ఆషాడమాసం రాగానే ఎలాంటి శుభకార్యాలు నిర్వహించరు. కొత్తగా తలపెట్టే కార్యక్రమాలన్నీ వాయిదా వేసుకుంటారు. పూరీ జగన్నాథుడి రథయాత్ర, బోనాలు, తొలి ఏకాదశి సహా నెలంతా పండుగలే. అయినా శూన్యమాసం అని పిలుస్తారెందుకు అనే సందేహం వస్తుంది. అసలు కారణం ఏంటంటే..
- పురాణాల ప్రకారం ఆషాఢ మాసంలో శ్రీ మహా విష్ణువు యోగ నిద్రలోకి వెళ్తాడు. ఈ సమయంలో పెళ్లిళ్లు చేసినా, ఇంకేవైనా శుభకార్యాలు నిర్వహించినా భగవంతుడి ఆశీర్వాదాలు ఉండవని భావిస్తారు. అంటే ఏం చేసినా శూన్య ఫలమే అంటారు. అందుకే ఈ నెలలో శుభకార్యాలు నిషేధించారట.
- ఆషాఢ మాసాన్ని అనారోగ్య మాసం అని కూడా అంటారు. అనారోగ్య సమస్యల నుంచి కాపాడమంటూ భక్తులంతా అమ్మవారికి బోనం సమర్పిస్తారు.
Also Read: దేవుడికి దహన సంస్కారాలు, ఈ ఆలయంలో విగ్రహాలను దహనం చేసేస్తారు, మళ్లీ ఇలా ప్రాణం పోసుకుంటాయ్!
పేరుకే శూన్యమాసం కానీ ఎన్నో పండుగలు
- ఆషాడ మాసం ప్రారంభమైన వెంటనే భాగ్యనగరంలో బోనాల సందడి మొదలవుతుంది
- సమస్త జగత్తుకు పరిపాలకుడైన పూరీ జగన్నాధుడి రథ యాత్ర జరిగేది కూడా ఈ మాసంలోనే
- అమ్మలుగన్న అమ్మ ముగ్గురమ్మ మూలపుటమ్మ జగజ్జననీ సకల జీవులకు ఆహారం అందించిన శాకంబరీ దేవిగా దేశమంతటా దర్శనమిచ్చేది ఆషాఢంలోనే. ఈ మాసంలో శాకంబరీ నవరాత్రులు కూడా చేస్తారు
- ఈ మాసంలో ఆషాఢ శుద్ధ పంచమిని స్కంధ పంచమిగా చెబుతారు పండితులు. అలాగే ఆషాఢ షష్టిని కుమార షష్టిగా చెబుతారు. ఈ పవిత్రమైన రోజున సుబ్రమణ్యస్వామిని భక్తి శ్రద్ధలతో పూజిస్తారు
- ఆషాడ మాసంలో వచ్చే సప్తమిని భాను సప్తమి అంటారు. సూర్యుడు ఉత్తరం నుంచి దక్షిణం దిశకు పయనిస్తూ మూడు నెలల తర్వాత మధ్యలో చేరుకుంటాడు. ఆ రోజు పగలు,రాత్రి సరిసమానంగా ఉంటాయి
- ఆషాఢ మాసంలో వచ్చే ఏకాదశిని తొలి ఏకాదశి అని మరియు శయన ఏకాదశి అని కూడా అంటారు. ఈరోజునే చాతుర్మాస వ్రతం కూడా ఆరంభమవుతుంది. దీనినే మతత్రయ ఏకాదశి లేదా దేవశయని ఏకాదశి అని కూడా పిలుస్తారు
- ఆషాఢ పూర్ణిమనే గురుపూర్ణిమ అంటారు. మనిషికి జ్ఞానాన్ని అందించేవాడు గురువైతే..లోకానికి జ్ఞానం అందించించిన మహానుభావుడు వేదవ్యాసుడు. ఆయన పుట్టిరోజే గురుపూర్ణిమ
- ఆషాఢ మాసంలోనే దక్షిణాయానం కూడా ప్రారంభమవుతుంది. సూర్యుడు కర్కాటక రాశిలోకి ప్రవేశించినప్పటి నుంచీ తిరిగి మకర రాశిలో ప్రవేశించేవరకూ దక్షిణాయనం అంటారు. ఈ సమయంలో సూర్యుడు భూమధ్య రేఖకు దక్షిణంగా సంచరిస్తాడు
Also Read: ఆధ్యాత్మికంగా వటవృక్షానికి ఎందుకంత ప్రాధాన్యత, చుట్టూ దారం ఎందుకు కడతారు!
Also Read: పూరి జగన్నాథుడి విగ్రహాల్లో ఓ బ్రహ్మపదార్థం ఉంటుంది, అదేంటో తెలుసా!