Karti Chidambaram: వీసా కుంభకోణం కేసులో కార్తీ చిదంబరం ఆడిటర్ అరెస్ట్

Karti Chidambaram: వీసా కుంభకోణం కేసులో కాంగ్రెస్ ఎంపీ కార్తీ చిదంబరం సన్నిహితుడ్ని సీబీఐ అరెస్ట్ చేసింది.

Karti Chidambaram: 

కాంగ్రెస్ ఎంపీ కార్తీ చిదంబరం ఆడిటర్, సన్నిహితుడు భాస్కర్ రామన్‌ను కేంద్ర దర్యాప్తు సంస్థ (సీబీఐ) బుధవారం అరెస్ట్ చేసింది.  వీసా కుంభకోణం కేసులో సమగ్ర విచారణ అనంతరం భాస్కర్‌ను అరెస్ట్ చేసినట్లు సీబీఐ అధికారులు తెలిపారు. ఈ కేసుకు సంబంధించి కార్తీ చిదంబరం నివాసం, కార్యాలయాల్లో సీబీఐ మంగళవారం సోదాలు నిర్వహించింది.

కార్తీపై కేసు

వీసా కుంభకోణంలో కార్తీ పి చిదంబరం, ఎస్ భాస్కరరామన్, వికాస్ మఖారియా, మాన్సా (పంజాబ్) ఆధారిత ప్రైవేట్ కంపెనీ, ఎంఎస్ తల్వాండి సబో పవర్ లిమిటెడ్ కంపెనీలకు ప్రాతినిధ్యం వహిస్తున్న వారిపై సీబీఐ కేసు నమోదు చేసింది.

మాన్సా వద్ద ఉన్న ప్రైవేట్ కంపెనీ థర్మల్ పవర్ ప్లాంట్‌ను స్థాపించే ప్రక్రియలో ఉందని, ప్లాంట్ స్థాపనను చైనా కంపెనీకి అవుట్‌సోర్స్ చేసిందని ఆరోపణలు వచ్చాయి. చైనీస్ కంపెనీ అధికారులకు కేటాయించిన 263 ప్రాజెక్ట్ వీసాలను తిరిగి ఉపయోగించడానికి అనుమతిని మంజూరు చేయడంలో అక్రమాలు జరిగాయని సీబీఐ కేసు పెట్టింది.

వీసాల జారీకి ఓ కంపెనీ తరఫున ఉన్న పరిమితులకు అడ్డు రాకుండా ఉండేలా చర్యలు చేపట్టారు. ఈ క్రమంలో సంబంధిత చైనా సంస్థలోని 263 ప్రాజెక్ట్​ వీసాలను గడువు ముగిసినా మళ్లీ ఉపయోగించుకునేలా చేశారు. సాధారణంగా వీసాను పునర్వినియోగించుకోవాలంటే హోంమంత్రి అనుమతి కావాల్సి ఉంటుంది. అప్పటి హోంమంత్రి వీటిని అనుమతించినట్లు తెలుస్తోంది. ఇందుకోసం రూ.50 లక్షలకు ఒప్పందం కుదుర్చుకున్నారు.                                                 - సీబీఐ అధికారులు

చెన్నై, ముంబయి, కర్ణాటక, ఒడిశా, పంజాబ్, దిల్లీ ఇతర ప్రాంతాలతో సహా దాదాపు 10 చోట్ల సోదాలు జరిపిన సీబీఐ బుధవారం భాస్కర్ రామన్‌ను అరెస్టు చేసింది.