Dev Gill's debut movie as a hero, Aho Vikramarka review: దేవ్ గిల్ పేరు చెబితే తెలుగు ప్రేక్షకులకు 'మగధీర' గుర్తొస్తుంది. అందులో విలన్ రోల్ ఆయనకు పేరు తీసుకొచ్చింది. 'మగధీర' తర్వాత తెలుగులో పలు సినిమాలు చేశారు. ఇప్పుడు పాన్ ఇండియా సినిమా 'అహో విక్రమార్క'తో కథానాయకుడిగా ప్రేక్షకుల ముందుకు వచ్చారు. రాజమౌళి కో డైరెక్టర్, 'దిక్కులు చూడకు రామయ్య' ఫేమ్ త్రికోటి పేట దర్శకత్వం వహించగా... 'కెజిఎఫ్', 'సలార్' ఫేమ్ రవి బస్రూర్ సంగీతం అందించారు. ఈ సినిమా ఎలా ఉంది? అనేది రివ్యూలో చూడండి.
కథ (Aho Vikramarka Movie Story): విక్రమార్క (దేవ్ గిల్) సబ్ ఇన్స్పెక్టర్. పుణెలో ఓ స్టేషన్‌లో పోస్టింగ్ వచ్చిన వెంటనే అక్రమార్జనకు తెర తీస్తాడు. డ్రగ్ మాఫియా కీలక సభ్యుడు బిలాల్ (పోసాని కృష్ణమురళి) దగ్గర డబ్బులు తీసుకోవడం మొదలు పెడతాడు. ప్రేమించిన అమ్మాయి అర్చన (చిత్రా శుక్లా) కోసం అక్రమార్కుడు కాస్త నీతి నిజాయితీలకు మారు పేరుగా మారతాడు.
విక్రమార్కలో మార్పు తీసుకొచ్చిన ఘటన ఏమిటి? ఎక్కువ కూలికి ఆశపడి 25 ఏళ్ల క్రితం పనికి వెళ్లిన పార్వతి స్లమ్ ఏరియాలో మనుషులు ఏమయ్యారు? వాళ్లకు, ఈ విక్రమార్కకు సంబంధం ఏమిటి? దట్టమైన అడవుల్లోని దండక ప్రాంతంలో ఏం జరుగుతోంది? అసుర (ప్రవీణ్ టర్డే) ఎవరు? పుణెలో డ్రగ్ మాఫియాను భయంతో పరుగులు పెట్టించిన భవాని (తేజస్వినీ పండిట్) మాయం కావడం వెనుక కారణం ఏమిటి? చివరకు ఏమైంది? అనేది సినిమా చూసి తెలుసుకోవాలి.
విశ్లేషణ (Aho Vikramarka Review Telugu): సిల్వర్ స్క్రీన్ మీద తనను తాను హీరోగా చూసుకోవడం కోసం దేవ్ గిల్ తీసుకున్న సినిమా 'అహో విక్రమార్క'. ఇక్కడ 'తీసుకున్న' అని ఎందుకు అనాల్సి వచ్చిందంటే... నిర్మాతల్లో ఆయనొకరు. కోట్ల రూపాయల డబ్బు, డబ్బు కోసం పని చేసే టెక్నీషియన్లు ఉంటే సినిమా తీయడం సులభం అని చెప్పడానికి 'అహో విక్రమార్క' ఒక ఉదాహరణ.
కథ, కథనం నుంచి మొదలు పెడితే నటీనటుల ప్రతిభ, సంగీతం, దర్శకత్వం వరకు... ఒక్కటంటే ఒక్క అంశంలోనూ ఆకట్టుకొని సినిమా 'అహో విక్రమార్క'. 'కెజిఎఫ్', 'సలార్' ఫేమ్ రవి బస్రూర్ ఈ సినిమాకు సంగీతం అందించారంటే నమ్మడం కష్టంగా ఉంటుంది. బహుశా... దేవ్ గిల్ నటన, పేట త్రికోటి దర్శకత్వం, పెన్మత్స ప్రసాద్ వర్మ కథ చూశాక ఏదో ఒకటి కొట్టేద్దాం అని ఆయన కూడా లైట్ తీసుకున్నారేమో!?
