Pen Drive: ఒక్క రోజులో ఓకే చెప్పిన సాయి కుమార్ - అసలు ఆ 'పెన్ డ్రైవ్'లో ఏముంది?

విష్ణు వంశీ, రియా కపూర్ జంటగా నటిస్తున్న సినిమా 'పెన్ డ్రైవ్'. శ్రీ కృష్ణ మూవీస్ పతాకం మీద వెంకటేశ్వర్లు సమర్పణలో కె. రామకృష్ణ ప్రొడ్యూస్ చేస్తున్నారు. ఈ సినిమాకు ఎంఆర్ దీపక్ దర్శకుడు, బుజ్జి బొగ్గారపు సహ నిర్మాత.

'పెన్ డ్రైవ్' సినిమాలో డైలాగ్ కింగ్ సాయి కుమార్ ఓ ప్రధాన పాత్రధారి. హీరో హీరోయిన్ల మీద ఆయన ఇచ్చిన క్లాప్ తో సినిమా మొదలైంది. ముహూర్తపు సన్నివేశానికి నిర్మాత తుమ్మలపల్లి రామసత్యనారాయణ గౌరవ దర్శకత్వం వహించగా... చిత్ర నిర్మాత కె రామకృష్ణ కెమెరా స్విచ్ ఆన్ చేశారు.

'పెన్ డ్రైవ్' గురించి నటుడు సాయి కుమార్ మాట్లాడుతూ... ''విజయదశమికి ముందు రోజు ఈ సినిమా కథ విన్నాను. కథతో పాటు అందులో నా పాత్ర, ఆ పాత్ర పేరు కూడా బావుంది. వెంటనే ఓకే చెప్పేశా. సినిమా విజయం సాధించాలని మనస్ఫూర్తిగా కోరుకుంటున్నా అని చెప్పారు.

'లా' చేసిన తాను నటనపై ఆసక్తితో సినిమా ఇండస్ట్రీకి వచ్చానని, ఈ సినిమా తర్వాత తనకు మంచి అవకాశాలు వస్తాయని ఆశిస్తున్నటు హీరో విష్ణు వంశీ చెప్పారు. తనది కాన్పూర్ అని, పలు హిందీ సినిమాల్లో నటించానని, 'పెన్ డ్రైవ్'తో తెలుగు ఇండస్ట్రీకి పరిచయం అవుతుండటం సంతోషంగా ఉందన్నారు హీరోయిన్ రియా కపూర్. 

లేటెస్ట్ టెక్నాలజీని కొందరు క్రైమ్స్ చేస్తున్నారని, క్రైమ్స్ చేయడం సులువు అయినా తప్పించుకోవడం కష్టమనే కథతో... టెక్నాలజీని మంచికి ఉపయోగించాలని మంచి సందేశం ఇచ్చే సినిమా 'పెన్ డ్రైవ్' అని దర్శకుడు ఎంఆర్ దీపక్ (మర్కాపూర్) తెలిపారు. ఈ నెల 22 నుంచి రెగ్యులర్ షూటింగ్ స్టార్ట్ చేస్తామన్నారు.