Army Helicopter Crash: జమ్ముకశ్మీర్ లో కుప్పకూలిన హెలికాప్టర్.. ఇద్దరు గల్లంతు

జమ్ముకశ్మీర్ కథువాలోని ఓ నదిలో హెలికాప్టర్ కూలిపోయింది. ఈ ప్రమాదంలో ఇద్దరు ఆర్మీ అధికారులు గల్లంతయ్యారు. వీరి ఆచూకీ కోసం గాలింపు చర్యలు చేపట్టింది ఎన్డీఆర్ఎఫ్.

జమ్ముకశ్మీర్ లో ఘోర ప్రమాదం జరిగింది. కథువాలోని రంజిత్ సాగర్ డ్యామ్ వద్ద ఓ హెలికాప్టర్ క్రాష్ అయింది. అయితే ఇది ఆర్మీకి చెందిన హెలికాప్టర్ గా గుర్తించారు. విషయం తెలిసిన వెంటనే భద్రతా దళాలు ఘటనా స్థలానికి పయనమయ్యాయి. ఎన్డీఆర్ఎఫ్ బృందం సహాయక చర్యలు చేపడుతుంది. 

చెరువులో ఆర్మీ హెలికాప్టర్ కుప్పకూలినట్లు మాకు సమాచారం వచ్చింది. వెంటనే మా బృందం సంఘటనా స్థలానికి చేరుకుంది. యుద్ధప్రాతిపదికిన చర్యలు చేపడతాం. ఎన్డీఆర్ఎఫ్ బృందాలు కూడా ఘటనా స్థలానికి చేరుకున్నాయి. పూర్తి సమాచారం వచ్చాక మరిన్ని వివరాలు వెల్లడిస్తాం.               -    ఆర్మీ అధికారి

ఇద్దరు గల్లంతు..

ప్రమాదం జరిగే సమయంలో హెలికాప్టర్ లో ముగ్గురు ఉన్నట్లు సమాచారం. సాధారణ శిక్షణ నిమిత్తం హెలికాప్టర్ బయలుదేరినట్లు అధికారులు తెలిపారు. అయితే ఈ ప్రమాదంలో ఇద్దరు ఆర్మీ అధికారుల ఆచూకీ గల్లంతైంది. లెఫ్టినెంట్ కల్నల్ ఏఎస్ భట్, కెప్టెన్ జయంత్ జోషి ఆచూకీ కోసం ఎన్డీఆర్ఎఫ్ బృందాలు గాలిస్తున్నాయి. ఈ  డ్యామ్ పంజాబ్ పఠాన్ కోట్ కు 30 కిమీ దూరంలో ఉంది.

254 ఆర్మీ ఏవిషేయన్ స్కాండ్రన్ కు చెందిన ఈ హెలికాప్టర్ పంజాబ్ లోని పఠాన్ కోట్ నుంచి 10.20 కి బయలుదేరగా కథువా వద్ద ప్రమాదానికి గురైంది. ఆ సమయంలో హెలికాప్టర్ డ్యామ్ లో మునిగిపోయినట్లు తెలుస్తోంది. ఈ ఘటనపై అధికారులు దర్యాప్తునకు ఆదేశించారు. ప్రమాదానికి గల కారణాలపై పూర్తి విచారణ చేయనున్నట్లు అధికారులు తెలిపారు.

కథువాలో రెండో ప్రమాదం..

జమ్ముకశ్మీర్ కథువాలో ఈ ఏడాది జనవరిలో కూడా ఓ హెలికాప్టర్ ప్రమాదానికి గురైంది. హెచ్ఏఎల్ ధ్రువ్ హెలికాప్టర్ కథవా జిల్లా లఖనాపుర్ లోని బషోలి బ్రిగేడ్ కేంద్రం వద్ద క్రాష్ అయింది. ఈ ప్రమాదంలో లెఫ్టినెంట్ కల్నల్ రిషభ్ శర్మ గాయాలపాలై మృతి చెందారు. కెప్టెన్ అంజనీ కుమార్ కు తీవ్ర గాయాలయ్యాయి. ఆ ఘటన మరువకముందే నేడు ఇంకో ప్రమాదం జరిగింది.