UK Next PM: బ్రిటన్ ప్రధాని రేసులో ఉన్న భారత సంతతికి చెందిన రిషి సునక్కు దీపావళి కలిసొచ్చింది. ప్రధాని పదవి రేసు నుంచి మాజీ ప్రధాని బోరిస్ జాన్సన్ తప్పుకున్నట్లు ప్రకటించారు. దీంతో రిషి సునక్కు లైన్ క్లియర్ అయినట్లు కనిపిస్తోంది.
ఇంకెవరు?
బోరిస్ జాన్సన్ పోటీ నుంచి వైదొలగడ రిషికి కలిసొచ్చే అంశమే. పోటీలో ఉన్న మరో నాయకురాలు పెన్నీ మోర్డాంట్కు మెజారిటీ అంతంత మాత్రంగానే కనిపిస్తుండడంతో బ్రిటన్ ప్రధానిగా రిషి సునక్ విజయం సాధించే అవకాశాలు ఎక్కువగా కనిపిస్తున్నాయి.
బ్రిటన్ ప్రధాని పదవికి పోటీలో నిలిచేందుకు కన్జర్వేటివ్ పార్టీలో 100 మంది ఎంపీల మద్దతు అవసరం. రిషి సునక్కు ఇప్పటికే 144 మంది సభ్యుల మద్దతు లభించింది. ఇప్పటివరకు 59 మంది సభ్యుల మద్దతు పొందిన బోరిస్ పోటీ నుంచి వైదొలిగారు. ఇక మరో నాయకురాలు పెన్నీ మోర్డాంట్ ఇప్పటివరకు కేవలం 23 మంది సభ్యుల మద్దతే కూడగట్టారు.
రిషి పిలుపు
యూకే ఆర్థిక వ్యవస్థను చక్కదిద్దుతానని, పార్టీలోనూ ఐక్యత సాధించేలా చొరవ చూపుతానని రిషి అన్నారు. దేశం కోసం ఏదో ఒకటి చేయాలనే తపన ఉన్నందునే ప్రధాని రేసులో ఉన్నానని చెప్పారు. ఈ మేరకు ట్విట్టర్లో ఓ సుదీర్ఘమైన లేఖను పోస్ట్ చేశారు.
Also Read: Diwali 2022: కార్గిల్లో ప్రధాని- సైనికులతో కలిసి మోదీ దీపావళి సంబరాలు