In Pics: హైదరాబాద్‌లో టీ కాంగ్రెస్ భారీ ర్యాలీ, ఈడీ ఆఫీసు ఎదుట నిరసనలు - చాలాచోట్ల ట్రాఫిక్ జామ్

రాహుల్‌గాంధీని ఎన్‌ఫోర్స్‌మెంట్‌ డైరెక్టరేట్‌ (ఈడీ) విచారణ చేయడాన్ని నిరసిస్తూ తెలంగాణ కాంగ్రెస్ ఆధ్వర్యంలో చేపట్టిన భారీ నిరసన ర్యాలీ బషీర్‌బాగ్‌లోని ఈడీ కార్యాలయం ఎదుటకు చేరుకుంది.

ఢిల్లీ ఈడీ కార్యాలయం నుంచి రాహుల్‌ గాంధీ బయటకు వచ్చే వరకు నిరసనలు చేయాలని అధిష్ఠానం పిలుపునిచ్చిన నేపథ్యంలో తెలంగాణలోనూ టీపీసీసీ ఆధ్వర్యంలో ఈ ర్యాలీ చేపట్టారు. నెక్లెస్‌ రోడ్డులోని ఇందిరా గాంధీ విగ్రహం నుంచి ర్యాలీ ప్రారంభం అయింది.

మరోవైపు ర్యాలీ నేపథ్యంలో నగరంలోని పలు ప్రాంతాల్లో ట్రాఫిక్​ ఆంక్షలు విధించారు.

ఖైరతాబాద్ జంక్షన్, ఖైరతాబాద్ ఫ్లై ఓవర్, చింతల్ బస్తీ, లక్డీ క పూల్, బషీర్ బాగ్​, తెలుగు తల్లి ఫ్లై ఓవర్ జంక్షన్, అంబేడ్కర్ విగ్రహం, ఎన్టీఆర్ మార్గ్, లిబర్టీ జంక్షన్, సెక్రెటేరియట్ మార్గాల్లో వెళ్లాల్సిన వాహనాలను దారి మళ్లించారు.

మధ్యాహ్నం 3 గంటల వరకు ఈ ట్రాఫిక్ ఆంక్షలు అమల్లో ఉంటాయని పోలీసులు స్పష్టం చేశారు.

ఇప్పటికే పీసీసీ అధ్యక్షుడు రేవంత్‌ రెడ్డితో పాటు, కోమటిరెడ్డి వెంకట్ రెడ్డి, ఉత్తమ్ కుమార్ రెడ్డి, మధుయాస్కి, జగ్గారెడ్డి సహా అందరు కాంగ్రెస్ నేతలు నెక్లెస్‌ రోడ్డులోని ఇందిరా గాంధీ విగ్రహం వద్దకు చేరుకున్నారు.

అక్కడ కాంగ్రెస్ జెండాలు ప్రదర్శిస్తూ నిరసన తెలిపారు. నల్ల బట్టలు, నల్ల కండువాలు ధరించారు.

జగ్గారెడ్డి ఏకంగా సోనియా గాంధీ విగ్రహం ఎక్కి నిరసన తెలిపారు. వీరంతా అక్కడ నుంచి బషీర్‌బాగ్‌ ఈడీ కార్యాలయం వరకు ర్యాలీగా వెళ్లారు.