Imran Khan:
పాకిస్థాన్ మాజీ ప్రధాని ఇమ్రాన్ ఖాన్ ఆ దేశ సర్కార్‌కు డెడ్‌లైన్ విధించారు. పాకిస్థాన్‌లో ఎన్నికలు నిర్వహిస్తామంటూ ఆరు రోజుల్లోగా ప్రకటన చేయాలని అల్టిమేటం జారీ చేశారు. ప్రావిన్సుల్లోని ప్రభుత్వాలను రద్దు చేసి సాధారణ ఎన్నికలు నిర్వహించాలని డిమాండ్‌ చేశారు.
లేదంటే
పాకిస్థాన్ ప్రధాని ఈ ప్రకటన చేయకపోతే దేశం మొత్తాన్ని రాజధాని ఇస్లామాబాద్‌కు తీసుకొచ్చి నిరసన చేపడుతానని హెచ్చరించారు. గురువారం నిర్వహించిన భారీ బహిరంగ సభలో పీటీఐ పార్టీ మద్దతుదారులను ఉద్దేశించి ఆయన మాట్లాడారు.
మరోవైపు విదేశాల్లో స్థిరపడిన పాకిస్థాన్ సంతతి వారు ఓటు వేసేలా ఇటీవల ఇమ్రాన్ ప్రభుత్వం తెచ్చిన సంస్కరణలను ప్రస్తుత పాక్ ప్రభుత్వం రద్దు చేస్తూ బిల్లు తీసుకొచ్చింది. దీంతో పాటు ఎన్నికల్లో ఈవీఎంలపై నిషేధం విధిస్తూ ప్రవేశపెట్టిన బిల్లుకు జాతీయ అసెంబ్లీ దిగువ సభ ఆమోదం తెలిపింది. బిల్లును ఎగువ సభ అయిన సెనేట్‌కు ఆమోదానికి పంపనున్నారు.
కొత్త ప్రభుత్వం
పాకిస్థాన్ ప్రధానిగా షెహబాజ్ షరీఫ్ ఇటీవల ఏకగ్రీవంగా ఎన్నికయ్యారు. మూడుసార్లు పాకిస్థాన్ ప్రధాన మంత్రిగా పని చేసిన నవాజ్ షరీఫ్ సోదరుడు షెహబాజ్ షరీఫ్. నవాజ్ షరీఫ్ 2017లో పదవీచ్యుతుడయ్యారు. అవినీతి కేసుల్లో ఆయన జైలు జీవితం గడిపారు. ప్రస్తుతం ఆయన బ్రిటన్‌లో ఉంటున్నారు.