Tirumala Ksheerabdi Dwadasi 2024 : తిరుమలలో కార్తీక మాసం సందర్భంగా ప్రత్యేక కార్యక్రమాలు నిర్వహిస్తున్నారు. నిత్యకళ్యాణం పచ్చతోరణంగా వెలిగే తిరుమలలో ఏడాది మొత్తం ఏదో ఒక సేవ జరుగుతూనే ఉంటుంది. అయితే ఏడాదిలో ఒక్కసారి మాత్రమే జరిగే కార్యక్రమం కైశిక ద్వాదశి. ఏటా కార్తీకమాసం పౌర్ణమి ముందు వచ్చే ద్వాదశి / క్షీరాబ్ధి ద్వాదశి/ ఉత్థాన ద్వాదశి రోజు ఈ అరుదైన కార్యక్రమం నిర్వహిస్తారు.
కైశిక ద్వాదశి పర్వదినం సందర్భంగా శ్రీవారి ఆలయంలో కైశిక ద్వాదశి ఆస్థానం వేడుక కన్నులపండువగా జరిగింది. వేకువ ఝామున 4.30 నుంచి 5.30 గంటల వరకు శ్రీదేవి, భూదేవి స‌మేత శ్రీ ఉగ్రశ్రీనివాసమూర్తి ఆల‌య మాడ వీధుల్లో భక్తులను అనుగ్రహించారు. చిరుజల్లుల కారణంగా శ్రీవారు ఘటాటోపం లోపల భక్తులకు దర్శనమిచ్చారు.
వేంకటతురైవార్‌, స్నపనబేరంగా పిలిచే ఉగ్రశ్రీనివాసమూర్తిని శ్రీదేవి భూదేవి సమేతంగా కేవలం కైశిక ద్వాదశి రోజు మాత్రమే సూర్యోదయానికి ముందు మాడవీధులలో ఊరేగిస్తారు. అనంతరం స్వామి, అమ్మ‌వార్ల‌ను బంగారువాకిలికి వేంచేపు చేసి పురాణ పఠనంతో కైశిక ద్వాదశి ఆస్థానాన్ని శాస్త్రోక్తంగా నిర్వహించారు.
ఈ వేడుకను ఏడాదికి ఒక్కసారి మాత్రమే నిర్వహిస్తారు.పంచబేరాల్లో ఒకటైన ఉగ్రశ్రీనివాసమూర్తి ఏడాది మొత్తం ఆలయంలోనే ఉండి ఈ ఒక్కరోజు బయటకు వచ్చి మాడవీధుల్లో విహరిస్తారు. అనంతరం ఆలయం లెక్కలన్నీ ఆయనకు చెప్పి ఆస్థానం నిర్వహిస్తారు అర్చకులు
Also Read: నవంబరు 13నే క్షీరాబ్ధి ద్వాదశి - కార్తీకమాసంలో ఈ రోజుకి ఎందుకంత ప్రాధాన్యతో తెలుసా!
కైశిక ద్వాదశి ప్రాశస్త్యం
శ్రీ వైష్ణ‌వ క్షేత్రాల్లో నిర్వ‌హించే ముఖ్య‌మైన ప‌ర్వ‌దినాల్లో కైశిక‌ద్వాద‌శి ఒక‌టి. శ్రీ వ‌రాహ పెరుమాళ్ కైశిక‌పురాణంలో 82 శ్లోకాల‌తో శ్రీ భూదేవికి క‌థ‌గా చెప్పిన రోజును కైశిక ఏకాద‌శిగా పిలుస్తారు.
నంబదువాన్ కథ
శ్రీనంబదువాన్‌ అనే భక్తుడు శ్రీ వేంకటేశ్వర స్వామివారికి కైశిక రాగంలో అక్షరమాలను నివేదించడానికి బయలుదేరాడు. మార్గమధ్యలో ఓ బ్రహ్మరాక్షసుడు తారసపడి తినేస్తానన్నాడు. తాను శ్రీవారికి సంకీర్తనార్చన చేయడానికి వెళుతున్నానని తిరిగివచ్చి ఆహారంగా మారుతానని చెప్పి నంబదువాన్ ప్రమాణం చేశాడు. ఇచ్చిన మాట ప్రకారం స్వామివారికి కైశిక రాగంలో అక్షరమాలను నివేదించిన తర్వాత బ్రహ్మరాక్షసుని దగ్గరకు వెళ్లాడు. భక్త నంబదువాన్ భక్తికి, సత్యనిరతికి ముగ్ధుడైన స్వామివారు మోక్షం ప్రసాదించారు. ఇలా ఉత్తానద్వాదికి కైశిక ద్వాదశి అనే పేరొచ్చింది.
కన్నులపండువగా జరిగిన కైశిక ద్వాదశి కార్యక్రమంలో శ్రీ‌శ్రీ‌శ్రీ చిన్న‌జీయర్‌స్వామి, టీటీడీ అడిషనల్ ఈవో శ్రీ సి.హెచ్.వెంకయ్య చౌదరి, సీవీఎస్వో శ్రీ శ్రీధర్, డిప్యూటీ ఈవో శ్రీ లోకనాథం, పేష్కార్ శ్రీ రామకృష్ణ, ఇతర అధికారులు పాల్గొన్నారు.
Also Read: లక్ష్మీనారాయణుల అనుగ్రహం కోసం క్షీరాబ్ధి ద్వాదశి పూజ ఇలా ఈజీగా చేసేసుకోండి !
నవంబరు 17 కార్తీక వన భోజనం - నవంబరు 18 కార్తీక దీపోత్సవం
తిరుమలలో ఈ నెల 17 ఆదివారం కార్తీక వనభోజనం నిర్వహించనున్నారు. ఇందులో భాగంగా కళ్యాణోత్సవం, ఊంజల్‌ సేవ, ఆర్జిత బ్రహ్మోత్సవం, సహస్ర దీపాలంకార సేవలను రద్దు చేసింది టీటీడీ. చిన్న గజ వాహనంపై శ్రీ మలయప్ప స్వామి పార్వేట మండపానికి ఊరేగింపుగా చేరుకుంటారు. గోగర్భం సమీపంలో ఉన్న పార్వేట మండపంలో వనభోజన కార్యక్రమం ఉదయం 8.30 గంటల నుంచి మధ్యాహ్నం 12 గంటల వరకు జరగనుంది. అనంతరం స్నపన తిరుమంజనం జరుగుతుంది. నవంబరు 18 కార్తీక సోమవారం రోజు TTD పరిపాలనా భవనం మైదానంలో సాయంత్రం 6 గంటల నుంచి రాత్రి 8 గంటల వరకు కార్తీక దీపోత్సవం నిర్వహిస్తారు.
Also Read: క్షీరాబ్ధి ద్వాదశి వ్రత కథ ఇదే.. తులసి కోట దగ్గర దీపాలు వెలిగించాక చదువుకోవాలి!