Brendon McCullum appointed as the Head Coach of England's men's Test Cricket team: ఇంగ్లాండ్ క్రికెట్‌ బోర్డు సంచలన నిర్ణయం తీసుకుంది. ఇంగ్లాండ్ పురుషుల టెస్టు జట్టు కోచ్‌గా బ్రెండన్‌ మెక్‌కలమ్‌ను ఎంపిక చేసింది. నాలుగేళ్ల పాటు అతడితో ఒప్పందం కుదుర్చుకున్నామని ధ్రువీకరించింది. న్యూజిలాండ్‌తో టెస్టు సిరీసు నుంచి అతడు అందుబాటులో ఉంటాడు.
ప్రస్తుతం కోల్‌కతా నైట్‌రైడర్స్‌కు మెక్‌కలమ్‌ కోచ్‌గా ఉన్నాడు. ఐపీఎల్‌ 2022 ముగిసిన వెంటనే ఇంగ్లాండ్ జట్టుతో చేరతాడు. ఆ జట్టు ప్లేఆఫ్స్‌ సమీకరణాలను బట్టి జాయినింగ్‌ తేదీ నిర్ణయిస్తారు. న్యూజిలాండ్‌ తరఫున మెక్‌ కలమ్‌ 101 టెస్టులు ఆడాడు. 2004 నుంచి 2016 మధ్య 38.64 సగటుతో 6453 పరుగులు చేశాడు. 2014 టీమ్‌ఇండియాపై టెస్టుల్లో అత్యధిక స్కోరు 302 సాధించాడు. ఒక న్యూజిలాండ్‌ ఆటగాడు చేసిన ఏకైక ట్రిపుల్‌ సెంచరీ ఇదే కావడం ప్రత్యేకం.
ఇప్పటి వరకు మెక్‌ కలమ్‌ ఏ టెస్టు జట్టుకు కోచ్‌గా పనిచేయలేదు. ఇంగ్లాండ్‌కు చేస్తుండటమే మొదటి సారి. అయితే పరిమిత ఓవర్ల క్రికెట్‌ కోచ్‌గా అతడు విజయవంతం అయ్యాడు. దూకుడైన క్రికెట్‌తో కరీబియన్‌ లీగులో ట్రిన్‌బాగో నైట్‌రైడర్స్‌కు విజయాలు అందించాడు. 2013 నుంచి రిటైర్మెంట్‌ వరకు న్యూజిలాండ్‌కు కెప్టెన్‌గా ఉన్నాడు. 2015 ప్రపంచకప్‌లో జట్టును ఫైనల్‌కు చేర్చాడు. రన్నరప్‌గా నిలిపాడు.
ఇంగ్లాండ్ జట్టు జూన్‌ 2న బెన్‌స్టోక్స్‌ సారథ్యంలో న్యూజిలాండ్‌తో టెస్టు సిరీస్‌ ఆడబోతోంది. ఈ సిరీసుకు జట్టు ఎంపికలో మెక్‌కలమ్‌ ఇన్‌పుట్స్‌ అందించనున్నాడు. ఇంగ్లిష్ క్రికెట్‌ జట్టును మెక్‌కలమ్‌ చక్కగా ముందుకు నడిపిస్తాడని, దూకుడుగా మారుస్తాడని ఇంగ్లాండ్ పురుషుల క్రికెట్‌ డైరెక్టర్‌ రాబ్‌ కీ అంటున్నాడు.
'ఈ అవకాశం ఇచ్చినందుకు నాకెంతో సంతోషంగా ఉంది. ఇంగ్లాండ్ టెస్టు క్రికెట్‌ జట్టుతో నేను సానుకూలంగా ముందుకు సాగుతా. సరికొత్త యుగానికి తెరతీస్తాను. ఇంగ్లిష్ జట్టు ముందున్న సవాల్లేంటో నాకు తెలుసు. ఆటలో ఒక బలమైన శక్తిగా బెన్‌స్టోక్స్‌ సేనను మార్చగలనన్న నమ్మకం నాకుంది. రాబ్‌కీతో ఆసక్తికరంగా సంభాషించాను. నా ప్రణాళికలను వివరించాను' అని మెక్‌కలమ్‌ అన్నాడు.