Amit Shah Birthday Greetings:
అమిత్‌షా బర్త్‌డే..
ప్రధాని నరేంద్ర మోదీ, కేంద్ర హోం మంత్రి అమిత్ షా మధ్య ఎంత మైత్రి ఉంటుందో ప్రత్యేకంగా చెప్పనక్కర్లేదు. 2014లో బీజేపీ కేంద్రంలో అధికారంలోకి వచ్చినప్పటి నుంచి వీళ్లిద్దరే పార్టీని నడిపే బాధ్యతలు తీసుకున్నారు. రాజకీయాల్లో మోదీ, అమిత్ షా కాంబో సూపర్‌ హిట్‌. 2014 తరవాత వచ్చిన అసెంబ్లీ ఎన్నికల్లోనూ బీజేపీ వరుసగా గెలవడానికి కారణం వీళ్లిద్దరే. 2019లోనూ బీజేపీ మరోసారి అధికారం దక్కించుకుందంటే...వీళ్లిద్దరి వ్యూహాలే కారణం. ఒకరిని ఒకరు ఎంతో గౌరవించుకుంటారు. ఇవాళ (అక్టోబర్ 22) అమిత్ షా పుట్టిన రోజు సందర్భంగా ప్రధాని నరేంద్ర మోదీ ఆసక్తికర పోస్ట్ చేశారు. అమిత్‌షాని పొగడ్తల్లో ముంచెత్తారు. ఎప్పుడూ ఆయన భారత్‌ని అభివృద్ధి చేయాలన్న ఆకాంక్షతో ఉంటారని, పేదలకు మెరుగైన జీవితం అందించాలని కృషి చేస్తున్నారని ప్రశంసించారు. పాలనా వ్యవహరాల్లోనూ ఎంతో గొప్పగా రాణిస్తున్నారని అన్నారు. ముఖ్యంగా భారత్‌ భద్రతకు సంబంధించిన విషయంలో ఏ మాత్రం రాజీపడని వ్యక్తి అని కితాబునిచ్చారు. బీజేపీని బలోపేతం చేయడంలో ఆయన కీలక పాత్ర పోషించారని అన్నారు. అమిత్‌షా ఆరోగ్యంగా ఉండాలని కోరుకుంటున్నట్టు ట్వీట్ చేశారు.
"అమిత్‌షాకి పుట్టిన రోజు శుభాకాంక్షలు. భారత్‌ అభివృద్ధి చెందాలన్న తపన ఆయనలో నిత్యం కనిపిస్తూనే ఉంటుంది. పేదలు కూడా మెరుగైన జీవితం గడపాలని ఆకాంక్షించే వ్యక్తి ఆయన. పరిపాలనా వ్యవహారాల్లోనూ ఆయన దిట్ట. ముఖ్యంగా దేశ భద్రత విషయంలో ఏ మాత్రం రాజీపడరు. కోఆపరేటివ్ సెక్టార్‌ అభివృద్ధిలోనూ కీలక పాత్ర పోషించారు. బీజేపీని బలోపేతం చేయడంలోనూ ముఖ్యపాత్ర ఆయనదే. నిండు నూరేళ్లు ఆయన ఆయురారోగ్యాలతో జీవించాలని కోరుకుంటున్నాను"
- ప్రధాని నరేంద్ర మోదీ