ODI World Cup 2023 Points Table: 

 అప్రతిహాత విజయాలతో ప్రపంచకప్‌లో దూసుకుపోతున్న టీమిండియా  పాయింట్ల పట్టికలో అగ్రస్థానంలో కొనసాగుతోంది. కానీ  చెన్నైలోని చెపాక్ స్టేడియంలో జరిగిన ప్రపంచకప్ 22వ మ్యాచ్‌లో పాకిస్థాన్‌ను 8 వికెట్ల తేడాతో ఓడించి ఆఫ్ఘనిస్తాన్ కొత్త చరిత్ర సృష్టించడంతో వరల్డ్‌ కప్‌ పాయింట్ల పట్టికలో చాలా మార్పులు సంభవించాయి. డిఫెండింగ్ ఛాంపియన్ ఇంగ్లండ్‌ పాయింట్ల పట్టికలో చివరి స్థానానికి వెళ్లింది. గత ఏడాది అద్భుత ఆటతీరుతో అదరగొట్టిన బ్రిటీష్‌ జట్టు అట్టడుగు స్థానానికి చేరింది. అఫ్గాన్‌ గెలుపుతో  పాకిస్తాన్‌ సెమీఫైనల్‌ అవకాశం కూడా క్లిష్టంగా మారింది. పాకిస్థాన్‌పై విజయం సాధించిన తర్వాత అఫ్గానిస్తాన్ ఆరో స్థానంలో ఉండగా... పాకిస్థాన్ నాలుగో స్థానంలో నిలిచింది. టోర్నీలో ఇప్పటివరకు 5 మ్యాచ్‌లు ఆడిన పాకిస్థాన్ రెండు మ్యాచ్‌లు మాత్రమే గెలిచి మూడు మ్యాచుల్లో ఓడిపోయింది. ఇలాంటి పరిస్థితుల్లో సెమీఫైనల్‌లో చోటు దక్కించుకోవాలంటే.. మిగిలిన అన్ని మ్యాచ్‌లను ఎలాగైనా గెలవాల్సిందే. ఈ విజయంతో అఫ్గానిస్థాన్‌ సెమీస్‌ ఆశలను సజీవంగా ఉంచుకుంది.

 

పాపం ఇంగ్లండ్‌

టీమ్ ఇండియా గరిష్టంగా 5 మ్యాచ్‌లు గెలిచి 10 పాయింట్లతో అగ్రస్థానంలో ఉంది. న్యూజిలాండ్ 8 పాయింట్లతో రెండో స్థానంలో కొనసాగుతోంది. ఆ తర్వాత దక్షిణాఫ్రికా 6 పాయింట్లతో మూడో స్థానంలో, ఆస్ట్రేలియా 4 పాయింట్లతో  మైనస్‌ 0.193 నెట్ రన్ రేట్‌తో నాలుగో స్థానంలో ఉన్నాయి. పాకిస్థాన్‌కు కూడా 4 పాయింట్లే ఉన్నా రన్‌రేట్‌ మెరుగ్గా లేదు.  మైనస్‌ -0.400 నెట్ రన్ రేట్‌తో దాయాది జట్టు ఐదో స్థానంలో ఉంది. అఫ్గానిస్తాన్ కూడా 4 పాయింట్లే ఉన్నాయి. కానీ నెట్‌ రన్‌రేట్‌ తక్కువగా ఉంది. మైనస్‌ -0.969 నెట్ రన్ రేట్‌తో అఫ్గాన్‌ ఆరో స్థానంలో ఉంది. ఆ తర్వాత బంగ్లాదేశ్ 2 పాయింట్లు.. మైనస్‌ -0.784 నెట్ రన్‌రేట్‌తో ఏడో స్థానంలో ఉంది, నెదర్లాండ్స్ 2 పాయింట్లు మైనస్‌ -0.790 నెట్ రన్‌రేట్‌తో ఎనిమిదో స్థానంలో ఉంది, శ్రీలంక 2 పాయింట్లు.. మైనస్‌ -1.048 నెట్ రన్‌రేట్‌తో తొమ్మిదో స్థానంలో ఉంది. ఇంగ్లండ్‌కు కూడా 2 పాయింట్లు ఉండగా మైనస్‌ 1.248 నెట్ రన్‌రేట్‌ పదో స్థానంలో ఉంది. ప్రస్తుతం ఇంగ్లండ్ నెట్ రన్ రేట్ అత్యంత దారుణంగా ఉంది. గత మ్యాచ్‌లో డిఫెండింగ్‌ ఛాంపియన్‌ ఇంగ్లాండ్‌... దక్షిణాఫ్రికా చేతిలో 229 పరుగుల తేడాతో చిత్తుగా ఓడిపోయింది. ఈ ఓటమి బ్రిటీష్ జట్టు రన్‌రేట్‌ను తీవ్రంగా ప్రభావితం చేసింది. 

 

ఇక ఈ ప్రపంచకప్‌లో అఫ్గాన్‌ మరోసారి సంచలన విజయం సాధించింది. డిఫెండింగ్ ఛాంపియన్ ఇంగ్లాండ్‌కు షాకిచ్చిన ఆ జట్టు....... పాక్‌పై పంజా విసిరింది. పాకిస్థాన్‌పై 8 వికెట్ల తేడాతో విజయం సాధించింది. టాస్ గెలిచి బ్యాటింగ్‌ ఎంచుకున్న పాకిస్థాన్‌ నిర్ణీత 50 ఓవర్లలో 7 వికెట్ల నష్టానికి 282 పరుగులు చేసింది. అఫ్గాన్‌ బ్యాటర్లు రాణించడంతో మరో ఆరు బంతులు మిగిలుండగానే కేవలం రెండే వికెట్లు కోల్పోయి ఆ జట్టు లక్ష్యాన్ని ఛేదించింది. అఫ్గాన్‌పై ఓటమితో పాక్‌ సెమీస్ ఆశలు సంక్లిష్టమయ్యాయి. పాక్‌ మిగిలిన 4 మ్యాచ్‌ల్లో నెగ్గితేనే టాప్‌-4లోకి వచ్చే అవకాశం ఉంది.
Also Read: బంగ్లాదేశ్‌ పై టాస్ గెలిచిన ప్రొటీస్‌, భారీ విజయంపై కన్ను