలర్లు... పాక్ బ్యాటర్లను ముప్పు తిప్పలు పెట్టారు. పదునైన బంతులతో పరుగులు రాకుండా కట్టడి చేశారు. ఏ పాకిస్థాన్ బ్యాటర్ కనీసం 30 పరుగుల మార్కును కూడా దాటలేకపోయారు. 13 పరుగుల వద్ద తొలి వికెట్ కోల్పోయిన పాక్.. ఆ తర్వాత వరుసగా వికెట్లు చేజార్చుకుంది. ఆష్లీ గార్డ్ నర్ నాలుగు వికెట్లతో పాక్ పతనాన్ని శాసించింది. నాలుగు ఓవర్లు వేసి కేవలం 21 పరుగులు మాత్రమే ఇచ్చిన గార్డ్ నర్... నాలుగు వికెట్లు తీసింది. అలియా రియాజ్ 26 పరుగులు చేసి పర్వాలేదనిపించింది. మిగిలిన బ్యాటర్లు కనీసం 15 పరుగులు కూడా చేయలేదు. ఏడుగురు బ్యాటర్లు కనీసం రెండంకెల పరుగులు కూడా చేయలేదు. దీంతో పాకిస్థాన్ 19.5 ఓవర్లలో 82 పరుగులకే కుప్పకూలింది. అనంతరం 83 పరుగుల లక్ష్యంతో బరిలోకి దిగిన కంగారు జట్టు కేవలం ఒకే వికెట్ కోల్పోయి.. 11 ఓవర్లలోనే లక్ష్యాన్ని ఛేదించింది. కెప్టెన్ అలీసా హెలీ 23 బంతుల్లోనే 37 పరుగులు చేసి కంగారుల విజయాన్ని తేలిక చేసేసింది. ఈ ఓటమితో పాకిస్థాన్ దాదాపుగా సెమీస్ రేసు నుంచి నిష్క్రమించింది.
న్యూజిలాండ్ కు ప్రాణ సంకటం
ఆస్ట్రేలియాతో జరిగిన మ్యాచులు ఘోర ఓటమి ఏదుర్కొన్న న్యూజిలాండ్.. శ్రీలంకతో కీలక మ్యాచుకు సిద్ధమైంది. ఇప్పటికే ఆడిన మూడు మ్యాచుల్లో పరాజయం పాలైన లంక సెమీస్ రేసు నుంచి నిష్క్రమించింది. కానీ సెమీస్ రేసులో నిలవాలంటే తప్పక గెలావల్సిన మ్యాచులో కివీస్ నేడు బరిలోకి దిగనుంది. లంకపై భారీ విజయం సాధించి మళ్లీ పాయింట్ల పట్టికలో రెండో స్థానానికి ఎగబాకాలని కివీస్ భావిస్తోంది. ఈ మ్యాచులో అయినా గెలిచి పరువు నిలుపుకోవాలని లంక చూస్తోంది. ప్రస్తుత ఫామ్ ను చూస్తే లంకపై న్యూజిలాండ్ గెలుపు అంత కష్టమేమీ కాదు. కానీ శ్రీలంక జట్టు ఎప్పుడు ఎలా ఆడుతుందో తెలీదు.ఆసియా కప్ ఫైనల్లో భారత జట్టుకు లంక షాక్ ఇచ్చింది. ఇప్పుడు మరోసారి లంక సమష్టిగా రాణిస్తే కివీస్ ను ఓడించడం పెద్ద కష్టమేమీ కాదు.