Bathukamma Celebrations 2024: మహాలయ అమావాస్య అంతటి ప్రాశస్థ్యం కలిగి అదే రోజున జరుపుకునే పండుగ ఎంగిలిపూల బతుకమ్మ. ఈ పండుగ గురించిన కొన్ని విశేషాలు.
ఎంగిలిపూల బతుకమ్మ
భాద్రపదమాస అమమావాస్య... ఇదే రోజున జరిగే మరో సమారోహ ఆరంభం కూడా ఉంది. అమావాస్య నాడు మొదలై దుర్గాష్టమి నాటికి ముగిసే బతుకమ్మ సంబరాల ప్రారంభ వేడుకలు కూడా ఈ రోజునే మొదలవుతాయి. తెలంగాణ ప్రాంతంలో ఈ పూలపండుగా చాలా విశిష్టమైంది, ప్రత్యేకమైంది. అమావాస్య రోజున కొలుకునే బతుకమ్మను ఎంగిలి పూల బతుకమ్మ అంటారు. తొమ్మిది రోజుల బతుకమ్మ పండుగలో సంబరాల్లో మొదటి రోజు జరుపుకునే ప్రత్యేకమైన వేడుక. ఇది పండుగ ప్రారంభంగా ఈ రోజును ఎంతో భక్తితో ఆనందంతో జరుపుకుంటారు.
ఎంగిలిపూల బతుకమ్మ ప్రత్యేకత
చెట్టు నుంచి రాలిన పువ్వులను సైతం బతుకమ్మగా తయారుచేసి పూజించుకుంటారు. బతుకమ్మ ప్రకృతి ఆరాధనకు ప్రతీక . రాలిన పూలను కూడా గౌరవంగా పూజనీయంగా చూడాలనే సందేశం ఈ పండుగ ద్వారా ప్రపంచానికి ధర్మం బోధిస్తోంది. మొదటి రోజున పండుగ ప్రారంభానికి ముందే పూలను ఏరి, అలంకరిస్తారు. గునుగు, తంగేడు, పోకపూలు, సీతజడల వంటి అడవి పూలతో ఈ బతుకమ్మ తయారు చేస్తారు.
బతుకమ్మ తయారీ
బతుకమ్మ అంటే పువ్వులతో చేసే ఆరాధన కాదు పువ్వులకే చేసే ఆరాధన. పువ్వులను ఆరాధించి ప్రకృతికి సమర్పించుకోవడం సంప్రదాయం. రంగురంగుల పువ్వులను సేకరించి వాటిని దొంతరలుగా పేర్చి బతుకమ్మగా తయారు చేస్తారు.
పర్వావరణానికి చెప్పుకునే కృతజ్ఞత
బతుకమ్మ ఆద్యంతమూ ప్రకృతి ఆరాధనే. వర్షాకాలపు చివరి రోజుల్లో మొదలయ్యే ఈ పండుగ సమయానికి నిండిన జలశయాలతో, పచ్చదనంతో పుడమి శోభాయమానంగా ఉంటుంది. భూమి నూతన జీవంతో పరిపూర్ణంగా ఉంటుంది. ఈ సమయంలో ఆ సహజ జీవానికి తెలుపుకునే కృతజ్ఞతగా ఈ పండుగను భావించవచ్చు.
జానపదుల పండుగ
ఎంగిలిపూల బతుకమ్మ తో ప్రారంభమై సద్దుల బతుకమ్మతో ముగిసే బతుకమ్మ ఉత్సవాల్లో ప్రతి రోజూ బతుకమ్మ ను తయరు చేసి దాని చుట్టూ చప్పట్లతో ప్రత్యేక నృత్యం చేస్తూ పాటలు పాడుతారు. ఈ పాటలన్నీ బతుకును ప్రతిబింబించేవిగా ఉంటాయి.
ప్రసాదం
తెలంగాణ ప్రాంతంలో పెత్రమాస గా పిలిచే ఈ అమావాస్య రోజే ఎంగిలి పూల బతుకమ్మ చేస్తారు. ఈ రోజున బతుకమ్మకు నువ్వులు, బియ్యంపిండి, నూకలు కలిపి నైవేద్యంగా సమర్పించి దీన్ని బతుకమ్మ ఆట ముగిసిన తర్వాత బతుకమ్మను దగ్గరలో ఉన్న జలాశయంలోని నీటిలో నిమజ్జనం చేసిన తర్వాత ఈ ప్రసాదాన్ని అందరూ పంచుకుని తింటారు. బతుకమ్మ నిమజ్జనం నీటికి చేసే పువ్వుల ఆరాధనగా భావించవచ్చు. ప్రకృతి ఆరాధన మన జీవన విధానంలో ఎలా భాగంగా మారిందో చెప్పే పండుగే బతుకమ్మ. ఆ పేరులోనే బతుకు జాడ కనిపిస్తుందని చెప్పవచ్చు.
ఇలా పితృఅమావాస్యతో పితృపక్షాలు ముగుస్తుండగా అదే రోజున ఎంగిలిపూల బతుకమ్మతో బతుకమ్మ సంబరాలు ప్రారంభం అవుతాయి. ప్రకృతిని కొలుచుకునే ఈ పండుగ తెలంగాణ ప్రాంత సంస్కృతి సంప్రదాయాలకు అద్దం పడుతుంది.
ఈ ఎంగిలి పూల బతుకమ్మను సాధారణంగా అందరు ఆడపడుచులు అత్తవారింట్లో జరుపుకుని సద్దుల బతుకమ్మ నాటికి పుట్టింటికి చేరడం ఇక్కడి సంప్రదాయం.
Also Read: Indira Ekadashi 2024: పితృ పక్షంలో వచ్చే ఇందిరా ఏకాదశి.. కుటుంబంలో సంతోషం కోసం ఈ నియమాలు పాటించండి!