Khalistani Flags: అసెంబ్లీపై ఖలిస్థాన్ జెండాలు- సీఎం సీరియస్, దర్యాప్తు షురూ

Khalistani Flags: హిమాచల్ ప్రదేశ్ అసెంబ్లీపై ఖలిస్థాన్ జెండాలు దర్శనమిచ్చాయి. దీనిపై ప్రభుత్వం దర్యాప్తు చేపడుతోంది.

Khalistani Flags: 

హిమాచల్‌ప్రదేశ్‌ అసెంబ్లీపై ఖలిస్థాన్‌ జెండాలు కనబడటం కలకలం రేపాయి. ధర్మశాలలోని అసెంబ్లీ ప్రధాన గేటు, గోడలపై కొందరు ఖలిస్థాన్‌ జెండాలను వేలడాదీశారు. వీటిని పోలీసులు గుర్తించి తొలగించారు.

ఏం జరిగింది?

శనివారం అర్ధరాత్రి దాటిన తర్వాత దుండగులు ఈ పని చేసినట్లు పోలీసులు అనుమానిస్తున్నారు. విధాన సభ గేటుకు ఉన్న ఖలిస్థాన్‌ జెండాలను తొలగించామని తెలిపారు. ఇది పంజాబ్‌ నుంచి వచ్చిన ఉగ్రవాదుల పనే అయి ఉంటుందని అనుమానం వ్యక్తం చేశారు. ఈ ఘటనపై కేసు నమోదు చేసి దర్యాప్తు చేస్తున్నట్లు కాంగ్రా ఎస్పీ తెలిపారు. అయితే అసెంబ్లీ గేటు ముందు సీసీటీవీ లేకపోవడం గమనార్హం. 

సీఎం సీరియస్

ఈ ఘటనపై హిమాచల్ ప్రదేశ్ సీఎం జైరాం ఠాకూర్ సీరియర్ అయ్యారు. దీనిపై దర్యాప్తు జరిపి, నిందితులను కఠినంగా శిక్షిస్తామన్నారు.

ఇదో పిరికిపంద చర్య. దీనిపై దర్యాప్తు జరిపి, నిందితులను కఠినంగా శిక్షిస్తాం. ఈ విధానసభలో కేవలం శీతాకాల సమావేశాలే జరుగుతాయి. భద్రతను కట్టుదిట్టం చేయాల్సిన అవసరం ఉంది. ఇతర రాష్ట్రాలతో సరిహద్దుల్లో భద్రతకు సంబంధించి త్వరలో సమీక్ష నిర్వహించనున్నాం.                                                     - జైరాం ఠాకూర్, హిమాచల్ ప్రదేశ్ సీఎం

వార్నింగ్

సిఖ్స్‌ ఫర్‌ జస్టిస్‌ (SFJ) సంస్థకు చెందిన నాయకుడు గురుపత్వంత్‌ సింగ్‌.. సిమ్లాలో ఖలిస్థాన్‌ జెండాలు ఎగురవేయాలని గత నెల పిలుపునిచ్చాడు. ఈ మేరకు ముఖ్యమంత్రి జైరాం ఠాకుర్​కు బెదిరింపు లేఖ రాశారు.