Bandi Sanjay Met Chiranjeevi: చిరంజీవిని కలిసిన కేంద్ర మంత్రి బండి సంజయ్- స్వయంకృషే వారి బ్యాక్ గ్రౌండ్, బ్రాండ్

కేంద్ర హోంశాఖ సహాయ మంత్రి, కరీంనగర్ ఎంపీ బండి సంజయ్ కుమార్ టాలీవుడ్ మెగాస్టార్ చిరంజీవిని కలిశారు. హైదరాబాద్ జూబ్లిహిల్స్ లోని చిరంజీవి ఇంటికి కేంద్ర మంత్రి బండి సంజయ్ వెళ్లారు.

తన నివాసానికి వచ్చిన కేంద్ర మంత్రి బండి సంజయ్ ను పద్మభూషణ్ చిరంజీవి సాదర స్వాగతం పలికి ఇంట్లోకి తీసుకువెళ్లారు. ఈ సందర్భంగా శాలువా కప్పి, పుష్పగుచ్ఛంతో సత్కరించారు. కేంద్ర మంత్రి బండి, కేంద్ర మాజీ మంత్రి చిరు ఆప్యాయంగా ఆలింగనం చేసుకున్నారు.

అగ్రెసివ్ మెంటాలిటీతో అంచెలంచెలుగా ఎదిగి, ఈరోజు కేంద్ర మంత్రి అయ్యారని బండి సంజయ్ కి చిరంజీవి అభినందలు తెలిపారు. తనలాగే ఎంతో కష్టపడి పైకి వచ్చిన వ్యక్తి అయిన బండి సంజయ్ అంటే తనకెంతో గౌరవం అన్నారు మెగాస్టార్.

ఇటీవల ఏపీ సీఎంగా చంద్రబాబు ప్రమాణ స్వీకారం సమయంలో ప్రధాని నరేంద్ర మోదీ తనను దగ్గరకు తీసుకుని అప్యాయంగా పలకరించడం మర్చిపోలేని అనుభూతి అన్నారు చిరంజీవి. ఏపీ డిప్యూటీ సీఎం పవన్ కళ్యాణ్ తో పాటు చిరు చేతులు ఎత్తి ప్రధాని మోదీ ఆ వేడుకలో మరింత జోష్ తేవడం తెలిసిందే.

మీరు నా ఫెవరెట్ హీరో, కాలేజీ డేస్‌లో మీ సినిమాలు బాగా చూసేవాడినని చిరంజీవితో బండి సంజయ్ అన్నారు. ఏపీలో కూటమి ప్రభుత్వం ప్రజలకు మేలు చేస్తుందని పేర్కొన్నారు. పలు అంశాలపై బండి సంజయ్, చిరంజీవి చర్చించినట్లు సమాచారం.