పెన్మెత్స ప్రసాద్ వర్మ కథలో ఇసుమంతైనా కొత్తదనం లేదు. పది పదిహేను హిట్ తెలుగు సినిమాలను మిక్సీలో వేసి తీసినట్టు ఉంది. ఎన్టీఆర్ 'టెంపర్', కళ్యాణ్ రామ్ 'పటాస్' సినిమాలు గుర్తు ఉన్నాయా? అవినీతుపరుడైన పోలీస్ మనసును కదిలించే ఘటన తర్వాత నీతిపరుడిగా మారాడతాడు. ఆ రెండూ విజయాలు సాధించాయి. అందుకు కారణం ఆయా కథలను తెరకెక్కించిన తీరు. యాక్షన్, వినోదం, హీరోల నటనతో కొత్తగా ప్రజెంట్ చేసిన విధానం. 'అహో విక్రమార్క' కథను మరొక హీరోతో, దర్శకుడితో తీసి ఉంటే బావుండేదేమో!? యాక్షన్ తప్ప మిగతా సన్నివేశాల్లో మినిమమ్ నటన ఇవ్వలేని దేవ్ గిల్ ప్రేక్షకుల సహనానికి పరీక్ష పెట్టారు. కొన్ని సన్నివేశాలు చూస్తే ఎలా తీశారని నవ్వు వస్తుంది.
దేవ్ గిల్ యాక్షన్ సన్నివేశాలు బాగా చేశారు. ప్రతినాయకుడిగా పలు సినిమాలు చేసిన అనుభవం ఉండటంతో యాక్షన్ కోసం కష్టపడలేదు. కానీ, లవ్ సీన్స్ వచ్చే సరికి సెట్ కాలేదు. ఆయనలో నటుడు తేలిపోయాడు. బేసిక్ ఎక్స్‌ప్రెషన్స్ కూడా ఇవ్వలేదు. చిత్రా శుక్లాది రెగ్యులర్ హీరోయిన్ రోల్. కొత్తగా ఏమీ చేయలేదు. పాత్రకు తగ్గట్టు చేశారంతే! విలన్ అసుర రోల్ చేసిన ప్రవీణ్, ఏసీపీ భవానిగా నటించిన తేజస్వినీ పండిట్ సహా కీలక పాత్రల్లో నటించిన కొందరు మరాఠీ నటులు తెలుగు ప్రేక్షకులకు కొత్త. అందువల్ల, వారితో కనెక్ట్ కావడం కష్టం. అయితే... ఉన్నంతలో తేజస్వినీ పండిట్ బెటర్. ఆవిడ నటన బావుంది.
బిలాల్ పాత్రలో పోసాని కృష్ణమురళి, హీరో తండ్రిగా షాయాజీ షిండే ఓకే. వాళ్లకు అలవాటైన క్యారెక్టర్లు కావడంతో ఈజీగా చేసుకుంటూ వెళ్లారు. కానిస్టేబుల్‌గా బిత్తిరి సత్తి సన్నివేశాల్లో వినోదం రాలేదు. అసుర అనుచరుడిగా తన పాత్రకు న్యాయం చేశారు 'కాలకేయ' ప్రభాకర్.
స్టార్టింగ్ టు ఎండింగ్ ఫక్తు కమర్షియల్ ఫార్మాటులో ఏ దశలోనూ ఆకట్టుకొని నటన, సన్నివేశాలతో తెరకెక్కిన సినిమా 'అహో విక్రమార్క'. కథ, కథనంతో సంబంధం లేకుండా నాలుగు యాక్షన్ సన్నివేశాలు చూడటానికి వెళ్లే ప్రేక్షకులు అయితే హాయిగా వెళ్లొచ్చు. స్క్రీన్ మీద హీరో చేసే చిత్ర విచిత్ర విన్యాసాలు చూసి జోక్స్ వేసుకునే స్నేహితుల బృందం వెళ్లొచ్చు. ట్రోలర్స్, మీమ్ పేజీలకు మంచి స్టఫ్ ఇచ్చే సినిమా 'అహో విక్రమార్క'.