Jaipur Student Rewarded: ఇన్‌స్టాలో బగ్ కనిపెట్టిన ఇండియన్ కుర్రాడు- రూ.38 లక్షలు ఇచ్చిన సంస్థ!

Jaipur Student Rewarded: ఇన్‌స్టాగ్రామ్‌లో బగ్ కనిపెట్టిన ఓ కుర్రాడికి ఆ సంస్థ రూ.38 లక్షలు రివార్డు ఇచ్చింది.

Jaipur Student Rewarded: సోషల్‌ మీడియా ప్లాట్‌ఫాం ఇన్‌స్టాగ్రామ్‌ ఎంత ఫేమస్ అయిందో ప్రత్యేకంగా చెప్పక్కర్లేదు. అయితే ఆ ఇన్‌స్టాలో ఓ బగ్‌ను కనిపెట్టిన ఓ యువకుడు ప్రస్తుతం ట్రెండింగ్‌లో ఉన్నాడు. ఈ బగ్ కనిపెట్టిన ఆ కుర్రాడికి ఇన్‌స్టాగ్రామ్ సంస్థ ఏకంగా రూ. 38 లక్షలు ఇచ్చింది.

ఇదీ సంగతి

రాజస్థాన్‌ జైపుర్‌కు చెందిన నీరజ్‌ శర్మ ఈ ఏడాది జనవరిలో ఇన్‌స్టాలో ఓ బగ్‌ను గుర్తించాడు. అదేంటంటే ఇతర యూజర్‌ల లాగిన్‌ ఐడీ, పాస్‌వర్డ్‌ అవసరం లేకుండానే ఏ ఇన్‌స్టా ఖాతా నుంచైనా వారి ఇన్‌స్టాగ్రామ్‌ రీల్స్‌కు చెందిన థంబ్‌నెయిల్‌ను మార్చేందుకు వీలు కల్పించే బగ్‌ను నీరజ్ కనిపెట్టాడు.

నీరజ్ తన అకౌంట్‌లో ఈ బగ్‌ను గుర్తించాడు. దీనిపై 'ఫేస్‌బుక్‌'కు అతను రిపోర్టు చేశాడు. దీంతో కంపెనీ ప్రతినిధులు ఈ లోపానికి సంబంధించిన డెమో ఇవ్వాలని అడిగారు. ఈ క్రమంలోనే లాగిన్‌ వివరాలు అవసరం లేకుండానే ఇతరుల ఇన్‌స్టాగ్రామ్‌ రీల్‌ థంబ్‌నెయిల్‌ను మార్చి చూపుతూ.. ఓ 5 నిమిషాల డెమోను నీరజ్.. ఫేస్‌బుక్‌కు పంపాడు.

భారీ రివార్డు

దీనిపై విచారణ చేసిన సంస్థ మే నెలలో ఈ లోపాన్ని అంగీకరించింది. దీంతో నీరజ్‌కు 45 వేల డాలర్ల (రూ.35 లక్షలు) రివార్డు అందజేసింది. దీంతోపాటు రివార్డు అందజేయడంలో నాలుగు నెలల ఆలస్యానికిగానూ మరో 4500 డాలర్లు (రూ.3.5 లక్షలు) అదనంగా ప్రకటించింది. దీనిపై నీరజ్ హర్షం వ్యక్తం చేశాడు.

ఇన్‌స్టాగ్రామ్‌లోని ఓ బగ్‌ ద్వారా ఎవరి రీల్ థంబ్‌నెయిల్‌ అయినా సరే.. వేరే ఇతర అకౌంట్ల నుంచి మార్చొచ్చు. సంబంధిత యూజర్‌ పాస్‌వర్డ్ ఎంత బలంగా ఉన్నా సరే.. కేవలం వారి అకౌంట్‌కు సంబంధించిన మీడియా ఐడీ సాయంతో ఈ పని చేయొచ్చు. గతేడాది డిసెంబర్‌లో నా ఇన్‌స్టాగ్రామ్ అకౌంట్‌లో ఈ లోపాన్ని వెతకడం మొదలుపెట్టా. జనవరి 31న బగ్ గుర్తించా. దీనిపై ఫేస్‌బుక్‌కు రిపోర్ట్ పంపా. మూడు రోజుల తర్వాత వారి నుంచి సమాధానం వచ్చింది. వారు కోరినట్లుగానే డెమో పంపా. తర్వాత వాళ్లు రివార్డు ప్రకటించారు.                             - నీరజ్ శర్మ, బగ్ గుర్తించిన కుర్రాడు