India on Covid-19 Vaccines: 'మైత్రి 2.0'.. 4 దేశాలకు వ్యాక్సిన్లు సరఫరా చేసిన భారత్

పొరుగు దేశాలకు వ్యాక్సిన్ సరఫరాను భారత్ పునరుద్ధరించింది. నేపాల్, బంగ్లాదేశ్, మయన్మార్, ఇరాన్ దేశాలకు వ్యాక్సిన్లు పంపినట్లు విదేశాంగ శాఖ తెలిపింది.

భారత్.. మరోసారి పొరుగు దేశాలకు వ్యాక్సిన్ సరఫరాను పునఃప్రారంభించింది. నేపాల్, బంగ్లాదేశ్, మయన్మార్, ఇరాన్ దేశాలకు తాజాగా కరోనా టీకాలను సరఫరా చేసినట్లు భారత విదేశీ వ్యవహారాల శాఖ తెలిపింది. ఇటీవలే మోదీ సర్కార్.. టీకా సరఫరాలను పునరుద్ధరించాలని నిర్ణయం తీసుకుంది.

ప్రస్తుతానికి పక్క దేశాలకు మాత్రమే వ్యాక్సిన్లు సరఫరా చేయాలని ప్రభుత్వం నిర్ణయం తీసుకున్నట్లు విదేశాంగ శాఖ ప్రతినిధి అరిందమ్ బగిచీ వెల్లడించారు.

కరోనా టీకా సరఫరాలను భారత్ పునరుద్ధరిస్తుందని ఇటీవల జరిగిన ఐరాస జనరల్ అసెంబ్లీలో ప్రధాని నరేంద్ర మోదీ తెలిపారు. కనుక పొరుగు దేశాల నుంచి ఈ కార్యక్రమాన్ని ప్రారంభిస్తున్నాం                                            - అరిందమ్ బగిచీ, విదేశాంగ శాఖ ప్రతినిధి

వ్యాక్సిన్ సరఫరాను విదేశాంగ శాఖ నిరంతరం సమీక్షిస్తున్నట్లు బగిచీ వెల్లడించారు. ఇప్పటికే నేపాల్, బంగ్లాదేశ్, మయన్మార్, ఇరాన్‌కు ఇప్పటికే వ్యాక్సిన్లు చేరినట్లు బగిచీ అన్నారు. దేశంలోని ఉత్పత్తి, డిమాండ్ ఆధారంగా తర్వాతి సరఫరాలపై నిర్ణయం తీసుకుంటామన్నారు బగిచీ. 

భారత్​లో అదనంగా ఉన్న కొవిడ్​ టీకాలను 'వ్యాక్సిన్​ మైత్రి' కార్యక్రమంలో భాగంగా ఈ ఏడాది నాలుగో త్రైమాసికంలో విదేశాలకు ఎగుమతి చేస్తామని ఇటీవల ఆరోగ్య శాఖ మంత్రి మన్​సుఖ్​ మాండవీయా తెలిపారు. తద్వారా ప్రపంచ ఆరోగ్య సంస్థ చేపట్టిన కొవాక్స్ కార్యక్రమంలో భారత్ భాగస్వామ్యాన్ని మరింత ముందుకు తీసుకువెళ్తామని చెప్పారు.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి