Spirituality: మంగళం అంటే శుభప్రదం-శోభాయమానం.. సూత్రం అంటే తాడు- ఆధారమని అని అర్థం..పెళ్ళైన స్త్రీకి అందం, ఐశ్వర్యం మెడలో తాళి బొట్టు.
“ మాంగల్యం తంతునానేనా మమజీవన హేతునా!
కంఠే భద్నామి సుభగే త్వం జీవ శరదాం శతం!! ”
మంగళ సూత్రం భార్యా భర్తల శాశ్వత అనుభంధానికి గుర్తు. వైవాహిక జీవితంలో ఉండే సమస్త కీడును తొలగిస్తుందని హిందువుల నమ్మకం. శక్తి స్వరూపిణి అయిన స్త్రీ మెడలో మంగళ సూత్రం ఉన్నంత వరకూ భర్త ఆరోగ్యంగా ఉంటాడని నమ్ముతారు. అయితే చాలామంది మంగళసూత్రం వేసుకోవడం మానేశారు..వారి సంగతి పక్కనపెట్టేస్తే హిందూ సంప్రదాయాలపై విశ్వాసంతో మంగళసూత్రం వేసుకునే మహిళలు కూడా తమకు తెలియకుండా కొన్ని పొరపాట్లు చేస్తారు. ఇంతకీ మంగళసూత్రం ఎలా ఉండాలి...
- మంగళసూత్రం హృదయాన్ని తాకుతూ వక్షస్థలం కిందవరకూ ఉండాలి
- సౌభాగ్యానికి ప్రతీకలైన పసుపు కుంకుమలను నిత్యం సూత్రాలకు పెట్టుకోవాలి
- చాలామంది మంగళసూత్రాల్లో పగడాలు, ముత్యాలు, అమ్మవారి రూపు పెట్టించుకుంటారు. ఇవి అందంగా ఉంటాయి కానీ సూత్రాలకు ఉండకూడదని చెబుతారు పండితులు
- సూత్రానికి ఇరువైపులా ఎరుపు, నలుపు పూసలు తప్పకుండా ఉండాలి
Also Read: ఆగష్టు 10 రాశిఫలాలు, ఈ రాశులవారు కొత్త పరిచయాలతో జాగ్రత్తగా ఉండాలి!
పిన్నీసులు వద్దు
మంగళ సూత్రాలకు చాలామంది పిన్నీసులు పెడుతుంటారు. కనీ అసలు సూత్రాలకు ఇనుము వస్తువు తగలకూడదు. ఎందుకంటే ఇనుము నెగిటివ్ ఎనర్జీని గ్రహిస్తుంది. దీంతో బంధం మధ్య అన్యోన్యత లోపిస్తుందని పెద్దలు చెబుతారు
Also Read: రోడ్డుపై వీటిని తొక్కేస్తున్నారా - ఏం జరుగుతుందో తెలుసా!
ముత్యం-పగడం మంచిదే
మంగళ సూత్రాలకు ముత్యం,పగడం యాడ్ చేయడం మంచిదే. కుజుడు, చంద్రుడికి ప్రతీకలైన ఈ రెండు రాళ్లు గ్రహదోషాలను తొలగించి వైవాహిక బంధాన్ని మరింత పటిష్టం చేస్తుందని విశ్వసిస్తారు. సాధారణంగా స్త్రీలకు కుజ గ్రహ ప్రభావం వలన అతికోపం, కలహాలు, మొండితనం, అనారోగ్యం, రుతుదోషాలు ఏర్పడతాయి. పగడం, ముత్యం ధరించడం వల్ల వాటి నుంచి ఉపశమనం లభిస్తుంది. ఏ ఇంట్లో అయినా స్త్రీ ప్రశాంతంగా ఉంటే అంతకుమించిన ఆనందం ఏముంటుంది.
"మ్రింగెడివాడు విభుండని మ్రింగెడిదియు గరళమనియు మేలని ప్రజకున్
మ్రింగుమనే సర్వమంగళ మంగళసూత్రంబు నెంత మదినమ్మినదో!"
పరమశివుడు భయంకరమైన హాలాహలాన్ని త్రాగి కూడా చిరంజీవి గా ఉన్నాడంటే అది ఆయన గొప్ప కాదట,పార్వతీ దేవి మెడలో ఉన్న ఆ మంగళ సూత్ర మహిమే అని పురాణాల్లో ఉంది. ఇంతత ప్రాముఖ్యత ఉన్న మంగళసూత్రాన్ని ఆధునికత పేరుతో పక్కనపెట్టేస్తున్నారు.
Also Read: దేవుడి మందిరంలో విగ్రహాలొద్దు, బాత్రూంలో ఖాళీ బకెట్ ఉంచొద్దు-వాస్తు నిపుణులు ఇంకా ఏం చెప్పారంటే!
Disclaimer: ఇక్కడ అందించిన సమాచారం పండితులు, కొన్ని పుస్తకాల నుంచి సేకరించింది మాత్రమే. దీనికి సంబంధించిన శాస్త్రీయ ఆధారాలకు సంబంధించి ‘ఏబీపీ దేశం’ ఎలాంటి భాధ్యత తీసుకోదు. ఈ సమాచారాన్ని పరిగణనలోకి తీసుకునే ముందు పండితులను సంప్రదించి పూర్తి వివరాలు తెలుసుకోగలరు. ‘ఏబీపీ దేశం’, ‘ఏబీపీ నెట్‌వర్క్’ ఈ విషయాలను దృవీకరించడం లేదని గమనించలరు. వీటిని ఎంతవరకూ విశ్వసించాలి అనేది పూర్తిగా మీ వ్యక్తిగతం